AIની મદદથી યુવતીઓના અશ્લીલ વીડિયો બનાવતો હતો, આરોપી પોલીસ પુત્ર જ નિકળ્યો

Thu, August 24 2023

મુંબઈને અડીને આવેલા વસઈમાંથી એક ચોંકાવનારો કિસ્સો સામે આવ્યો છે. અહીં એક યુવક આર્ટિફિશિયલ ઈન્ટેલિજન્સ (AI)ની મદદથી યુવતીઓની અશ્લીલ તસવીરો અને વીડિયો બનાવતો હતો. આ પછી તે આ તસવીરો અને ફોટા વાયરલ કરવાની ધમકી આપીને યુવતીઓનું યૌન શોષણ કરવાનો પ્રયાસ કરતો હતો. આરોપી યુવક પોલીસ અધિકારીનો પુત્ર છે. આ મામલો વસઈના કલંબ ગામનો છે.

આ મામલામાં પીડિતાના પરિવારજનો જ્યારે આરોપીના ઘરે પહોંચ્યા ત્યારે તણાવ વધી ગયો હતો. જેથી આરોપીના પરિવારજનોએ પીડિતાને માર માર્યો હતો. આ અંગેની જાણ થતાં ગ્રામજનોમાં રોષ ફાટી નીકળ્યો હતો. ગ્રામજનોએ પોલીસને ઘેરી લીધી હતી. તેમણે કહ્યું કે જ્યાં સુધી આરોપીની ધરપકડ નહીં થાય ત્યાં સુધી પોલીસ સામે વિરોધ ચાલુ રહેશે.

પીડિતાનો આરોપ છે કે આરોપી યુવક વોટ્સએપ સ્ટેટસ, ફેસબુક, ઈન્સ્ટાગ્રામ પરથી લોકોના ફોટા કાઢતો હતો અથવા નજીકની જાણીતી યુવતીઓના નંબર પર ગંદા વીડિયો મોકલીને બ્લેકમેલ કરતો હતો.

3 વર્ષ પહેલા પણ ગંદી હરકત કરી હતી

આરોપીએ 3 વર્ષ પહેલા પણ આવું જ ગંદું કૃત્ય કર્યું હતું, પરંતુ તે સમયે તે સગીર હતો, તેથી તેનો બચાવ થયો હતો. હવે 3 વર્ષ બાદ આરોપી છોકરાએ ફરી આવું કૃત્ય કર્યું છે. જેના કારણે લોકોમાં ભારે રોષ જોવા મળી રહ્યો છે. આ કેસમાં જ્યારે એક યુવતી આરોપીની પૂછપરછ કરવા ગઈ તો આરોપીએ તેની સાથે બળાત્કાર કરવાનો પ્રયાસ કર્યો અને મારપીટ પણ કરી.

ઘટના બાદ આરોપી પાછલા દરવાજેથી ભાગી ગયો હતો. જેનાથી રોષે ભરાયેલા નાગરિકોએ આખી રાત અર્નાળા પોલીસ સ્ટેશનમાં હોબાળો મચાવ્યો હતો અને જ્યાં સુધી આરોપીઓની ધરપકડ ન થાય ત્યાં સુધી આંદોલન ચાલુ રાખવા જણાવ્યું હતું.

આરોપી પોલીસ અધિકારીનો પુત્ર છે

નાગરિકોનો આક્ષેપ છે કે અર્નાલા પોલીસે આરોપી સામે કાર્યવાહી કરી નથી કારણ કે તેના પિતા મુંબઈ પોલીસમાં નોકરી કરતા હતા. આ મામલે અર્નાલા પોલીસે યુવક વિરુદ્ધ ગુનો નોંધ્યો છે પરંતુ હજુ સુધી કોઈની ધરપકડ થઈ નથી. અધિકારીઓનું કહેવું છે કે પોલીસકર્મીના પુત્ર હોવાના કારણે કોઈ છૂટ આપવામાં આવશે નહીં અને તે મામલે કાયદા અનુસાર કાર્યવાહી કરવામાં આવશે.