રાજકોટ બેઠક ઉપર મંગળવારે 21 લાખ મતદારો નક્કી કરશે ઉમેદવારોનું ભાવિ
રાજકોટ : લોકસભા ચૂંટણીના ત્રીજા તબક્કામાં આગામી તા.7મીના રોજ મતદાન થનાર છે ત્યારે રાજકોટ લોકસભા ચૂંટણી જંગમાં મેદાને ઉતરેલા ભાજપ-કોંગ્રેસ સહીત 9 ઉમેદવારોનું 21 લાખથી વધુ મતદારો મંગળવારે ભાવિ નક્કી કરશે.લોકસભા ચૂંટણી માટે તંત્ર દ્વારા તમામ તૈયારીઓ પૂર્ણ કરી લેવામાં આવી છે જેમાં સોમવારે 2236 મતદાન મથકો ઉપર 13 હજાર કર્મચારીઓ ચૂંટણી મોરચો સંભાળી લેશે.
સોમવારે રાજકોટ લોકસભા બેઠકના 2236 મતદાન મથકોનો કબ્જો સંભાળશે 13 હજાર કર્મચારીઓ
રાજકોટ જિલ્લા ચૂંટણી અધિકારી દ્વારા ચૂંટણી સ્ટાફને તા.6ને સોમવારના સવારના 7 કલાકે વિધાનસભા વિસ્તારોના ઈવીએમ ડીસ્પેચીંગ -રીસીવીંગ સેન્ટરો પર પહોંચી જવા આદેશ અપાયા છે. દરમિયાન શુક્રવારે અને શનિવારે જિલ્લા કલેકટર અને જીલ્લા ચૂંટણી અધિકારી પ્રભવ જોશી અને પોલીસ કમિશનર રાજુ ભાર્ગવ સહિતના ઉચ્ચ અધિકારીઓ દ્વારા મતદાન મથકોની ચકાસણી કરવામાં આવી હતી. રાજકોટ લોકસભા બેઠક વિસ્તારના કુલ 2112273 મતદારો નોંધાયા છે. જેમાં 1093626 પુરૂષ મતદારો, 1018611 મહિલા મતદારો અને 36 થર્ડ જેન્ડર મતદારોનો સમાવેશ થાય છે.
રાજકોટ લોકસભા બેઠકમાં સમાવિષ્ઠ મતક્ષેત્રમાં વિધાનસભા વિસ્તાર મુજબ મતદારોની સંખ્યા જોઈએ તો ટંકારા-પડધરીમાં 2,52,355, વાંકાનેરમાં 2,87,559, રાજકોટ ઈસ્ટમાં 3,03,897, રાજકોટ વેસ્ટમાં 3,61,289, રાજકોટ સાઉથમાં 2,58,657, રાજકોટ ગ્રામ્યમાં 3,85,681 અને જસદણ વિધાનસભા વિસ્તારમાં 2,62,835 મતદારોની સંખ્યા રહેલી છે. રાજકોટ બેઠકની આ ચૂંટણી માટે 2236 જેટલા મતદાન બુથો નિયત કરવામાં આવેલ છે.જે પૈકી 1032 મતદાન મથકો સંવેદનશીલ જાહેર કરવામાં આવેલ છે.
રાજકોટ લોકસભા બેઠકના મતદાન મથકો માટે 3602 બીયુ, 2976 ડીયુ અને 3489 વીવીપેટની ફાળવણી અગાઉ કરી દેવામાં આવી હતી. આ વખતે કાળઝાળ ગરમી અને લૂં વરસી રહી હોય આ આકરા તાપની મતદાનની ટકાવારી પર અસર પડવાની સંભાવના રહેલી હોય જીલ્લા ચૂંટણી તંત્ર દ્વારા મતદાન બુથો પર મતદારોને ગરમી સામે રક્ષણ આપવા માટે ચૂંટણીપંચની ગાઈડલાઈન મુજબ 1036 મતદાન બુથો પર મંડપ નાખી છાંયડાની સુવિધા ઉપલબ્ધ કરવામાં આવી છે તેમજ 200 જેટલા મતદાન મથકો પર કુલરો મુકવાનું પણ વહીવટી તંત્ર દ્વારા આયોજન કરવામાં આવેલ છે.
લોકસભા ચૂંટણી શાંતિપૂર્ણ રીતે યોજાય અને કોઈ અનિચ્છનીય બનાવ ન બને તે માટે વહીવટી તંત્ર પરિસ્થિતિ ઉપર ચાંપતી નજર રાખી રહ્યું છે. જેમાં આ વખતે ક્ષત્રિય આંદોલન સહિતના મુદ્દે રાજકોટ લોકસભા બેઠક વિસ્તારના સંવેદનશીલ મતદાન બુથોની સંખ્યામા વધારો થવા પામેલ છે. આવા બુથોની સંખ્યા 1036 જેટલી જાહેર કરવામાં આવી છે. આ સંવેદનશીલ મતદાન બુથો પર પરામીલેટ્રી ફોર્સનો વિશેષ બંદોબસ્ત મુકવાનું આયોજન ઘડી કાઢવામાં આવેલ છે. આ ઉપરાંત મતદાનના દિવસે પણ આવા બુથો ઉપર વિશેષ સુરક્ષા વ્યવસ્થા ઉભી કરવામાં આવનાર છે. સાથે જ ચૂંટણી સ્ટાફના અંતિમ રેન્ડેમાઈઝેશન બાદ આગામી તા.6ને સોમવારના કર્મચારીઓ ઈવીએમ મશીનો સાથે મતદાન મથકોએ મોકલી અપાશે.
