સુપ્રીમ કોર્ટમાં સીબીઆઇ એ કરી અરજી, લાલુની મુશ્કેલી વધી શકે છે

રાજદના સુપ્રીમો લાલુ પ્રસાદ યાદવની ઘાસચારા કૌભાંડ મામલામાં મુશ્કેલી વધી શકે છે. તેમને આ કૌભાંડમાં ઝારખંડ હાઈકોર્ટમાંથી જામીન મળી ગયા હતા, ત્યારે હવે તેમને મળેલા જામીન સામે સુપ્રીમ કોર્ટમાં અરજી દાખલ કરવામાં આવી છે. આ અરજી સીબીઆઈ દ્વારા દાખલ કરવામાં આવી છે, જેની સુનાવણી હવે 25 ઓગસ્ટે થવાની છે.

સીબીઆઈ એ લાલુ પ્રસાદ યાદવના જામીન રદ કરવા માટે સુપ્રીમ કોર્ટમાં અરજી કરીને વહેલી સુનાવણીની માંગ કરી છે. સુપ્રીમ કોર્ટે પણ તેની સુનાવણી કરવા સંમતિ આપી છે અને તેની સુનાવણી 25 ઓગસ્ટે થશે. જો સુપ્રીમ કોર્ટ સીબીઆઈ ની તરફેણમાં ચુકાદો આપે છે તો આગામી દિવસોમાં લાલુને ફરી જેલમાં જવું પડી શકે છે. ગયા વર્ષે એપ્રિલમાં આરજેડી સુપ્રીમોને ઝારખંડ હાઈકોર્ટમાંથી જામીન મળ્યા હતા. 30 એપ્રિલ 2022ના રોજ તેને જેલમાંથી મુક્ત કરવામાં આવ્યા હતા. ચારા કૌભાંડ સંબંધિત ડોરાન્ડા ટ્રેઝરી કેસમાં તે લગભગ ત્રણ વર્ષથી જેલમાં રહ્યા હતા.

ઘાસચારા કૌભાંડ વર્ષ 1990થી 1995 સુધીનું છે. આરોપ છે કે લાલુ યાદવ જ્યારે સત્તામાં હતા ત્યારે ડોરાન્ડા અને અન્ય તિજોરીમાંથી કરોડો રૂપિયા કાઢવામાં આવ્યા હતા. આ રૂપિયા ઉપાડીને પશુઓના ચારા અને અન્ય ખર્ચની નકલી વિગતો દર્શાવવામાં આવી હતી. લાલુ યાદવ પર ઘાસચારા કૌભાંડ સાથે જોડાયેલા ઘણા કેસ ચાલી રહ્યા છે. તેમાંથી પાંચ કેસમાં તેને દોષિત ઠેરવવામાં આવ્યા છે. જેના કારણે લાલુ યાદવને જેલમાં જવું પડ્યું હતું. જો કે ગયા વર્ષે એપ્રિલમાં તેમને સ્વાસ્થ્યના કારણોસર જામીન આપવામાં આવ્યા હતા. જામીન પર છૂટ્યા બાદ લાલુએ ડિસેમ્બરમાં સિંગાપોરમાં કિડની ટ્રાન્સપ્લાન્ટ પણ કરાવ્યું હતું.