કોલકત્તામાં આજે સૌરવ ગાંગુલી વિરોધ પ્રદર્શન કરશે

પત્ની અને ટેકેદારો સાથે મહિલા તબીબની હત્યાની ઘટના સામે આક્રોશ વ્યક્ત કરાશે

દેશમાં ચકચાર મચાવનાર કોલકાતાની આરજી મેડિકલ કોલેજ અને હોસ્પિટલમાં મહિલા ડૉક્ટર પર દુષ્કર્મની અને હત્યાથી દેશભરના લોકો ખૂબ જ દુઃખી છે. ઠેકઠેકાણે છેલ્લા ઘણા દિવસોથી વિવિધ રીતે વિરોધ નોંધાવવામાં આવી રહ્યો છે. કેટલાક સેલિબ્રિટિઝ પણ સોશિયલ મીડિયા તેમજ પબ્લિકમાં આવીને આ ઘટનાનો વિરોધ કર્યો છે. હવે આમાં પૂર્વ ભારતીય ક્રિકેટ કેપ્ટન સૌરવ ગાંગુલીનું નામ પણ ઉમેરાયું છે.

બીસીસીઆઈના ભૂતપૂર્વ પ્રમુખ સૌરવ ગાંગુલી આ કેસમાં ન્યાયની માંગણી માટે બુધવારે આજે કોલકાતાના રસ્તાઓ પર વિરોધ પ્રદર્શનમાં જોડાશે. તેમની સાથે પત્ની ડોના ગાંગુલી પણ હાજર રહેશે. ગાંગુલીએ એક દિવસ પહેલા જ તેના તમામ સોશિયલ મીડિયા X અને Instagram એકાઉન્ટ પર ડીપી બ્લેક કરીને પ્રતીકાત્મક વિરોધ નોંધાવ્યો છે.

પ્રિન્સ ઑફ કોલકાતા તરીકે ઓળખાતા ગાંગુલીએ થોડા દિવસો પહેલા આ મામલે નિવેદન આપ્યું હતું, જે બાદ તે ઘણા લોકોની નારાજગીનો ભોગ પણ બન્યો હતો અને સોશિયલ મીડિયા પર તેની ખૂબ ટીકા થઈ હતી. આ મામલે બાદમાં ગાંગુલીએ સ્પષ્ટતા આપવી પડી હતી. ગાંગુલીએ કહ્યું કે તેનું નિવેદન યોગ્ય રીતે રજૂ કરવામાં આવ્યું નથી.