બ્રહ્મ મુહૂર્તમાં રિલીઝ થયું `રામાયણ’નું ભવ્ય ટ્રેલર
રામ-રાવણના મહાસંઘર્ષની ઝલક, સીતાની ભૂમિકામાં જોવા મળી સાઇ પલ્લવી
નિતેશ તિવારીના નિર્દેશનમાં બનેલી વર્ષની સૌથી ચર્ચિત ફિલ્મ `રામાયણ: પાર્ટ-૧’નું પ્રથમ ટ્રેલર ગુરુવારે સવારે ૪:૧૫ વાગ્યે બ્રહ્મ મુહૂર્તમાં રિલીઝ કરવામાં આવ્યું હતું. ચાર મિનિટ નવ સેક્નડના ટ્રેલરમાં ભગવાન રામ અને રાવણ વચ્ચેના મહાસંઘર્ષની ભવ્ય રજૂઆત જોવા મળે છે.
ટ્રેલરની શરૂઆત યશના રાવણ અવતારથી થાય છે, જેમાં તેના દમદાર સંવાદો અને ભવ્ય લંકાના દૃશ્યો પ્રભાવિત કરે છે. ત્યારબાદ વિષ્ણુના અવતાર તરીકે રામની એન્ટ્રી સાથે રણબીર કપૂરનો શાંત, તેજસ્વી અને પ્રભાવશાળી લુક દર્શાવવામાં આવ્યો છે. સાઈ પલ્લવીએ સીતાના પાત્રમાં પોતાની સાદગી અને અભિવ્યક્તિથી ખાસ છાપ છોડી છે.
ટ્રેલરમાં રામ-સીતાના લગ્ન, કૈકેયીના નિર્ણય બાદ વનવાસ, શૂર્પણખા પ્રસંગ તેમજ લક્ષ્મણની ઝલક પણ જોવા મળે છે. રવિ દુબે લક્ષ્મણ, અરુણ ગોવિલ દશરથ અને લારા દત્તા કૈકેયીના પાત્રમાં નજરે પડે છે. જોકે હનુમાનના પાત્રમાં સની દેઓલની ઝલક ટ્રેલરમાં રાખવામાં આવી નથી.
ફિલ્મનું સંગીત એ.આર. રહેમાન અને હાન્સ ઝિમરે તૈયાર કર્યું છે, જે ટ્રેલરની ભવ્યતામાં વધુ વધારો કરે છે. નામિત મલ્હોત્રા નિર્મિત અને યશ સહ-નિર્માતા તરીકે જોડાયેલી આ ફિલ્મ બે ભાગમાં રિલીઝ થશે. `રામાયણ: પાર્ટ-૧’ દિવાળી વીકએન્ડ દરમિયાન ૫ નવેમ્બરે સિનેમાઘરોમાં રજૂ થશે.
કૈકેયીના લુકને લઇ લારા દત્તા થઇ ટ્રોલ
નિતેશ તિવારીની બહુપ્રતિક્ષિત ફિલ્મ `રામાયણ’નું ટ્રેલર ગુરુવારે બ્રહ્મમુહૂર્તે રિલીઝ થતાં જ સોશિયલ મીડિયા પર ચર્ચાનો વિષય બન્યું છે. ટ્રેલરમાં ભગવાન રામ તરીકે રણબીર કપૂર, માતા સીતા તરીકે સાઈ પલ્લવી અને રાવણ તરીકે યશના લુક તથા હાન્સ ઝિમર અને એ.આર. રહેમાનના બેકગ્રાઉન્ડ સ્કોરની પ્રશંસા થઈ રહી છે. જોકે, રાણી કૈકેયીની ભૂમિકા ભજવનારી લારા દત્તાના લુકને લઈને સોશિયલ મીડિયા પર વિવાદ ઉભો થયો છે. ટ્રેલરમાં ભગવાન રામને ૧૪ વર્ષના વનવાસ માટે મોકલતા દૃશ્યમાં લારા દત્તાએ પહેરેલી બોર્ડરવાળી સાડી અને આધુનિક હેરસ્ટાઇલને લઈને અનેક યુઝર્સે તેને ત્રેતાયુગની જગ્યાએ આજના સમયની સ્ટાઇલ ગણાવી હતી. કેટલાકે લખ્યું કે તેમનો લુક પૌરાણિક કથાના સમયકાળ સાથે સુસંગત લાગતો નથી. બીજી તરફ કેટલાક દર્શકોએ કાસ્ટિગ અંગે પણ સવાલ ઉઠાવ્યા અને જણાવ્યું કે લારા દત્તા રણબીર કપૂર કરતાં બહુ મોટી લાગતી નથી છતાં માતાની ભૂમિકામાં જોવા મળે છે.
