બિહારમાં ઇડીએ કોની કરી લાંબી પૂછતાછ ? શું છે કેસ ? વાંચો

રેલવેમાં નોકરીના બદલામાં જમીન રજીસ્ટર કરાવવાના કેસના સંદર્ભમાં એન્ફોર્સમેન્ટ ડિરેક્ટોરેટની ટીમે મંગળવારે પટણામાં બિહારના ભૂતપૂર્વ મુખ્યમંત્રી રાબડી દેવીની પૂછપરછ કરી હતી. તપાસ એજન્સીએ રાબડી દેવીને ઘણા પ્રશ્નો પૂછ્યા હતા. હવે ૧૯ મીએ એટલે કે આજે લાલુપ્રસાદ યાદવની પણ પૂછપરછ થવાની છે અને એમને સમન્સ મોકલી દેવાયું છે.

સૂત્રોના જણાવ્યા અનુસાર, ઇડીએ પૂછ્યું છે કે તમે તમારા નામે રહેલી જમીન કેવી રીતે મેળવી? નોકરીના બદલામાં જેમની પાસેથી જમીન લેવામાં આવી હતી તે લોકોને તે કેવી રીતે ઓળખે છે? તે પહેલી વાર ક્યારે મળી? તમે એ લોકોને નોકરી આપવા માટે લોબિંગ કેમ કર્યું? રાબડી દેવીને આવા ઘણા પ્રશ્નો પૂછવામાં આવ્યા હતા. આ પહેલી વાર છે જ્યારે ઇડીએ આ કેસમાં તેજ પ્રતાપ યાદવની પણ પૂછપરછ કરી હતી. કલાકો સુધી બંને મા દીકરાની પૂછતાછ થઈ હતી.

બંગલા વિષે પણ પ્રશ્ન
આ ઉપરાંત, તપાસ એજન્સીએ તેજસ્વી યાદવ દ્વારા દિલ્હીના ન્યૂ ફ્રેન્ડ્સ કોલોનીમાં કથિત રીતે ખરીદેલા બંગલા અંગે પણ પ્રશ્નો ઉઠાવ્યા હતા. તેમને પટનાના સગુણા મોર ખાતે આવેલા એપાર્ટમેન્ટની જમીન ખરીદવા અંગે પણ પ્રશ્નો પૂછવામાં આવ્યા હતા. ઇડીએ પૂછ્યું કે એપાર્ટમેન્ટનું બાંધકામ ક્યારે શરૂ થયું અને બાંધકામ પર ખર્ચવામાં આવેલા પૈસા ક્યાંથી આવ્યા.

આ પહેલી વાર છે જ્યારે ઇડીએ તેજ પ્રતાપ યાદવની આસપાસ સકંજો કડક કર્યો છે અને તેમને આ કેસમાં પૂછપરછ માટે બોલાવ્યા છે. અગાઉ, તપાસ એજન્સીએ લાલુ પ્રસાદ, મીસા ભારતી, રાબડી દેવી અને તેજસ્વી યાદવની પૂછપરછ કરી હતી. હવે ઇડીએ તેજ પ્રતાપ યાદવની પૂછપરછ કરી છે.