ઇડીએ કઈ પાર્ટીના નેતાને ત્યાં પાડયા દરોડા ? શું છે કેસ ? જુઓ
ઇડી દ્વારા ગોલમાલ અને કૌભાંડ કરનારા સામે કાર્યવાહી ચાલુ જ રખાઇ છે. હવે સોમવારે લખનઉ, ગોરખપુર અને મુંબઈમાં સપા નેતા વિનય શંકર તિવારીની ઓફિસ પર ઇડી ત્રાટકી હતી. આ કાર્યવાહી તિવારી સાથે જોડાયેલ ગંગોત્રી એન્ટરપ્રાઈઝ પ્રાઈવેટ લિમિટેડ અને તેની સંબંધિત કંપનીઓની ઓફિસ પર કરવામાં આવી હતી. બેન્કો સાથે રૂપિયા ૧૧૨૯ કરોડની છેતરપિંડી અંગે આ કાર્યવાહી થઈ છે.
બેન્ક ઓફ ઈન્ડિયા સહિત ઘણી બેન્કોએ ગંગોત્રી એન્ટરપ્રાઈઝ વિરુદ્ધ ફરિયાદ દાખલ કરી છે અને કાર્યવાહીની માંગ કરી હતી. ફરિયાદમાં બેન્ક લોનનું અન્યત્ર રોકાણ કરીને ગેરરીતિ આચરી હોવાનો આક્ષેપ કરાયો છે. આ મામલામાં સીબીઆઈએ પહેલા કેસ નોંધીને તપાસ શરૂ કરી હતી, ત્યારબાદ હવે ઈડીએ મની લોન્ડરિંગ એક્ટ હેઠળ કેસ નોંધીને તેની તપાસ કરી છે.
પૂર્વ ધારાસભ્ય વિનય શંકર તિવારી ગંગોત્રી એન્ટરપ્રાઈઝ નામની કંપની ચલાવે છે. તિવારી અને તેની કંપની પર થોડા વર્ષો પહેલા આ કંપની માટે 7 બેન્કો પાસેથી લગભગ 1129 કરોડ રૂપિયાની લોન લેવાનો અને બાદમાં તે જ બેન્કો સાથે છેતરપિંડી કરવાનો આરોપ છે.
આ મામલાની ગંભીરતાને ધ્યાનમાં લઈને તપાસ એજન્સીએ ગયા વર્ષે ઇડી પાસેથી આ કેસ સંભાળ્યા બાદ હવે આગળની કાર્યવાહી હાથ ધરવામાં આવી રહી છે. સપાના નેતા આમ મુશ્કેલીમાં મુકાયા છે. એમની ધરપકડ પણ થઈ શકે છે .
