રાજઘાટ પર એક મિનિટનું મૌન પાળી જી-20ના નેતાઓએ મહાત્મા ગાંધીને આપી શ્રદ્ધાંજલિ
જી-20 સમિટમાં ભાગ લેવા આવેલા નેતાઓ રવિવારે સવારે મહાત્મા ગાંધીની સમાધિ રાજઘાટ પર પહોંચ્યા હતા. વડા પ્રધાન નરેન્દ્ર મોદી તેમના આગમન પહેલા જ રાજઘાટ પર હાજર હતા. તેમણે તમામ નેતાઓને ખાદીની શાલ ઓઢાડી સ્વાગત કર્યું હતું.
રાજઘાટ ઉપર પહોચેલા નેતાઓમાં અમેરિકાના રાષ્ટ્રપતિ જો બાઈડન, બ્રિટિશ વડા પ્રધાન ઋષિ સુનક ,ઑસ્ટ્રેલિયાના વડા પ્રધાન એન્થોની અલ્બેનિસ, કેનેડાના વડા પ્રધાન જસ્ટિન ટ્રુડો, રશિયાના વિદેશ પ્રધાન સર્ગેઈ લવરોવ યુએનના મહાસચિવ એન્ટોનિયો ગુટેરેસ, વિશ્વ બેંકના પ્રમુખ અજય બંગા, વિશ્વ આરોગ્ય સંસ્થા (ડબ્લ્યુએચઓ)ના ડાયરેક્ટર જનરલ ટેડ્રોસ અધાનમ, એશિયન ડેવલપમેન્ટ બેંકના પ્રમુખ માસાત્સુગુ આસાકાવા, આઈએમએફના મેનેજિંગ ડિરેક્ટર ક્રિસ્ટલિના જ્યોર્જિવાનો સમાવેશ થતો હતો. આ ઉપરાંત યુનાઈટેડ મેક્સિકન સ્ટેટ્સના ઈકોનોમી મિનિસ્ટર રાક્વેલ બ્યુનોસ્ટ્રો સાંચેઝ દિલ્હીના રાજઘાટ પર મહાત્મા ગાંધીને શ્રદ્ધાંજલિ આપવા અને પુષ્પાંજલિ અર્પણ કરવા પહોંચ્યા હતા.સ્પેનના ઉપરાષ્ટ્રપતિ નાદિયા કેલ્વિનો, સિંગાપોરના વડા પ્રધાન લી સિએન લૂંગ, નેધરલેન્ડના વડા પ્રધાન માર્ક રુટ્ટે, મોરેશિયસના વડા પ્રધાન પ્રવિંદ કુમાર જુગનાથ, ઇજિપ્તના રાષ્ટ્રપતિ અબ્દેલ ફતાહ અલ-સીસી, બાંગ્લાદેશના વડા પ્રધાન શેખ હસીના અને અન્ય ઘણા નેતાઓ રાજઘાટ પહોંચ્યા હતા.
