સંસદમાં શું થયું ? કોનો કાર્યકાળ વધારવા મંજૂરી અપાઈ ? વાંચો
સંસદના શિયાળુ સત્રના પ્રથમ અઠવાડિયાના છેલ્લા દિવસે સંયુક્ત સંસદીય સમિતિએ વક્ફ બિલ અંગે તેનો રિપોર્ટ રજૂ કરવાનો હતો. શિયાળુ સત્રના એજન્ડામાં પણ આ મુદ્દો સામેલ હતો. જોકે જેપીસીમાં સામેલ વિપક્ષના સાંસદો કાર્યકાળ આગળ વધારવાની માગ કરી રહ્યા હતા. ગુરુવારે આ પ્રસ્તાવ સ્વીકારી લેવાયો હતો.
આ સમિતિનું નેતૃત્વ કરનારા ભાજપના સાંસદ જગદંબિકા પાલે દાવો કર્યો હતો કે તેમનો રિપોર્ટ તૈયાર છે. જોકે જેપીસીનો રિપોર્ટ ગૃહમાં રજૂ થાય તેના એક દિવસ પહેલા જ જેપીસીનો કાર્યકાળ વધારવાનો પ્રસ્તાવ મંજૂર કરી લેવામાં આવ્યો છે. જેપીસી પ્રમુખ પાલે વધુ સમયની માગ કરતા કાર્યકાળ વધારવા સંબંધિત પ્રસ્તાવ લોકસભામાં રજૂ કર્યો હતો જેને પસાર કરી દેવામાં આવ્યો હતો.
જોકે હવે આવતીકાલે નહીં પણ વક્ફ બિલ અંગે જેપીસી આગામી બજેટ સત્ર 2025ના છેલ્લા દિવસે પોતાનો રિપોર્ટ ગૃહમાં રજૂ કરશે. વિપક્ષના હોબાળા વચ્ચે વક્ફ બિલ માટે રચાયેલી જેપીસીનો કાર્યકાળ વધારવા સંબંધિત પ્રસ્તાવ પાસ થયા બાદ લઘુમતી બાબતોના મંત્રી કિરેન રિજિજુએ વિપક્ષના વ્યવહારની ટીકા કરી હતી.
બંને ગૃહો ફરી મુલતવી
દરમિયાનમાં ગુરુવારે પણ સંસદના બંને ગૃહોમાં અદાણી અને યુપીના સંભલ શહેરમાં થયેલી હિંસા મુદ્દે વિપક્ષ દ્વારા ધમાલ બોલાવવાનું ચાલુ જ રાખવામાં આવ્યું હતું અને અદાણી મુદ્દે ચર્ચાની માંગી યથાવત રખાઈ હતી. જો કે વારંવાર ગોકીરો થતાં બંને ગૃહો આખા દિવસ માટે મુલતવી રાખી દેવાયા હતા.
પ્રિયંકાએ શપથ લીધા
કોંગ્રેસના નેતા પ્રિયંકા ગાંધીએ ગુરુવારે લોકસભામાં રાહુલ ગાંધીની જેમ હાથમાં બંધારણની કોપી રાખીને સંસદસભ્ય તરીકે શપથ લીધા હતા. એમણે કહ્યું હતું કે હું લોકો માટે અને ન્યાય માટે લાદતી રહીશ. પ્રિયંકા વાયનાડ લોક સભા બેઠક પરની પેટા ચુંટણીમાં ભારે મતોથી વિજેતા થયા હતા.
