રણમાં પૂરની સ્થિતિ ક્યાં સર્જાઇ ? જુઓ
દુબઈની શું હાલત થઈ ?
આંધી-તોફાન અને ભારે વરસાદને લીધે યુનાઇટેડ આરબ અમીરાત અને તેની આસપાસના વિસ્તારોમાં સ્થિતિ વધુ બગડી ગઈ હતી. દુબઈની હાલત સૌથી વધુ ખરાબ થઈ ગઈ હતી. ભારે વરસાદ પડતા અનેક શહેરોમાં પાણી ભરાયા હતા અને તેના લીધે સમગ્ર દુબઈમાં કેટલાય લોકોએ રસ્તા પર વાહનો છોડી દીધા હતા. જ્યારે ઓમાનમાં ભારે વરસાદના લીધે આવેલા પૂરનો મૃત્યુઆંક ૧૮નો થયો હતો. દુબઈમાં 45 ફ્લાઇટો પ્રભાવિત થઈ હતી. સડકો તો જાણે નદીઓમાં ફેરવાઇ ગઈ હતી.
દુબઈ ઇન્ટરનેશનલ એરપોર્ટ પર પણ પાણી ભરાયા હતા. પ્લેનોએ રીતસરનું પાણીમાં લેન્ડિંગ કરવું પડ્યું હતું. દુબઈ એરપોર્ટને વિશ્વનું અત્યંત વ્યસ્ત એરપોર્ટ માનવામાં આવે છે. દુબઈની ગલીઓ પાણીથી ભરાઈ ગઈ હતી. આકાશમા વીજળીના ચમકારા થયા હતા. અને વિશ્વના સૌથી ઊંચા બિલ્ડિંગ બુર્જખલીફા પરથી વારંવાર વીજળી પસાર થતી હોય તેવું જોવા મળ્યું હતું.
ભારે વરસાદના લીધે સમગ્ર યુએઇની બધી સ્કૂલો બંધ રાખવાની ફરજ પડી છે. સરકારી કર્મચારી અને ખાનગી કર્મચારીઓએ પણ રિમોટ વર્કિંગ કરવુ પડયુ છે. કેટલાય લોકોએ ઘરની બહાર બિનજરુરી નીકળવાનું ટાળ્યું છે. ગલીઓ, રસ્તાઓ અને હાઇવે પાણીથી ભરાયેલા છે. દુબઈમાં વરસાદની સંભાવના નહીવત હોવાથી અહીં પૂરના પાણી માટે કોઈ જ આયોજન કરાયું નથી. આ બધી બાબતો હવે શહેરી આયોજનમાં નડી રહી છે.
દુબઈ સહિતના શહેરોની આ સ્થિતિના વિડીયો ખૂબ જ વાયરલ થયા હતા. સેંકડો કાર અને બિલ્ડિંગો પાણીમાં ડૂબેલા દેખાયા હતા. મંગળવારે તો કેટલાક શહેરોમાં બરફના કરા પણ પડ્યા હતા.
