અમેરિકામાં ભારતીય યુવક સાથે શું બની ઘટના ? વાંચો
અમેરિકામાં તેલંગણાના સ્ટુડન્ટની હત્યા
પેટ્રોલ પંપ પર નોકરી કરતો હતો:હુમલાખોરોએ ગોળીઓ ધરબી દીધી
અમેરિકામાં ભારતીયો પર હુમલા થઈ રહ્યા છે અને હત્યાનો સિલસિલો ચાલુ જ રખાયો છે. શિકાગોમાં ફરીવાર ભારતીય વિદ્યાર્થીની ગોળી મારી હત્યા કરવામાં આવી હતી. તે પેટ્રોલ પંપ પર પાર્ટ ટાઇમ જોબ કરતો હતો. કામ દરમિયાન પેટ્રોલ પંપ પર હથિયારબંધ લોકોએ તેલંગાણાના વિદ્યાર્થીને ગોળી મારી હતી. મૃતકની ઓળખ 22 વર્ષીય સાઇ તેજા નુકારાપુના રૂપમાં થઇ છે.
બીઆરએસ નેતા મધુસૂદનના જણાવ્યા અનુસાર, સાઇ તેજાની હત્યાના સમાચાર મળ્યા બાદ તે તેલંગાણાના ખમ્મમ જિલ્લામાં પહોંચ્યા હતા જ્યાં તેમણે મૃતકના માતા-પિતા સાથે મુલાકાત કરી હતી. આ દરમિયાન મૃતકના માતા-પિતાએ ખુલાસો કર્યો કે સાઇ તેજાની ગોળી મારીને હત્યા કરવામાં આવી ત્યારે તે ડ્યૂટી પર ન હતો, પરંતુ તે પોતાના એક મિત્રની મદદ કરી રહ્યો હતો.
મિત્રએ સાંઇને ડ્યૂટી પર રોકાવવાનો અનુરોધ કર્યો હતો. બીઆરએસ નેતા મધુસૂદને કહ્યું કે તેમણે આ મુદ્દે મદદ માટે તેલુગુ એસોસિએશન ઓફ નોર્થ અમેરિકા (ટીએએનએ) ના સભ્યો સાથે વાત કરી છે. ભારતીય સ્ટુડન્ટ જોખમમાં છે તે વાતમાં કોઈ શંકા નથી.
બીજી તરફ શિકાગોમાં ભારતના કોન્સ્યુલેટ જનરલે દોષીઓના વિરૂદ્ધ તાત્કાલિક કાર્યવાહીની માંગ કરી છે. તેમણે કહ્યું કે તે પીડિતના પરિવારને દરેક સંભવ મદદ કરશે. શિકાગોમાં ભારતના કોન્સ્યુલેટ જનરલે એક્સ પર પોસ્ટમાં કહ્યું કે ‘અમે ભારતીય વિદ્યાર્થી નુકારાપુ સાંઇ તેજાની હત્યાથી સ્તબ્ધ અને એકદમ દુખી છીએ. અમે દોષીઓ વિરૂદ્ધ તાત્કાલિક કાર્યવાહીની માંગ કરીએ છીએ. વાણિજ્ય દૂતાવાસ પીડિતના પરિવાર અને મિત્રોને મદદ કરશે.’
