વોંકળા પર ખડકાયેલા વધુ ૪ ઝુંપડા તોડી પડાયા
મનપાની વાવડી ટીપી સ્કીમના પ્લોટમાં ખેતી થઈ રહી’તી: ટ્રાફિકને અસર થાય તે રીતે મુકાયેલા લોખંડના પાઈપ હટાવાયા
દિવાળીની રજા પડે તે પહેલાં જ મહાપાલિકાની ટીપી શાખાના બૂલડોઝરે એક્શનમાં આવી જઈને ગેરકાયદે દબાણો તોડી પાડ્યા છે. ખાસ કરીને સર્વેશ્વર ચોકમાં વોંકળા પરનો સ્લેબ તૂટી પડવાની ઘટના બન્યા બાદ સફાળા જાગી ઉઠેલા મનપા તંત્રએ વોંકળા પરના દબાણો દૂર કરવાનું શરૂ કર્યું છે. આવું જ ટીપી સ્કીમ નં.૨૪ (નાનામવા)ને લાગુ રસ્તા પર આવેલા વોંકળા ઉપર ૪ જેટલા ઝુંપડા બાંધી દેવાયા હોવાનું ધ્યાન પર આવતાં જ તાત્કાલિક તેને તોડી પડાયા હતા.
આ ઉપરાંત ટીપી સ્કીમ નં.૨૨ (રૈયા)ના અંતિમ ખઠડ નં.૫/૧ને લાગુ શાંતિ નિકેતન સોસાયટી (બે શેરી), અમૃત પાર્ક પાસે જાહેર રસ્તા પર વાહન વ્યવહારને અડચણ થાય તે રીતે લોખંડના પાઈપ ગોઠવી દેવામાં આવ્યા હોવાથી અહીં રહેતાં લોકોની હાલત ખરાબ થઈ ગઈ હતી. આ અંગેની ફરિયાદો મળતાં જ મહાપાલિકાએ પાઈપનું દબાણ દૂર કરાવ્યું હતું. અગાઉ પણ આ રીતે દબાણ કરાયું હતું ત્યારે પણ તોડી પડાયું હતું.
જ્યારે ટીપી સ્કીમ નં.૧૫ (વાવડી)ના પીજીવીસીએલ કચેરીથી આવાસ યોજના સુધીના ૧૮ મીટર ટીપી રોડ પર ફેન્સીંગ કરીને ખેતી શરૂ કરી દેવામાં આવી હોવાનું ધ્યાન પર આવતાં કાફલાએ દોડી જઈ તમામ દબાણ હટાવ્યું હતું. આ રીતે કુલ ૧૧૧૨૫ ચોરસ મીટર જમીન ખુલ્લી કરાવવામાં આવી હતી.
