રૂ.2000 માટે યુવકનું અપહરણ : ટેક્સી ભાડાંનાં કમિશનના પૈસા ન આપતા ડ્રાઇવરને લમધાર્યો

રાજકોટની ભાગોળે ગ્રીનલેન્ડ ચોકડી પાસેથી માત્ર રૂા.2000 માટે યુવકનું અપહરણ થયાની ઘટના પોલીસ ચોપડે નોંધાતાં ચકચાર મચી જવા પામી હતી. અહીં ઉભા રહેતાં ટેક્સીચાલકો પૈકીના એક ટેક્સીચાલકે બીજા ચાલકને જૂનાગઢનું ભાડું આપ્યા બાદ તે ભાડામાંથી રૂા.2000નું કમિશન નહીં મળતાં આ ગુનો આચર્યો હોવાનું સામે આવ્યું છે.

આ અંગે ડ્રાઈવિંગ કરતા અને હુડકો પોલીસ ચોકી પાછળ નાડોદાનગરમાં રહેતા સંજય ભીખાભાઈ રાઠોડે ફરિયાદમાં જણાવ્યું કે તે તેના મીત્ર નિરજસિંહ જયરાજસિંહ ઝાલાના નામની અર્ટિગા કાર રાજકોટ-અમદાવાદ પાટે ચલાવે છે. તેનું સ્ટેન્ડ ગ્રીનલેન્ડ ચોકડીએ આવેલું છે. અહીં શકીલ નામનો શખસ પણ રાજકોટ-અમદાવાદ વચ્ચે ટેક્સ ચલાવે છે. દરમિયાન 30 મેએ બપોરે ચારેક વાગ્યાના અરસામાં શકીલ રજાકભાઈ દશાડીયા (રહે.શીતલ પાર્ક પાસે)એ સંજયને ફોન કરીને જૂનાગઢનું ભાડું આપ્યું હતું. આ ભાડાની રકમ પેટે સંજયે 6300 રૂપિયા લીધા હતા જેમાંથી 2000 રૂપિયા શકીલને કમિશન પેટે આપવાના હતા.

આ પણ વાંચો : રાજકોટમાં આવારા તત્વો બેફામ : રૂ.100નું પેટ્રોલ પૂરાવી પૈસા આપવાને બદલે આતંક મચાવ્યો

ભાડું થઈ ગયા બાદ શકીલે 2000નું કમિશન માંગતા સંજયે તેની પાસે હાલ ન હોવાનું કહ્યું હતું. આ પછી 1 જૂને ત્રણેક વાગ્યે તે ગ્રીનલેન્ડ ચોકડીએ હતો ત્યારે શકીલ તેની ગાડીમાં અમદાવાદ જવાની તૈયારી કરી રહ્યો હતો ત્યારે જ સંજય પાસે 2000 કમિશન માંગ્યું હતું પરંતુ શકીલે પૈસા ન હોવાનું કહેતાં ત્યાં જ તેને ફડાકા મારી શકીલે તેની ગાડીમાં બેઠેલા પેસેન્જરોને ઉતારી સંજયને તેમાં બેસાડી દીધો હતો અને અપહરણ કરીને જૂનાગઢ લઈ ગયો હતો. જૂનાગઢમાં પણ તેને ફડાકા મારી જ્ઞાતિ પ્રત્યે હડધૂત કરી `હવે તું ગ્રીલેન્ડ ચોકડીએ કેમ ધંધો કરે છે તે હું જોઈ લઈશ’ કહી ધમકી આપી હતી. જો કે જૂનાગઢના મજેવડી ગેઈટ પાસે જેવી શકીલે ગાડી ઉભી રાખી કે તેને ચકમો આપી સંજય કારમાંથી બહાર નીકળી રાજકોટ પહોંચ્યો હતો.