અમેરિકામાં 46.3 કરોડ ડોલરનું મેડિકલ કૌભાંડઃ ભારતીય મૂળના મિનલ પટેલને 27 વર્ષની જેલ

જ્યોર્જિયામાં લેબસોલ્યુશન નામની કંપનીના માલિકને લગભગ ત્રણ દાયકા જેલમાં કાઢવા પડશે.

અમેરિકા જઈને ઘણા ભારતીયોએ પોતપોતાના ફિલ્ડમાં સિદ્ધિ મેળવી છે, પરંતુ કેટલાક ભારતીયોએ ગોટાળા કરીને દેશનું નામ પણ ડુબોળ્યું છે. તાજેતરમાં અમેરિકાના જ્યોર્જિયા રાજ્યમાં ભારતીય મૂળના એક લેબોરેટરી માલિકે મોટું કૌભાંડ કર્યું હોવાથી તેને 27 વર્ષની જેલની સજા ફટકારવામાં આવી છે. લેબસોલ્યુશન નામની કંપનીના માલિક મિનલ પટેલ સામે ગુનો સાબિત થયો છે અને તેમણે લગભગ ત્રણ દાયકા જેલમાં કાઢવા પડશે. મિનલ પટેલ દ્વારા છેલ્લા ત્રણ વર્ષથી અમેરિકામાં એક જિનેટિક ટેસ્ટિંગ કૌભાંડ ચાલી રહ્યું હતું જેમાં 46.3 કરોડ ડોલરની ગરબડ થઈ છે.

મિનલ પટેલની કંપની સામે આરોપ છે કે તેણે દર્દીઓને જરૂરી ન હોય તેવા જિનેટિક ટેસ્ટિંગ કરાવીને મેડિકેર સાથે 46.3 કરોડ ડોલરની છેતરપિંડી કરી છે. આવા ટેસ્ટ કરાવવા માટે લાંચ રિશ્વત પણ આપવામાં આવી હતી.

મિનલ પટેલે કઈ રીતે કૌભાંડ કર્યું?

44 વર્ષના મિનલ પટેલે પેશન્ટના બ્રોકર્સ, ટેલિમેડિસિન કંપનીઓ અને કોલ એજન્ટ સાથે સાંઠગાંઠ કરી હતી. તેમણે મેડિકેરના લાભાર્થીઓને ટેલિમાર્કેટિંગ કોલ કરીને જણાવ્યું હતું કે તેમના પેકેજમાં મોંઘાદાટ કેન્સર જિનેટિક ટેસ્ટ પણ કવર થઈ જાય છે. મેડિકેરના લાભાર્થીઓ જ્યારે ટેસ્ટ કરાવવા માટે તૈયાર થાય ત્યાર પછી મિનલ પટેલ આવા દર્દીઓના દલાલોને લાંચ આપતો હતો. તેના બદલામાં દલાલો ડોક્ટરના સહી કરાયેલા ઓર્ડર લઈ આવતા હતા જેના આધારે ટેલિમેડિસિન કંપનીઓને ટેસ્ટ કરવાની ઓથોરિટી મળતી હતી.

પોતાના કૌભાંડો છુપાવવા માટે મિનલ પટેલ આવા દર્દીઓના બ્રોકર્સ પાસે એક કોન્ટ્રાક્ટ પર સહી કરાવતો હતો જેમાં તેઓ ખોટી રીતે જણાવતા હતા કે તેઓ લેબસોલ્યુશન્સ માટે કાયદેસરની એડવર્ટાઈઝિંગ સર્વિસ આપી રહ્યા છે. જુલાઈ 2016થી ઓગસ્ટ 2019 દરમિયાન લેબસોલ્યુશન્સે મેડિકેર સમક્ષ લગભગ 46.3 કરોડ ડોલરના ક્લેમ મુક્યા હતા. તેમાં મેડિકલી જરૂરી ન હોય તેવા લાખો જિનેટિક ટેસ્ટ પણ કરાવ્યા હતા. તેમાંથી નેશનલ હેલ્થ ઈન્શ્યોરન્સ પ્રોગ્રામે 18.7 કરોડ ડોલરની ચુકવણી કરી દીધી હતી.

આ દરમિયાન મિનલ પટેલને આ કૌભાંડમાં પર્સનલી 21 મિલિયન ડોલરની કમાણી થઈ હતી. અમેરિકન અધિકારીઓએ જણાવ્યું કે જિનેટિક ટેસ્ટિંગ અને ટેલિમેડિસિન સર્વિસમાં લાંચ, બનાવટ અને છેતરપિંડી માટે કોઈ સ્થાન નથી. મિનલ પટેલે એક ગુંચવણભરી ટેસ્ટિંગ ફ્રોડ સ્કીમ દ્વારા મેડિકેર પાસેથી લાખો કરોડો ડોલરની આવક કરી છે. હવે તેણે તેના ગુનાની સજા ભોગવવી પડશે.

મિનલ પટેલની મિલ્કતો જપ્ત થશે?

અમેરિકામાં સિસ્ટમની સાથે ચેડા કરીને નાણાકી કૌભાંડ કરવામાં આવે ત્યારે તેને બહુ ગંભીરતાથી લેવામાં આવે છે. તેના કારણે મિનલ પટેલની મિલ્કતો પણ જપ્ત કરવામાં આવી શકે છે. 25 ઓગસ્ટે આ વિશે આગામી સુનાવણી કરવામાં આવશે. જિનેટિક ટેસ્ટિંગની જરૂરિયાત ન હોવા છતાં ટેસ્ટિંગ કરાવીને સરકાર પાસેથી કરોડો ડોલર ખંખેરવાના ગુનામાં બીજી ઘણી લેબોરેટરીઓ સંકળાયેલી હોવાનું માનવામાં આવે છે. અમેરિકાના મેડિકલ ઈતિહાસમાં આ કદાચ સૌથી મોટું કૌભાંડ હોઈ શકે છે.