હીરાસર એરપોર્ટ પાસે હિટ એન્ડ રન : ટ્રક ઠોકરે પ્રૌઢનું મોત

પ્રૌઢ બાઇક લઈને રાજકોટ આવી રહ્યા હતા ત્યારે કાળ બની આવેલો ટ્રક માથે ફરી વળ્યો : પોલીસે ટ્રક ચાલકની શોધખોળ કરી

રાજકોટના હીરાસર એરપોર્ટ પાસે રામપર ગામ નજીક હિટ એન રનની ઘટના બની હતી. જેમાં બાઇક લઈને આવતા પ્રૌઢને પુરપાટ દોડી આવતા ટ્રકના ચાલકને ઠોકર મારતા તેઓ માર્ગ પર પટકાયા હતા અને તેના પર ટ્રકનું ટાયર ફરી વળતાં પ્રૌઢનું ઘટના સ્થળે જ કમકમાટી ભર્યું મોત નીપજ્યું હતું. જ્યારે આ મામલે પોલીસે અકસ્માત સર્જી નાશી છૂટેલા ટ્રકના ચાલકની શોધખોળ હાથધરી છે.

માહિતી મુજબ રાજકોટમાં રૈયા રોડ પર રામેશ્વર પાર્કમાં રહેતા રમેશભાઈ બચુભાઈ ત્રિવેદી નામના 58 વર્ષીય પ્રૌઢ ગઇકાલ સવારના સમયે હીરાસર એરપોર્ટ નજીક રામપર ગામ નજીકથી પોતાનું જીજે.03.જેકે.6594 નંબરનું બાઇક લઈને રાજકોટ તરફ આવી રહ્યા હતા. ત્યારે તેમની પાછળ પુરપાટ ઝડપે દોડી આવતા ટ્રકના ચાલકે ઠોકર મારતા તેઓ બાઇક પરથી નીચે પટકાયા હતા. અને ટ્રક તેમની માથે ફરી વળ્યો હતો. જેથી તેમનું ઘટના સ્થળે જ કમકમાટી ભર્યું મોત નીપજ્યું હતું. આ બનાવની જાણ એરપોર્ટ પોલીસને થતાં સ્ટાફ ઘટના સ્થળે દોડી આવ્યો હતો. અને પ્રૌઢના મૃતદેહને પીએમ માટે ખસેડ્યો હતો.અને અકસ્માત સર્જી નાશી છૂટેલા ટ્રક ચાલકની ઓળખ મેળવી તેની શોધખોળ હાથધરી છે.