ક્યારે થશે જીએસટી કાઉન્સિલની બેઠક ? જુઓ
મોદી સરકારમાં સતત બીજી વખત નાણાં મંત્રાલય સંભાળ્યા બાદ નિર્મલા સીતારમણ હવે જીએસટી ના દરોમાં કેટલાક મોટા ફેરફારો લાવી શકે છે. ગુડ્સ એન્ડ સર્વિસ ટેક્સ કાઉન્સિલ નાણાકીય વર્ષ 2024-25ના સંપૂર્ણ બજેટ પહેલા તેની બેઠકમાં, ફરી એક વખત દરોમાં સુધારા અને તર્કસંગતકરણ પર વિચાર કરી શકે છે. જીએસટી કાઉન્સિલ આ માટે મંત્રીઓના જૂથની રચનામાં ફેરફારની અપેક્ષા રાખે છે. જૂથે જૂન 2022ના તેના વચગાળાના અહેવાલ પછી હવે જીએસટી તંત્રના તર્કસંગતકરણ પર વચગાળાનો અહેવાલ સબમિટ કરવાનો છે.
22 મી જૂને આ બેઠક થાય તેવી સંભાવના છે. ઓનલાઈન ગેમિંગ માટે ટેક્સના દર તેમજ કેસીનો માટે અને હોર્સ રેસિંગ માટે ટેક્સના દર 28 ટકા કરવા માટે રાજ્યો દ્વારા જે કાનૂની ફેરફારો કરાયા હતા તેની સમીક્ષા કરાશે. નાણામંત્રી નિર્મલાના પ્રમુખપદે આ બેઠક યોજાશે.
કાઉન્સિલમાં મંત્રીઓના જૂથમાં ફરીથી ફેરફાર થશે
જીએસટી દરોમાં ફેરફાર અંગેના પ્રધાનોના જૂથનું નેતૃત્વ ઉત્તર પ્રદેશના નાણા પ્રધાન સુરેશ ખન્ના કરે છે અને તેમાં ગોવા, કેરળ, કર્ણાટક, પશ્ચિમ બંગાળ, રાજસ્થાન અને બિહારના નાણા પ્રધાનો પણ સામેલ છે. 2021માં કાઉન્સિલની બેઠકમાં દરોની પુનઃરચના કરવા અને કહેવાતા ઇન્વર્ટેડ ડ્યુટી સ્ટ્રક્ચરનું પુનર્ગઠન કરવા માટે સૌપ્રથમ તેની રચના કરવામાં આવી હતી.
બસવરાજ એસ બોમાઈ કર્ણાટક વિધાનસભા ચૂંટણી હારી ગયા બાદ નવેમ્બરમાં તેની પુનઃ રચના કરવામાં આવી હતી. તેના એક સભ્ય વિજય કુમાર ચૌધરી હવે બિહારના નાણાપ્રધાન નથી માટે ફરી ફેરફારની જરૂર છે.
ફિટમેન્ટ કમિટીએ કામ શરૂ કર્યું
દરમિયાન, ટોચના સૂત્રોનું કહેવું છે કે કાઉન્સિલની ફિટમેન્ટ કમિટીએ દરોમાં સુધારો કરવાનું કામ ફરી શરૂ કર્યું છે. જ્યાં સુધી દરોમાં ફેરફારનો સંબંધ છે, સમિતિ ખાસ કરીને 12 ટકાના સ્લેબને ઘટાડવાની શક્યતા ચકાસી રહી છે, જેથી આવક-તટસ્થ માળખું પ્રાપ્ત કરી શકાય.
