મારથી કોઈ ભૂલ થઈ ગઈ હોય તો માફ કરજો…રાજકોટની ડાલીબાઈ કન્યા હોસ્ટેલમાં ધો.11ની વિદ્યાર્થીનીનો આપઘાત
રાજકોટ શહેરના ગુરુપ્રસાદ ચોક નજીક આવેલી ડાલીબાઈ કન્યા હોસ્ટેલમાં રહેતી અને ધોરણ 11 માં અભ્યાસ કરી 16 વર્ષીય તરુણીએ રૂમમાં ગળાફાંસો ખાઇ જિંદગી ટૂંકાવી લેતા ચકચાર મચી જવા પામી છે. મૃતક તરુણી પાસેથી મળેલી સ્યુસાઇડ નોટમાં “મારથી કોઈ ભૂલ થઈ ગઈ હોય તો માફ કરજો” તેવું લખ્યું હતો. જો કે બનાવ અંગે માલવિયાનગર પોલીસે વધુ તપાસ હાથ ધરી છે.
આ અંગેની વિગતો મુજબ, મૂળ ચોટીલાના તાજપર ગામની વતની અને હાલ ગુરુપ્રસાદ ચોક નજીક આવેલી ડાલીબાઈ કન્યા હોસ્ટેલમાં રહેતી 16 રિંકલ મનસુખભાઇ ગાબુ નામની તરુણીએ મોડી રાત્રીના 2.30 વાગ્યા આસપાસ પોતાના રૂમમાં લોખંડના અંગેલમાં ચુંદડી વડે ફાંસો ખાઈ લીધો હતો. રાત્રિના રૂમ પાર્ટનર લઘુશંકા જવા માટે ઉઠતાં બહેનપણીને લટકતી જોઈને દેકારો કરી મૂકતા ગૃહમાતા સહિતના દોડી ગયા હતા અને 108 અને પોલીસને જાણ કરતા તબીબે જોઈ તપાસી તરુણીને મૃત જાહેર કરી હતી. જયારે માલવિયાનગર પોલીસ મથકના સ્ટાફે તાજપર ગામે રહેતા મૃતકના પરિવારને જાણ કરતા પિતા મનસુખભાઈ અને માતા શોભનાબેન સહિતના સભ્યો રાજકોટ સિવિલ હોસ્પિટલે દોડી હતા હતા.
પોલીસ તપાસમાં રિંકલ પાસેથી એક સ્યુસાઇડ નોટ મળી હતી જેમાં “મારથી કોઈ ભૂલ થઈ ગઈ હોય તો માફ કરજો, મારા આત્માને શાંતિ મળે, તેમજ અંકિતા નામની બહેનપણીનું નામ લખીને સોરી લખ્યું હતું” વધુમાં જાણવા મળ્યું હતું કે, રિંકલ લાલબહાદુર કન્યા છાત્રાલયમાં ધોરણ 11 માં અભ્યાસ કરતી હતી અને સિટી બસથી હોસ્ટેલ અને સ્કૂલ વચ્ચે અપડાઉન કરતી હતી.તે આ વર્ષથી જ ડાલીબાઈ છાત્રાલયમાં રહેવા માટે આવી હતી.
મૃતક રિંકલ 2 ભાઈ 2 બહેન બીજા નંબરની હતી. તેના પિતા ખેતી કામ કરે છે. પરિવારે જણાવ્યું હતું કે, બપોરે રીંકલ દ્વારા હોસ્ટેલનાં ફોનમાંથી ઘરે ફોન કર્યો હતો ત્યારે તે સાવ નોર્મલ વાત કરતી હતી. બનાવ અંગે પોલીસે રિંકલ પાસેથી મળેલી સ્યુસાઇડ નોટમાં ઉલ્લેખ વાળી તેની બહેનપણીની પણ પૂછપરછ કરી હતી જેમાં કોઇ તારણ સામે આવ્યું ન હતું. જો કે તેણીને અહીં ન ગમતું હોવાની વિગત સામે આવતા પોલીસે તે દિશામાં પણ તપાસ આરંભી છે. ત્યારે યુવતીએ ક્યાં કારણસર આ પગલું ભર્યું તે અંગેનું સચોટ કારણ જાણવા પોલીસે તેણીની સ્કૂલ સહિતની જગ્યાએ તપાસનો ધમધમાટ શરૂ કર્યો છે.
