યુએનમાં પાકિસ્તાની વડાપ્રધાનના દાવાઓ સામે ભારતીય રાજદ્વારીનું રહસ્યમય હાસ્ય ચર્ચાના કેન્દ્રમાં

સંયુક્ત રાષ્ટ્ર મહાસભા (UNGA)નું મંચ ફરી એકવાર ભારત અને પાકિસ્તાન વચ્ચેના વૈચારિક અને રાજદ્વારી સંઘર્ષનું સાક્ષી બન્યું છે. જ્યારે પાકિસ્તાની વડાપ્રધાન આંતરરાષ્ટ્રીય મંચ પરથી પોતાના દેશની તરફેણમાં પાયાવિહોણા કથનો રજૂ કરી રહ્યા હતા, ત્યારે કોઈ પણ તીખા શબ્દો બોલ્યા વગર ભારતીય પ્રતિનિધિમંડળે પોતાની દેહબોલીથી વૈશ્વિક સ્તરે ધ્યાન ખેંચ્યું. પાકિસ્તાનના ભાષણ દરમિયાન ભારતીય પ્રતિનિધિના ચહેરા પર છવાયેલા હળવા કટાક્ષભર્યા સ્મિતે સોશિયલ મીડિયાથી લઈને વૈશ્વિક કૂટનીતિના વર્તુળોમાં ભારે ચર્ચા જગાવી છે.

ભાષણ દરમિયાન કેમેરામાં કેદ થયેલું ભારતીય સ્મિત

સંયુક્ત રાષ્ટ્ર મહાસભામાં પાકિસ્તાનના વડાપ્રધાન શાહબાઝ શરીફે પોતાના સંબોધન દરમિયાન મે 2025ના ભારત સાથેના સંઘર્ષમાં પાકિસ્તાનની કથિત “જીત”ની વાતો વહેતી મૂકી હતી. શરીફ જ્યારે આ પાયાવિહોણા દાવાઓ, સિંધુ જળ સંધિ અને કાશ્મીર રાગ આલાપી રહ્યા હતા, બરાબર તે જ પળે કેમેરાની નજર ભારતીય રાજદ્વારી આર. શ્રીનિવાસ પર પડી હતી. પાકિસ્તાની પક્ષના અવાસ્તવિક દાવાઓને સાંભળીને આર. શ્રીનિવાસનું હળવું સ્મિત અને હસવાની પ્રતિક્રિયા વીડિયોમાં કેદ થઈ ગઈ હતી, જે જોતજોતામાં વૈશ્વિક પ્લેટફોર્મ્સ પર વાયરલ બની ગઈ.

અમેરિકી હસ્તક્ષેપના દાવા અને ભારતનું સત્તાવાર વલણ

પોતાના ભાષણમાં શાહબાઝ શરીફે અમેરિકાના રાષ્ટ્રપતિ ડોનાલ્ડ ટ્રમ્પના રોલને આગળ ધરીને એવો દાવો કર્યો હતો કે બંને પરમાણુ સંપન્ન દેશો વચ્ચે યુદ્ધ અટકાવવામાં તેમનો સમયસરનો હસ્તક્ષેપ નિર્ણાયક રહ્યો હતો. જોકે, ભારતે આ વાતને સંપૂર્ણપણે નકારીને સ્પષ્ટ કર્યું છે કે 10 મે, 2025ના રોજ લશ્કરી કાર્યવાહી અટકાવવાનો નિર્ણય બંને દેશોની સીધી વાતચીતનું પરિણામ હતો અને તેમાં કોઈ ત્રીજા પક્ષની મધ્યસ્થતા નહોતી. હકીકતમાં પાકિસ્તાનના DGMO એ ભારતીય સમકક્ષ સામે સૈન્ય કાર્યવાહી રોકવાની વિનંતી કરી હતી.

આ પણ વાંચો: સુરેન્દ્રનગરના દસાડા-શંખેશ્વર હાઈવે પર ભયાનક અકસ્માત: ઊભેલા ટ્રક પાછળ કાર ઘૂસતાં 2નાં મોત, બચવા ભાગેલા ક્લિનરનું ખેતરના ઝાટકા વાયરે કરંટ લાગતાં મૃત્યુ

ભારતનો ‘રાઇટ ટુ રિપ્લાય’: આતંકવાદ અને લોકશાહીના દંભ પર આકરા પ્રહારો

શરીફના સંબોધન બાદ સંયુક્ત રાષ્ટ્રમાં ભારતના કાયમી મિશનના ફર્સ્ટ સેક્રેટરી પેટલ ગેહલોતે ‘રાઇટ ટુ રિપ્લાય’ હેઠળ પાકિસ્તાનને આડે હાથ લીધું હતું. તેમણે યાદ અપાવ્યું કે જ્યારે વિશ્વ 9/11 આતંકવાદી હુમલાની 25મી વર્ષગાંઠને યાદ કરી રહ્યું છે, ત્યારે ભૂલવું ન જોઈએ કે તેનો મુખ્ય સૂત્રધાર ઓસામા બિન લાદેન પાકિસ્તાનની મુખ્ય મિલિટરી એકેડેમીની નજીક જ આશરો લઈ રહ્યો હતો. જે સૈન્ય સંસ્થાનો શરીફ આદરભાવ વ્યક્ત કરી રહ્યા છે, તેની વાસ્તવિકતા આખી દુનિયા જાણે છે.

પાકિસ્તાનની સૈન્ય પ્રભાવિત વ્યવસ્થાની ખુલ્લી પોલ

ભારતીય પ્રતિનિધિએ પાકિસ્તાનની આંતરિક લોકશાહીની સ્થિતિ પર પણ સણસણતો જવાબ આપ્યો હતો. તેમણે પાકિસ્તાનને તેના પોતાના લોકો દ્વારા ઓળખાવાતી “ફોર્મ 47 સરકાર” તરીકે સંબોધતા કહ્યું કે, જે દેશની રાજધાનીમાં પોતાના જ નાગરિકો વિરુદ્ધ કડક સુરક્ષા ઘેરો નાખવામાં આવ્યો હોય, તે શાસન બીજાને લોકશાહી અને માનવીય મૂલ્યોના ઉપદેશ ન આપી શકે. તેમણે પાકિસ્તાની શાસન વ્યવસ્થાને “સેનાનું, સેના દ્વારા અને સેના માટેનું શાસન” ગણાવીને તેના દંભી વલણની વૈશ્વિક મંચ પર પોલ ખોલી નાખી.

આ સમગ્ર ઘટનાક્રમ દર્શાવે છે કે આંતરરાષ્ટ્રીય પ્લેટફોર્મ પર તથ્યોને તોડીમરોડીને રજૂ કરવાના પાકિસ્તાનના પ્રયાસો સામે ભારતે શબ્દો અને અર્થપૂર્ણ મૌન બંને વડે મજબૂત રાજદ્વારી પક્કડ જાળવી રાખી છે. વૈશ્વિક સમુદાય સમક્ષ પાકિસ્તાનની આંતરિક સ્થિતિ અને આતંકવાદ પ્રત્યેના તેના ઈતિહાસને ભારતે પુરાવા સાથે પુનઃ રેખાંકિત કર્યો છે.