ટીમ ઈન્ડિયાનું ટેન્શન વધ્યું: વિસ્ફોટક ઓપનર અભિષેક શર્મા દિલ્હીની હોસ્પિટલમાં દાખલ,નામિબિયા સામેની મેચમાં રમવા અંગે સસ્પેન્સ

T-20 વર્લ્ડકપમાં જીત સાથે ભારતે શાનદાર શરૂઆત કરી છે ત્યારે હવે ટીમ ઈન્ડિયાને મોટો ઝટકો લાગી શકે છે. ટીમ ઈન્ડિયાના ઓપનર અભિષેક શર્માને સોમવારે પેટમાં ઇન્ફેકશન લાગવાના કારણે દિલ્હીની ફોર્ટિસ હોસ્પિટલમાં દાખલ કરવામાં આવ્યા હતા. તેઓ ગઈકાલ રાત (મંગળવાર) સુધી હોસ્પિટલમાં રહ્યા હતા, અને તેમના સ્વાસ્થ્ય અંગે વધુ અપડેટ્સની રાહ જોવાઈ રહી છે. મોટો પ્રશ્ન એ છે કે જો તેઓ 12 ફેબ્રુઆરીએ નામિબિયામાં રમવા માટે સ્વસ્થ નહીં થાય તો તેમની જગ્યા કોણ લેશે?

નામિબિયા મેચ પર અસર

અભિષેક શર્માની ફિટનેસને લઈને, ભારત વિરુદ્ધ નામિબિયા મેચમાં તેની ભાગીદારી અંગે અનિશ્ચિતતા છે. આ મેચ 12 ફેબ્રુઆરીએ દિલ્હીના અરુણ જેટલી સ્ટેડિયમમાં યોજાવાની છે. BCCIના એક સૂત્રએ જણાવ્યું હતું કે, “આ મેચ માટે તેની ઉપલબ્ધતા હજુ સ્પષ્ટ નથી.” ટીમને આશા છે કે તે સ્વસ્થ થઈને ટૂંક સમયમાં મેદાનમાં પાછો ફરશે. સંજુ સેમસન નામિબિયા સામે અભિષેકનું સ્થાન લઈ શકે છે. ઈશાન કિશન બીજો ઓપનર બની શકે છે.

પાકિસ્તાન સામે રમવાની આશા!

ટીમ મેનેજમેન્ટ અને મેડિકલ સ્ટાફને વિશ્વાસ છે કે શર્મા 15 ફેબ્રુઆરીએ કોલંબોમાં પાકિસ્તાન સામેની મહત્વપૂર્ણ મેચ માટે ઉપલબ્ધ રહેશે. આ સમયે તેનું સ્વાસ્થ્ય અને સ્વસ્થતા મુખ્ય પ્રાથમિકતા છે.

આ પણ વાંચો:ગુજરાત પ્રદેશ આમ આદમી પાર્ટીમા ભંગાણ: લડાયક ખેડૂત નેતા રાજુ કરપડાએ બોટાદ હળદડ પ્રકરણમા જામીનમુક્ત થયા બાદ આપ્યું રાજીનામું

રાત્રિભોજન માટે ગંભીરના ઘરે ગયો હતો

સૂત્રોના જણાવ્યા અનુસાર, 25 વર્ષીય અભિષેક શર્મા રવિવારે મુખ્ય કોચ ગૌતમ ગંભીરના ઘરે આયોજિત રાત્રિભોજનમાં હાજરી આપી હતી પરંતુ ટીમના બાકીના ખેલાડીઓ કરતાં વહેલા ત્યાંથી નીકળી ગયો હતો. એવું માનવામાં આવે છે કે આ સમય દરમિયાન તેને પેટની સમસ્યા થઈ હતી. જોકે, કેટલાક મીડિયા રિપોર્ટ્સમાં દાવો કરવામાં આવ્યો છે કે અભિષેક શર્મા યુએસએ સામેની છેલ્લી મેચ પહેલા પણ સંપૂર્ણપણે ફિટ નહોતો અને મેચ રમ્યા પછી તેની હાલત વધુ ખરાબ થઈ ગઈ હતી.

એવું કહેવામાં આવી રહ્યું છે કે ડાબા હાથના ઓપનરને ખૂબ તાવ હતો અને તાત્કાલિક રાહત માટે તેને ડ્રિપ આપવામાં આવી હતી. તેની ખરાબ તબિયતને કારણે, અભિષેક દિલ્હીના અરુણ જેટલી સ્ટેડિયમમાં ટીમના પ્રેક્ટિસ સત્રમાં પણ ભાગ લઈ શક્યો ન હતો. આનાથી પ્રશ્નો ઉભા થાય છે કે તે આટલી ખરાબ સ્થિતિમાં ગંભીરના ઘરે રાત્રિભોજન માટે કેમ ગયો.

વિશ્વનો નંબર વન ટી20 બેટ્સમેન

અભિષેક યુએસએ સામે પોતાનું ખાતું ખોલી શક્યો ન હતો. આ તેનો પહેલો ટી20 વર્લ્ડ કપ છે. અભિષેક હાલમાં વિશ્વનો નંબર વન ટી20 બેટ્સમેન છે. ટીમ ઈન્ડિયાના અભિયાન માટે તેનું પ્રદર્શન મહત્વપૂર્ણ છે. તે જે પ્રકારની શરૂઆત આપે છે તે વિરોધી ટીમ પર માનસિક દબાણ બનાવે છે. તે પાકિસ્તાન સામે ભારતનું મુખ્ય હથિયાર બનશે. શાહીન આફ્રિદી અત્યાર સુધી એક પણ વાર અભિષેકને આઉટ કરી શક્યો નથી.

અભિષેક શર્માના આંકડા

અભિષેકે અત્યાર સુધીમાં ભારત માટે 39 T20 મેચ રમી છે, જેમાં તેણે 36.03 ની સરેરાશ અને 194.46 ના સ્ટ્રાઇક રેટથી 1297 રન બનાવ્યા છે. આમાં બે સદી અને આઠ અડધી સદીનો સમાવેશ થાય છે. T20 આંતરરાષ્ટ્રીય મેચોમાં તેનો શ્રેષ્ઠ સ્કોર 135 છે. ચાહકો તેના ઝડપી સ્વસ્થતા માટે પ્રાર્થના કરી રહ્યા છે.