SIR : રાજકોટ શહેર ભાજપને દોડવું હતું’ને ઢાળ મળી ગયો! ‘ઈંડાપ્રેમી’ કોર્પોરેટર : બહાર છૂપાઈને ખાવા મજબૂર,વાંચો કાનાફૂસી
ચૂંટણી પંચ દ્વારા ગુજરાત સહિત 12 રાજ્યોમાં એસ.આઈ.આર (મતદાર યાદી સુધારણા) શરૂ કર્યું છે જેને લઈને વિપક્ષ દ્વારા ચારેય બાજુ `કકળાટ’ શરૂ કરી દેવામાં આવ્યો છે અને બિહારમાં પરાજય બાદ આ દેકારો તીવ્ર બની ગયો છે. ખેર, એ વાતમાં પડવાની જગ્યાએ અત્યારે રાજકોટ શહેર ભાજપે `તક’નો લાભ કેવી રીતે લઈ લીધો છે તેની વાત કરવી અહીં જરૂરી છે. આમ તો સત્તાવાર રીતે આ સમગ્ર પ્રક્રિયા બી.એલ.ઓ. એટલે કે બૂથ લેવલ ઓફિસર થકી કરવાની હોય છે મતલબ કે ફોર્મ વિતરણ, ફોર્મ પરત લેવું, મતદારને સમજ ન પડે ત્યાં માર્ગદર્શન આપવા સહિતની તમામ કામગીરી બી.એલ.ઓ. મારફત થશે તેવી જાહેરાત કરી દેવામાં આવી હતી પરંતુ શહેર ભાજપે આ કામ માટે પોતાના તોખાર કાર્યકરોની ફૌજ મેદાને ઉતારી દઈ વોર્ડવાઈઝ `રાઉન્ડ’ લેવાનું શરૂ કરતાં કાર્યકરો મારફતે જ ઘેર-ઘેર ફોર્મ પહોંચાડવા, કલેક્ટ કરવા, જરૂરી સમજણ આપવા સહિતનું કામ શરૂ કરાવી દીધું હોવાની `કાનાફૂસી’ શરૂ થઈ છે ત્યારે એમ કહી શકાય કે મહાપાલિકાની ચૂંટણી પહેલાં જ ભાજપ કાર્યકરોએ જન-જન નહીં પરંતુ ઘર-ઘર સંપર્ક અભિયાન શરૂ કરી દીધું છે. આ બધાથી વિપરિત કોંગે્રસ આ પ્રકારે કામ કરવા ઈચ્છે તો પણ કરી શકે તેવી સ્થિતિ નથી કેમ કે કેન્દ્ર સ્તરે તેનો પક્ષ એસ.આઈ.આર.નો ઘોર વિરોધ કરી રહ્યો હોવાથી કોંગે્રસ આ દિશામાં `હાથ’ ન નાખવો જોઈએ તેવું માનીને અત્યારે બધું જોઈ રહી છે. નિષ્ણાતો તો એમ પણ કહી રહ્યા છે કે બૂથ લેવલ ઓફિસરની કામગીરી તેણે જ કરવાની હોય તેની જગ્યાએ બીજુ કોઈ ન કરી શકે ત્યારે જવાબદાર તંત્રએ પણ આ દિશામાં ધ્યાન આપવાની જરૂર હોય તેવું લાગી રહ્યું છે.
‘ઈંડાપ્રેમી’ કોર્પોરેટરઃ ઘેર ખાઈ ન શકે, બહાર છૂપાઈને ખાવા મજબૂર…
ઈંડું વેજ છે કે નોનવેજ તે હજુ વૈજ્ઞાનિક ઢબે સ્પષ્ટ થઈ શક્યું નથી પરંતુ મહત્તમ વર્ગ ઈંડાને નોનવેજમાં જ ગણી રહ્યો છે જેના કારણે હજુ પણ મહત્તમ લોકો ઈંડાની રેંકડી, દુકાન, હોટેલ પાસેથી પસાર થાય એટલે મોઢે કપડું રાખ્યા વગર નીકળી રહ્યા નથી. જો કે ઘણાખરા એવા લોકો પણ છે જેઓ બહાર ઈંડાનો વિરોધ કરતા હોય છે પરંતુ અંદર તેમને ઈંડાથી બનેલી અવનવી વાનગી આરોગવાની તાલાવેલી એટલી જ રહે છે. આવા જ `પોશ’ એરિયાના કોર્પોરેટર છે જેઓ ઈંડાના શોખીન છે પરંતુ તેઓ ઘેર ખાઈ શકે તેવી સ્થિતિ ન હોવાથી બહાર જઈને ઈચ્છા પૂર્ણ કરવા મજબૂર બન્યા છે. જાહેરજીવનમાં હોવાને કારણે તેઓ ટેબલ-ખુરશી ઉપર બેસીને ઈંડા ન ઝાપટી શકે એટલા માટે તેમણે વચલો રસ્તો કાઢતા હેમુ ગઢવી હોલ પાછળ ઉભી રહેતી એક રેંકડી ઉપર પસંદગી ઉતારી છે અને ત્યાં કોર્પોરેટર જમવા જાય એટલે કોઈની નજરમાં ન આવે તે પ્રકારની વ્યવસ્થા કરાવી લીધી છે આમ છતાં અનેક લોકો તેમને ઈંડા ઝાપટતાં જોઈ જતાં પોતાનું હાસ્ય રોકી શક્યા ન્હોતા તે પણ વાસ્તવિક્તા છે !
