ધોરાજીમાં પતા ટીચતા 15 શકુનીઓ પકડાયા : 50 હજારની રોકડ કબજે

તહેવારોનો નજીક આવતાની સાથે પતા પ્રેમીઓ પણ જુગારની રમત રમી રહ્યા છે. ત્યારે આ બાજીગરોને  પકડી પાડવા માટે ધોરાજી તાલુકા પોલીસ દ્વારા બે દરોડા પાડવામાં આવ્યા હતા.જેમાં પીએસઆઇ પી.કે. ગોહિલ અને સર્વલેન્સ સ્ટાફના મનીષભાઈ વરુ અને ટીમ દ્વારા પ્રથમ દરોડો ધોરાજી તાલુકાના રેગડી સીમમાં કેનાલ પાસે પાડી જુગાર રમતા ચંદુ બાબુ, રાજેશ ડાયા, સંજય નાનજી, વશરામ લક્ષ્મણ,હિતેશ પ્રેમજી, કાંતિ મગન, અતુલભાઇ કાળુ અને ધનસુખ કનુને રોકડ રકમ 25 હજાર સાથે પકડી પાડયા હતા.

જ્યારે બીજો દરોડો ધોરાજીના જુનાગઢ રોડ પર રેલવે ફાટકથી આગળ પાડી પતા ટીચતા અનિલ શાંતિ, કિરણ વજુ, વિજય કુરજી, અજય દિનેશ, અજય વલ્લભ, અશ્વિન બાબુ અને ભરત ઝીણાને પકડી પાડી રોકડ રૂ.25,220 કબજે કરી કાર્યવાહી હાથ ધરી હતી