૪૨.૧. ડીગ્રીએ રાજકોટ ધખ્યુ : આજે પણ લૂ અનુભવાશે

-રાજકોટમાં ચૂંટણીનો ઓછો અને સૂર્યદેવતાનો ગરમાવો વધુ અનુભવાય છે
-મહારાષ્ટ્રના જેઉરમાં 43 ડિગ્રી તાપમાન : દેશમાં બીજા નંબરે રાજકોટ

• કેટલાક રાજ્યોમાં વરસાદ, કરા અને ધૂળની ડમરી ઉડવાની આગાહી

રાજકોટમાં લોકસભાની ચૂંટણીનો ગરમાવો ઓછો અનુભવાય છે પણ સુર્ય દેવતા કાળઝાળ છે અને આજે ૪૨.૧ ડીગ્રીએ રાજકોટ ધખી ગયું છે. તાપમાનની દ્રષ્ટીએ રાજકોટ દેશમાં બીજા નંબરે છે. મહારાષ્ટ્રના જેઉરમાં સૌથી વધુ ૪૩ ડીગ્રી નોંધાઈ છે. જ્યારે ઉત્તરપ્રદેશના પ્રયાગરાજમાં 40.6, રાજસ્થાનના ફલોદીમાં 41.4, મધ્યપ્રદેશના રતલામમાં 41 ડિગ્રી તાપમાન નોંધવામાં આવ્યું છે.

હવામાન વિભાગના જણાવ્યા અનુસાર, રાજસ્થાન, ગુજરાત, ઉત્તર પ્રદેશ, મધ્યપ્રદેશ, સૌરાષ્ટ્ર, કચ્છ, મધ્ય મહારાષ્ટ્ર, રાયલસીમા, તમિલનાડુ, પુડુચેરી, કરાઈકલ, માહે અને કેરળના ઘણા ભાગોમાં મહત્તમ તાપમાન 40-42 ડિગ્રી સેલ્સિયસ વચ્ચે છે. હજુ આગામી 24 કલાક દરમિયાન વાતાવરણ યથાવત્ રહેશે તેવું પણ જણાવાયું છે.

હવામાન વિભાગના જણાવ્યા અનુસાર કર્ણાટક, તમિલનાડુ, સૌરાષ્ટ્ર અને કચ્છમાં અલગ-અલગ સ્થળોએ 11 એપ્રિલ સુધી લૂ ચાલુ રહેશે. તે જ સમયે, બિહારમાં પણ ગરમીની અસર જોવા મળી રહી છે. આ સિવાય દિલ્હી સહિત દેશના અન્ય ભાગોમાં ગરમીની અસર જોવા મળી શકે છે પરંતુ લૂ નહીં હોય.

હવામાન વિભાગના જણાવ્યા અનુસાર, 13 અને 14 એપ્રિલે જમ્મુ અને કાશ્મીરમાં છૂટાછવાયા સ્થળોએ ભારે વરસાદ/બરફ પડવાની સંભાવના છે. હિમાચલ પ્રદેશ અને ઉત્તરાખંડમાં 13 એપ્રિલે છૂટાછવાયા કરા પડવાની શક્યતા છે. રાજસ્થાનમાં 13 એપ્રિલે ધૂળની ડમરીઓ અથવા તોફાન આવવાની શક્યતા છે.

10 એપ્રિલે મધ્યપ્રદેશ, છત્તીસગઢ, વિદર્ભમાં છૂટાછવાયા સ્થળોએ વરસાદ અને કરા પડવાની પણ સંભાવના છે. 13-16 એપ્રિલ દરમિયાન ઉત્તર પશ્ચિમ ભારતમાં હળવાથી મધ્યમ વરસાદ અને ગાજવીજ સાથે વરસાદ પડી શકે છે.