રાજકોટમાં ડેંગ્યુ ત્રેવડી નહીં ચોવડી સદી ફટકારવા તરફ વધુ 6 કેસ

મચ્છર ઉત્પત્તિ સ્થાન મળી આવતા 448 લોકોને નોટિસ : શહેરમાં શરદી-ઉધરસના 1058, તાવના 850 કેસ

રાજકોટ : શિયાળાની જમાવટ સાથે જ રાજકોટમાં રોગચાળો થોડો હળવો પડ્યો છે, મહાનગરપાલિકાના આરોગ્ય વિભાગના સત્તાવાર આંકડા મુજબ છેલ્લા એક અઠવાડિયામાં શહેરમાં ડેંગ્યુના 6 નવા કેસ નોંધાયા છે, નોંધનીય છે કે, અત્યાર સુધીમાં રાજકોટમાં ડેંગ્યુના 394 કેસ નોંધાઈ ચુક્યા છે. જો કે, ગત સપ્તાહમાં  મેલેરીયાનો નવો કેસ નોંધાયો ન હતો. સાથે જ સપ્તાહમાં શરદી-ઉધરસના 1058, તાવના 850 કેસ નોંધાયા હતા.

રાજકોટ મહાનગર પાલિકાના આરોગ્ય અધિકારી દ્વારા જાહેર કરવામાં આવેલ રિપોર્ટ મુજબ શહેરમાં તા. 2-12થી 8-12 સુધીના સપ્તાહમાં ડેંગ્યુના 6 અને ચીકનગુનીયાનો એક કેસ બહાર આવ્યો હતો. જયારે શરદી-ઉધરસના 1058, સામાન્ય તાવના 850 અને ઝાડા-ઉલ્ટીના 154 ઉપરાંત ટાઇફોઇડના 3 નવા દર્દીઓ સામે આવ્યા હતા. ઉપરાંત અઠવાડિયામાં મેલરિયા વિભાગના સર્વેમાં મચ્છર ઉત્પતિ સ્થાનો વાળા રહેણાંકમાં 329 અને કોર્મશીયલ 119 આસામીને નોટીસ આ૫વામાં આવી હતી.

આરોગ્ય વિભાગે જણાવ્યું હતું કે, ડેંગ્યુ એડીસ મચ્છર દિવસના સમયે કરડે છે અને એક સાથે વઘુ લોકોને કરડતો હોવાથી, વધુ જનસમુદાય હોય તેવા સ્થળોએ આવા રોગ ફેલાવવાનો જોખમ વઘુ રહે છે. રાજકોટ મહાનગર પાલિકાના આરોગ્ય તંત્ર દ્વારા ડેંગ્યુ, મેલેરિયા, ચિકુનગુનિયા વગેરે જેવા રોગોને નિયંત્રિત કરવા માટે સતત પ્રયાસો થઈ રહ્યા છે. આ રોગો માનવીની જીવનશૈલી સાથે સીધા સંકળાયેલા હોવાથી તેમાં લોકોનો સહકાર અત્યંત આવશ્યક છે.  આ રોગચાળા દ્વારા ઊભા થતા જાહેર આરોગ્ય પડકારને પહોંચી વળવા માટે મહાનગરપાલિકા દ્વારા તમામ સ્તરે ઘનિષ્ઠ પ્રયાસો કરી રહ્યા છે. વાહક નિયંત્રણની કામગીરી હેઠળ સપ્તાહમાં 31,622 ઘરોમાં પોરાનાશક તથા ફિલ્ડવર્કરો દ્વારા 1308 ઘરોમાં ફોગીંગ કામગીરી કરવામાં આવી છે.

મચ્છરની ઘનતા વધુ હોય તેવા વિસ્તારોમાં વ્હીકલ માંઉન્ટેડ ફોગીંગ મશીન ફોગીંગ કામગીરી કરવામાં આવે છે. તથા સંવેદનશીલ સોસાયટી, મુખ્ય મંદિરો, બગીચા, ખુલ્લા પ્લોટ, સરકારી શાળાઓ, જાહેર રસ્તાઓ તથા વધુ માનવસમુદાય એકઠો થતો હોય તેવા તમામ વિસ્તારો ફોગીંગ કામગીરી હેઠળ આવરી લઈ જુદા જુદા વિસ્તારમાં રહેણાક મકાન, દુકાન, એપાર્ટમેન્ટ, કોર્મશિયલ કોમ્પલેકસ, ઔધોગિક એકમો, વ્યાપાર ધંધાના સ્થળ તેમજ રહેણાંક મકાનની આસપાસના વિસ્તારોમાં મચ્છરોના ઉત્પતિ સ્થાનો અંગે તપાસ કરી નોટીસ તથા વહિવટી ચાર્જ વસુલાતની કામગીરી કરવામાં આવી હોવાનું જાહેર કરવામાં આવ્યું હતું.