આજે રાજકોટ સહિત પાંચ જિલ્લામાં ભારે વરસાદની આગાહી

હવામાન વિભાગે સૌરાષ્ટ્રના પાંચ જિલ્લા માટે વરસાદનું રેડએલર્ટ જાહેર કર્યું

રાજકોટ : દક્ષિણ ગુજરાત બાદ મંગળવારથી સૌરાષ્ટ્રમાં મેઘરાજા મન મૂકીને વરસી રહ્યા છે ત્યારે હવામાન વિભાગે બુધવારે જાહેર કરેલ આગાહી અનુસાર સૌરાષ્ટ્રના પાંચ જિલ્લામાં આજે ગુરુવારે ભારેથી અતિભારે વરસાદની શક્યતા જોતા રાજકોટ સહિતના પાંચ જિલ્લાને રેડ અને અન્ય જિલ્લામાં ઓરેન્જ એલર્ટ આપવામાં આવ્યું હતું.

હવામાન વિભાગ દ્વારા બુધવારે રાજકોટ, દેવભૂમિ દ્વારકા, પોરબંદર, જૂનાગઢ, ગીર સોમનાથમાં અતિભારે વરસાદની શક્યતા વ્યક્ત કરી આજે 18 જુલાઈના રોજ જામનગર, રાજકોટ, દેવભૂમિ દ્વારકા, પોરબંદર, જૂનાગઢમાં ભારેથી અતિભારે જ્યારે કચ્છ, મોરબી, સુરેન્દ્રનગર, બોટાદ, ભાવનગર, અમરેલી, ગીર સોમનાથ, નવસારી, વલસાડમાં અતિભારે અને બનાસકાંઠા, પાટણ, અમદાવાદ, ભરૂચ, વડોદરા, છોટા ઉદેપુર, નર્મદા, સુરત, તાપી અને ડાંગમાં ભારે વરસાદ વરસવાની આગાહી કરી હતી. આ ઉપરાંત મહેસાણા, સાબરકાંઠા, ગાંધીનગર, અરવલ્લી, ખેડા, પંચમહાલ, આણંદ, દાહોદમાં હળવોથી મધ્યમ વરસાદ પડવાની શક્યતા વ્યક્ત કરી હતી.

જયારે 19 જુલાઈના રોજ કચ્છ, જામનગર, દેવભૂમિ દ્વારકા, પોરબંદર, રાજકોટ, જૂનાગઢ, ગીર સોમનાથ, અમરેલી, ભાવનગર, નવસારી અને વલસાડમાં અતિભારે જ્યારે મોરબી, સુરેન્દ્રનગર, બોટાદ, ભરૂચ, સુરત, તાપી અને ડાંગમાં ભારે વરસાદ થઇ શકે છે. જ્યારે બનાસકાંઠા, પાટણ, મહેસાણા, સાબરકાંઠા, ગાંધીનગર, અમદાવાદ, ખેડા, આણંદ, અરવલ્લી, મહિસાગર, પંચમહાલ, દાહોદ, છોટા ઉદેપુર, વડોદરા અને નર્મદામાં હળવોથી મધ્યમ વરસાદ સાથે તા.20 જુલાઇના રોજ ગીર સોમનાથ, અમરેલી, ભાવનગર, સુરત, તાપી, નવસારી, વલસાડ અને ડાંગમાં ભારે વરસાદ પડવાની આગાહી કરી હતી.