આત્મીય યુનિ. પાછળ ‘ધ ટેડ હબ’માં આઈસ્ક્રીમ-પનીર બધું જ વાસી મળ્યું

ફ્રીઝમાં રાખેલા ઠંડા પીણા, ફ્રાઈમ્સ, વટાણા, બેટરક્રિમ, સિરપ એક્સપાયરી ડેઈટ વીતાવી ગયા'તા: ૩૧ કિલો જથ્થાનો નાશ

મવડી રોડ પર વિશ્વેશ્વર મંદિર પાસે જલારામ ફરસાણમાંથી દાઝીયા તેલમાં ફરસાણ તૈયાર કરી પસ્તીમાં પેક કરી વેચાતું હતું

મહાપાલિકાની ફૂડ શાખા એક બાદ એક નામાંકિત હોટેલ-રેસ્ટોરન્ટમાં દરોડા પાડી રહી છે. આ અંતર્ગત સત્યસાંઈ હોસ્પિટલ રોડ પર આત્મીય યુનિવર્સિટી રોડ પાછળધ ટેડ હબ’ પેઢીમાં દરોડો પાડી તપાસ કરાતાં ત્યાં બધું જ વાસી મળ્યું હતું. પેઢી સંચાલક દ્વારા રસોડું, ફ્રિઝ, ડિસ્પ્લેમાં સંગ્રહિત કરાયેલા ઠંડીપીણા, આઈસ્ક્રીમ, પનીર, ક્નડેન્સ મિલ્ક, બેટરક્રિમ, ફ્રાઈમ્સ, વટાણા, સ્વિટકોર્ન, સીરપ સહિતનો જથ્થો એક્સપાયરી ડેઈટ વીતાવી ગયો હોવા છતાં પીરસાઈ રહ્યાનું ધ્યાન પર આવતાં ૩૧ કિલો વાસી જથ્થાનો સ્થળ પર જ નાશ કરવામાં આવ્યો હતો.

આ ઉપરાંત વિશ્વેશ્વર મંદિર-મવડી રોડ પાસે આવેલા શ્રી જલારામ ફરસાણ હાઉસમાં તપાસ કરવામાં આવતાં ત્યાં દાઝીયા તેલમાં ફરસાણ તળી તેને છાપાની પસ્તીમાં પેક કરીને વેચવામાં આવતું હોવાનું ધ્યાન પર આવ્યું હતું. જ્યારે ૧૫૦ ફૂટ રિંગરોડ પર રાધે હોટેલ પાછળ બજરંગ ડેરી ફાર્મ અને કોફી સ્ટેન્ડમાં ગંદકી જણાતાં બન્ને પેઢીને નોટિસ ફટકારાઈ હતી.

જ્યારે ફૂડ શાખાએ વાણિયાવાડી મેઈન રોડ પર શ્રી મહેશ ડેરી ફાર્મમાંથી મીક્સ દૂધ, ૧૫૦ ફૂટ રિંગરોડ પર રાધે હોટેલ પાછળ બજરંગ ડેરીમાંથી મીક્સ દૂધ, યુનિવર્સિટી રોડ પર જે.કે.ચોકમાં આવેલા શ્યામલ ઈન્ફીનિટી કોમ્પલેક્સના ગ્રાઉન્ડ ફ્લોર પર ગોપુરમમાંથી સાંભાર અને ૮૦ ફૂટ રોડ પર વગડ ચોકડી પાસે રામરાજ રેસ્ટોરન્ટ એન્ડ પાર્ટીપ્લોટમાંથી પનીર બટર મસાલાના નમૂના લઈ પરિક્ષણ અર્થે લેબમાં મોકલ્યા હતા.