રાજકોટના દંપતિએ પોતાની કારને જ બનાવી નાખ્યું હરતું-ફરતુ ઘર

ચારધામની યાત્રા વખતે રહેવા-ખાવા-પીવાની તકલીફ પડી એટલે

અત્યાર સુધીમાં દંપતિ કરી ચુકયુ છે ૮ રાજયોની સફર

ગુજ્જુ દંપતિએ નવી જ પહેલ કરી રાજકોટ સહિત સૌરાષ્ટ્રભરમાં ડંકો વગાડયો

ગુજરાતીઓ હંમેશા ખાવાના અને હરવા-ફરવાના શોખીન રહયા છે. નવી નવી જગ્યાઓ જોવા અને તેના વિષે જાણવા ગુજરાતીઓ હંમેશા તત્પર હોય છે. વેકેશન અને તહેવારોની રજાઓમાં પરિવાર અને મિત્રો સાથે પોતાનો થેલો પેક કરી ફરવા ઉપડી જતા હોય છે. રાજકોટમાં એક એવુ કપલ છે કે જેઓ દેશના ૮ રાજયો ફરી વળ્યા છે અને તે પણ પોતાની કારમા, એવી કાર કે જેમાં રસોડા સહિતની સામગ્રી આવી જાય છે. તમને જાણીને નવાઇ લાગશે કે રાજકોટના એ કપલે પોતાની કારમાં મીની ઘર બનાવી દીધું છે.

`વોઇસ ઓફ ડે’ સાથેની ખાસ વાતચીતમાં નવીન પંડયા તથા તેમના પત્નિ કાજલ પંડયાએ જણાવ્યું હતું કે, વર્ષ-૨૦૧૮માં ચાર ધામની યાત્રા પર ફરવા ગયા ત્યારે ૨૦ દિવસ સુધી ખાવા-પીવા તેમજ રહેવામાં તકલીફ પડી હતી માત્ર સલાડ ખાઇને દિવસો કાઢયા હતા બાદ રાજકોટ ઘરે પરત ફરતા વિચાર આવ્્યો કે પૈસા આપવા છતાં સારી સુવિધા કે જમવાનું મળતું નથી માટે પોતાની કારને ઘર બનાવવાનો વિચાર આવ્યો હતો.

ઇન્સ્યોરન્સમાં સૌરાષ્ટ્ર હેડ તરીકે ફરજ બજાવતા નવીન પંડયાએ પોતાની ૩ મહિના પહેલા જ લીધેલી કારને જ ઘર બનાવવાની પરિવારજનોને વાત કરતા પરિવારજનોએ કહયું હતું કે તમે બન્ને ગાંડા થઇ ગયા છો કે શું ? ફરવા માટે નવી ગાડી બગાડી નાખવાની કહેતા દંપતિએ હાર ન માની અને કારને ઘર બનાવવાનું નક્કી કર્યુ. બાદ નવીન પંડયાએ સોશ્યલ મીડિયાના માઘ્યમથી ગાડીને ઘર કઇ રીતે બનાવય તે અંગે સંશોધન કર્યુ હતુ તેમાં તેના પત્નિનો પણ ખૂબ જ સપોર્ટ હતો.

જેથી દંપતિએ કરેલ મહેનત રંગ લાવી અને ડિઝાઇન બનાવી સુથાર પાસે જઇ કારને ઘર બનાવવાનું કામ શરૂ કર્યુ હતુ અને ૧ મહિનાની અંદર કારને ઘરમાં ફેરવી દીધી હતી.

બાદમાં ૪ એપ્રિલ વર્ષ-૨૦૨૩માં પ્રથમ ટ્રીપ કરી હતી અને ધીમે ધીમે પોતાની કળાને દુનિયા સમક્ષ રજૂ કરવા ગુજ્જુ કપલ ટ્રાવેલર નામની યુ-ટયુબ ચેનલ શરૂ કરી હતી. કારને ઘરમાં ટ્રાન્સફર કરવામાં માત્ર રૂ.૨૫ હજારનો ખર્ચો કરી સારી સુવિધા ઉપલબ્ધ કરી હતી અને ઉત્તરાખંડ, ગોવા, મહારાષ્ટ્ર, રાજસ્થાન, કાશ્મીર સહિતના સ્થળોએ દંપતિ ફરી ચૂકયા છે.

દંપતિએ ૫ોતાનો રોચક કિસ્સો વર્ણવતા જણાવ્યું હતું કે, આબુ ફરવા ગયા ત્યારે પોતાની કાર નીચે દીપડો સુતો હતો તે જોઇ દંપતિ ગભરાઇ ગયા હતા અને બાદમાં ત્યાનાં રહેવાસીઓ આવી જતાં દીપડાને ભયાડયો હતો. તેમજ વધુમાં જણાવ્યું હતું કે, શરૂઆતમાં ફરવા જતા ત્યારે વીડિયો ના બનાવતા ત્યારે એક મિત્ર જે યુ-ટયુબર હતા તેમણે કહયું કે તમે ગુજરાતી છો તમે ગુજ્જુ નામ આપી વિડીયો બનાવવાનું શરૂ કરો ત્યારથી સોશ્યલ મીડિયામાં ચેનલ બનાવી વીડિયો મુકવાની શરૂઆત કરી હતી. જયારે વિડીયો બનાવી સોશ્યલ મીડિયામાં અપલોડ કરતા ત્યારે લોકોનો રીસપોન્સ ના મળતો બાદમાં જેમ જેમ ટ્રીપ કરી તેના વીડિયો મુકતા થયા ત્યારબાદ લોકોનો આવકાર મળતો રહયો અને આજે અમારી કાર લઇ બહાર નીકળી ત્યારે લોકો અમારી સાથે ફોટા પડાવે છે. માટે હવે કહી શકાય કે લોકો દ્વારા અમોને ખૂબ જ સારો આવકાર મળી રહયો છે.