15 દિવસમાં દુષ્કર્મના 6 બનાવ ! ગૃહમંત્રીનું રાજીનામુ માંગતું આપ
ભાજપ સરકારના શાસનમાં બળાત્કારની ઘટનાઓમાં સતત વધારો : ‘આપ’ મહિલા વિંગ
રાજકોટ : રાજ્યમાં છેલ્લા 15 દિવસમાં જ દુષ્કર્મના 6 બનાવો બન્યા છે ત્યારે ગુજરાતમાં મહિલાઓ ઉપરના વધતાં જતાં અત્યાચારોને રોકવા માટે પગલાં લેવામાં સરકાર નિષ્ફળ નીવડી હોવાના આરોપ સાથે આમ આદમી પાર્ટીની મહિલા વિંગ દ્વારા રાજ્યના ગૃહમંત્રીનું રાજીનાનામાની માંગ સાથે અધિક જિલ્લા કેલક્ટરને આવેદનપત્ર પાઠવી વિરોધ વ્યક્ત કર્યો હતો.
આમ આદમી પાર્ટીના મહિલા વિંગના પ્રદેશના મહિલા પ્રમુખ રેશ્માબેન પટેલ, રાજકોટ શહેર પ્રમુખ દિનેશભાઈ જોશી, જિલ્લા પ્રમુખ તેજસભાઇ ગાજીપરા, લોકસભા પ્રભારી દિલિપસિંહ વાઘેલા, શહેર પ્રભારી સહદેવસિંહ સરવૈયા, મહિલા પ્રમુખ રાજલબેન ગઢવી, યુવા પ્રમુખ પિયુષ ભંડેરી, લીગલ સેલ પ્રમુખ એડવોકેટ આર. કે. બાબરીયા સહીત નેતાઓ અને મોટી સંખ્યામાં કાર્યકર્તાઓ દ્વારા રાજકોટ જિલ્લાઓમા કલેકટરના માધ્યમથી મુખ્યમંત્રીને આવેદનપત્ર આપી ગુજરાતની ભાજપ સરકાર નાગરિકોની સુરક્ષાને લઈને મિથ્યા-અહંકાર કરતી સતત જોવા મળે છે ત્યારે ભાજપ સરકારના (કુ)શાસનમાં મહિલાઓ પ્રત્યેના અપરાધમાં સતત ને સતત વધારો જ થતો જાય છે. વર્તમાન ગૃહમંત્રીના શાસનમાં તો અપરાધીઓ બેફામ બન્યા હોવાનો આરોપ લગાવવામાં આવ્યો હતો.
વધુમાં છેલ્લા પંદર દિવસમાં જ બળાત્કારની છ ગંભીર ઘટનાઓ સામે આવી છે. દાહોદ, સુરેન્દ્રનગર, મહેસાણા અને હવે ભાયલી (વડોદરા)માં 16 વર્ષની એક માસુમ દિકરી પર ગેંગરેપની ઘટના સામે આવી છે. આવી ઘટનાઓને કારણે ગુજરાતની દિકરીઓ-મહિલાઓ ખુબ જ ભય અને અસલામતીની લાગણી અનુભવી રહી છે ત્યારે ગૃહમંત્રીએ કાયદો અને વ્યવસ્થા સુધારવા ઉપર ધ્યાન આપવું જોઈએ, એને બદલે ગૃહમંત્રી ફાલતું નિવેદનો અને રીલ બનાવવામાં વ્યસ્ત હોવાનો આરોપ લગાવી રાજીનામાની માંગ કરવામાં આવી હતી.
