બર્મુડા ટ્રાયંગલનું રહસ્ય અકબંધ: મિયામી પરત ફરતું વિમાન ક્રેશ થતાં દંપતી અને બે પૌત્રોના મોત

દુનિયાના સૌથી મોટા રહસ્યોમાંના એક ગણાતા બર્મુડા ટ્રાયંગલના પ્રદેશમાં વધુ એક દર્દનાક દુર્ઘટના સામે આવી છે. ફ્લોરિડાથી બહામાસ ગયેલો એક પરિવાર જ્યારે પરત ફરી રહ્યો હતો, ત્યારે તેમનું વિમાન રહસ્યમય સંજોગોમાં ક્રેશ થઈ ગયું હતું, જેમાં ચારેય સભ્યોના જીવ ગયા છે.

બહામાસથી મિયામી પરત ફરતી વખતે વિમાન ગુમ

ફ્લોરિડાનું એક દંપતી અને તેમના બે પૌત્ર-પૌત્રીઓ ૫ સીટર પાઇપર પીટી-૩૪ વિમાનમાં સવાર થઈને બહામાસના ગ્રેટ હાર્બર કેથી સોમવારે સવારે ૧૧:૧૫ વાગ્યે મિયામી એક્ઝિક્યુટિવ એરપોર્ટ જવા માટે રવાના થયા હતા. રસ્તામાં અચાનક આ વિમાનનો એર ટ્રાફિક કંટ્રોલ (ATC) સાથેનો સંપર્ક તૂટી ગયો હતો અને તે રહસ્યમય રીતે ગાયબ થઈ ગયું હતું.

80 વર્ષીય અનુભવી પાયલટ અને પરિવારની ઓળખ

રોયલ બહામાસ પોલીસ ફોર્સના જણાવ્યા અનુસાર, આ વિમાન ૮૦ વર્ષીય અનુભવી પાયલટ માલિયો લમાર ચલાવી રહ્યા હતા, જેમની પાસે ૪૦ વર્ષનો લાંબો ઉડ્ડયનનો અનુભવ હતો. તેમની સાથે તેમની ૭૯ વર્ષીય પત્ની લિલી લમાર તેમજ તેમના યુવાન પૌત્ર-પૌત્રીઓ સોફી સોસા (૨૮) અને ક્રિશ્ચિયન સોસા (૨૨) પણ સવાર હતા. આખો પરિવાર બહામાસમાં લેબર ડે વીકેન્ડ મનાવીને પોતાના ઘરે પરત ફરી રહ્યો હતો.

આ પણ વાંચો: ગુજરાતમાં ચોમાસાનો વધુ એક સક્રિય રાઉન્ડ: 12 થી 15 સપ્ટેમ્બર ભારે વરસાદની આગાહી

અંદ્રોસ આયલેન્ડ પાસેથી મળ્યા મૃતદેહ

વિમાનનો સંપર્ક તૂટ્યા બાદ પરિવારે તાત્કાલિક સત્તાવાળાઓને જાણ કરી હતી. મંગળવારે બહામાસના સૌથી મોટા ટાપુ એંદ્રોસ (અંદ્રોસ) નજીક આ વિમાન ક્રેશ થયેલી હાલતમાં મળી આવ્યું હતું. દુઃખદ બાબત એ રહી કે પરિવારે પોતાની હોડીઓની મદદથી સ્વજનોના પાર્થિવ દેહને બહાર કાઢ્યા હતા.

બર્મુડા ટ્રાયંગલનું જૂનું અને અણઉકેલાયેલું રહસ્ય

આ દુર્ઘટનાએ ફરી એકવાર બર્મુડા ટ્રાયંગલના રહસ્યોને તાજા કરી દીધા છે. આ એવો કુખ્યાત પ્રદેશ છે જ્યાં ભૂતકાળમાં પણ અનેક વિમાનો અને જહાજો કોઈ પણ સ્પષ્ટ કારણ વગર અચાનક ગાયબ થયા છે, જે વૈજ્ઞાનિકો માટે પણ આજદિન સુધી એક વણઉકેલાયેલું કોયડો બન્યો છે.

એક જ પરિવારના ચાર સભ્યોના આકસ્મિક મૃત્યુથી સમગ્ર વિસ્તારમાં શોકનું મોજુ ફરી વળ્યું છે. બર્મુડા ટ્રાયંગલની આ ઘટનાએ ફરી એકવાર આ ક્ષેત્રમાંથી પસાર થતી વખતે થતી વિમાની મુસાફરીની સુરક્ષા સામે મોટા સવાલો ખડા કર્યા છે.