વિમેન્સ વર્લ્ડકપમાં 25 વર્ષ બાદ મળશે નવો ચેમ્પિયન! ભારત ત્રીજીવાર તો આફ્રિકા પહેલીવાર પહોંચ્યું ફાઈનલમાં
30 દિવસ સુધી રોમાંચક મેચ અને અમુક ચોંકાવનારા પરિણામ બાદ અંતે આઈસીસી વિમેન્સ વર્લ્ડકપ-2025ના ફાઈનલિસ્ટનો નિર્ણય થઈ ચૂક્યો છે. આવતીકાલે રવિવારે નવી મુંબઈના ડી.વાય.પાટિલ સ્ટેડિયમ પર રમાનારા ફાઈનલમાં ભારત-આફ્રિકા વચ્ચે ટક્કર થશે. આ સાથે જ નક્કી થઈ ગયું છે કે 25 વર્ષના લાંબા ઈન્તેજાર બાદ મહિલા ક્રિકેટને એક નવી ચેમ્પિયન ટીમ મળશે.
વર્લ્ડકપની શરૂઆત 30 સપ્ટેમ્બરે ગૌહાટીમાં ભારત-શ્રીલંકા મેચ સાથે થઈ હતી અને હવે 30 ઑક્ટોબરે ડી.વાઈ.પાટિલ સ્ટેડિયમ પર ટૂર્નામેન્ટનો બીજો સેમિફાઈનલ મુકાબલો થયો હતો. ઑસ્ટ્રેલિયાએ પહેલાં બેટિંગ કરતા 338 રન બનાવ્યા હતા. જવાબમાં ભારતે પાંચ વિકેટ ગુમાવી લક્ષ્યાંક હાંસલ કરી લેતાં હવે તેનો મુકાબલો આફ્રિકા સામે થશે જેણે સેમિફાઈનલમાં ઈંગ્લેન્ડને હરાવ્યું હતું.
ટીમ ઈન્ડિયા ત્રીજીવાર વર્લ્ડકપના ફાઈનલમાં પહોંચી છે. આ પહેલાં તેણે 2017માં પાછલો ફાઈનલ મુકાબલો રમ્યો હતો જ્યારે સૌથી પહેલાં 2005માં ભારતીય ટીમ વર્લ્ડકપ જીતવાની નજીક પહોંચી હતી. જો કે પાછલા બન્ને ફાઈનલમાં ભારતીય ટીમે હારનો સામનો કરવો પડ્યો હતો. 2005માં ઑસ્ટ્રેલિયાએ અને 2017માં ઈંગ્લેન્ડે હરાવ્યું હતું. જ્યારે આફ્રિકા પહેલીવાર ફાઈનલમાં પહોંચી છે.
આ સાથે જ 25 વર્ષ બાદ મહિલા ક્રિકેટમાં નવી ચેમ્પિયન ટીમ મળશે. આ પહેલાં વર્લ્ડકપ-2000માં આવું બન્યું હતું જ્યારે ન્યુઝીલેન્ડે ફાઈનલમાં ઑસ્ટ્રેલિયાને હરાવી ટ્રોફી જીતી હતી. ત્યારબાદ ઑસ્ટ્રેલિયા અને ઈંગ્લેન્ડ જ ચેમ્પિયન બનતા આવ્યા હોય હવે ચોથી ટીમ ચેમ્પિયન તરીકે મળશે.
