સેલ્ફી લેવા જતા 71 વર્ષીય તબીબનો જીવ ગયો
બાળ રોગના નિષ્ણાંત સિનિયર તબીબ લોધીકા પાસે પરિવાર સાથે વાડીએ ગયા હતા ત્યારે સેલ્ફી લેવા જતા પગ લપસ્તા ચેક ડેમમાં ડૂબ્યાં : ઢેબર રોડ પર આવેલી ઓર્ચિડ હોસ્પિટલમાં ફરજ બજાવતા
રાજકોટના શ્રમજીવી સોસાયટી મેઈન રોડ પર રહેતા 71 વર્ષિય તબીબ પરિવાર સાથે લોધિકા પાસે આવેલ મોટાવડા ગામે તેમની વાડીએ ગયા હતા.ત્યારે ચેક ડેમ પાસે સેલ્ફી લેવા જતાં પગ લપસી જવાથી તેઓ ડેમમાં ખાબક્યા હતા.અને તેમનું ડૂબી જવાથી મોત થતા પરિવારમાં અરેરાટી મચી જવા પામી છે.
મળતી વિગત મુજબ શ્રમજીવી સોસાયટી ઢેબર રોડ પર મુકબંધીરોની સ્કૂલ પાસે મંત્રમ નામના મકાનમાં રહેતા ડો.જયેશભાઈ હેમરાજભાઈ ભૂત (ઉ.71) લોધિકા નજીક મોટાવડા ગામની સીમમાં આવેલ પોતાની વાડીએ પરિવાર સાથે ગયા હતાં.જયેશભાઈ ભૂત સાથે તેમનો તબીબ પુત્ર ડો.દર્શિત સહિતના પરિવારજનો ફાર્મ હાઉસ પર હતાં અને તબીબ વાડીએથી સાંજે વોકીંગમાં નીકળ્યા હતાં. મોડે સુધી જયેશભાઈ પરત નહીં આવતાં પરિવારજનોએ શોધખોળ કરતાં મોટાવડા ફાર્મ હાઉસ નજીક ચેક ડેમમાં જયેશભાઈ ડૂબી ગયા હોવાનું જાણવા મળતા તેમને તરવૈયાઓની મદદથી બહાર કાઢવામાં આવ્યા હતાં અને સારવાર માટે બેભાન હાલતમાં સિવિલ હોસ્પિટલે ખસેડવામાં આવ્યા હતાં. પરંતુ સારવાર મળે તે પૂર્વે જ તેમનું મોત થયું હતું.
બનાવ અંગે લોધિકા પોલીસની તપાસમાં જાણવા મળ્યું હતું કે, મૃતક જયેશભાઈ ભૂતને સંતાનમાં બે પુત્રો છે.એનએ તેઓ ઢેબર રોડ પર આવેલી ઓર્ચિડ હોસ્પિટલમાં બાલ રોગના નિષ્ણાંત હતા. જ્યારે તેમનો મોટો પુત્ર દર્શિત પણ ડોક્ટર છે.પરિવાર સાથે વાડીએ ગયેલા જયેશભાઇ સાંજે વોકીંગમાં નીકળ્યા બાદ નજીકમાં આવેલા ચેક ડેમ ઉપર ચાલીને જતાં હતાં અને પોતે સેલ્ફી લેવા માટે ગયા ત્યારે અકસ્માતે પગ લપસી જતાં તેઓ ચેક ડેમમાં પડયા હતાં અને ઉંડા પાણીમાં ગરક થઈ જતાં તેમનું મોત થયું હતું. ઘટનાથી મૃતકના પરિવાર અને તબીબ જગતમાં શોક વ્યાપી ગયો હતો.