મહાપાલિકામાં સમિતિ ચેરમેનોની ઓફિસ ખુલ્લી ઓછી, બંધ વધુ રહી…!
રાજકોટ મહાપાલિકામાં બે દાયકા કરતા વધુ સમયથી ભાજપનું શાસન છે. પાછલી ચૂંટણીમાં તો લોકોએ ભાજપને ખોબલે ખોબલે મત આપતા કુલ 72માંથી 68 (હાલ બે કોર્પોરેટર સસ્પેન્ડ છે એટલે 66) બેઠક આપી દેતા કાર્યકરોની ખુશીનો પાર રહ્યો ન્હોતો. દર વખતની જેમ આ ટર્મમાં પણ ભાજપ દ્વારા અલગ-અલગ સમિતિના ચેરમેનની પસંદગી કરી હતી તેમને અલાયદી ઓફિસ સેન્ટ્રલ ઝોન કચેરીમાં જ ફાળવી હતી. આ ઓફિસમાં તેમને એ.સી., પંખો, ટેબલ સહિતની સુવિધા ઉપરાંત પિયૂન સહિતની સગવડ પણ કરી અપાઈ હતી પરંતુ પાછલા અઢી વર્ષની જો વાત કરવામાં આવે તો આટલા સમયમાં લગભગ દરેક ચેરમેનની ઓફિસ ખુલ્લી ઓછી અને બંધ વધુ જોવા મળી હતી અને જો ખુલ્લી હોય તો પિયૂન સહિતના લોકો ઓફિસમાં એ.સી. શરૂ કરીને બેઠેલા જોવા મળ્યા હતા. આ દૃશ્ય જોતાં જેમને ધક્કો થયો હોય તેવા અરજદારો એવી `કાનાફૂસી’ કરતા સાંભળવા મળ્યા હતા કે આપણે અહીં ધક્કો ખાવા માટે જ આટલા બધા મત આપ્યા હતા ! હવે આ ટર્મ પૂર્ણ થવામાં બહુ વધુ મહિના બાકી રહ્યા નથી ત્યારે આવનારી ચૂંટણીમાં જે પણ પક્ષ જીતીને આવે તેના દ્વારા સમિતિ ચેરમેનોને સમયસર ઓફિસમાં હાજર રહેવાનું કડક ફરમાન થાય તે જરૂરી બની જાય છે.
કપાય તે પહેલાં જ અનેક કોર્પોરેટરોએ કહી દીધું, અમારે ચૂંટણી નથી લડવી…
મહાપાલિકાની આવનારી ચૂંટણી માટે અનામત બેઠકનું રોટેશન જાહેર થઈ ચૂક્યું છે જેના કારણે અનેક દિગ્ગજ કોર્પોરેટરે કાં તો અન્ય વોર્ડ કાં તો ચૂંટણી લડવાનું જ માંડી વાળવું પડે તેવી સ્થિતિ નિર્માણ પામી ગઈ છે. અમુક વોર્ડ એવા પણ છે જ્યાં સીટિંગ કોર્પોરેટરની ટિકિટ કપાવાનું નિશ્ચિત બની ગયું છે ત્યારે આવા વોર્ડના કોર્પોરેટરો પોતાનું નામ કપાય તે પહેલાં જ લાગતા-વળગતા મારફતે `ઉપર’ મેસેજ આપવાનું શરૂ કરી દીધું છે કે અમારે આ વખતની ચૂંટણી નથી લડવી. અમે હવે સેક્નડ કેડરને આગળ લાવવા માટે મહેનત કરશું. જો કે તેઓ જ્યારે આ વાક્ય બોલતા સંભળાય છે ત્યારે એક છૂપો રોષ પણ જોવા મળતો હોય છે પરંતુ અઠંગ રાજકારણીની માફક તેઓ ક્યારેય આ રોષ ચહેરા પર આવવા દેતા નથી. વળી, અમુક કોર્પોરેટર એવું પણ કહી રહ્યા છે કે અમે અત્યારે ચૂંટણી લડવી કે નહીં તેનું કહેવાની જગ્યાએ `તેલ જુઓ તેલની ધાર’ જૂઓ માફક રહેવા માંગીએ છીએ.
પ્રમોટેડ બાદ હવે રેગ્યૂલર પી.એસ.આઈ. પણ ટ્રેનીંગમાં જતા રાજકોટમાં ફોજદારોની તુટ
રાજકોટ શહેર પોલીસ બેડામાં અત્યારે ચિત્ર એવું છે કે કોઇ કોઇ પોલીસ સ્ટેશનો, બ્રાંચોમાં પી.આઈ. કક્ષાના અધિકારીઓ પૂરતા અથવા તો જરૂરીયાતથી પણ વધુ બે-બે પી.આઇ. થઈ પડયા છે. ઘણા પી.આઇ. બદલીઓની રાહમાં છે. જયારે સામે એ.એસ.આઇ.માંથી ખાતાકીય પરીક્ષાથી પી.એસ.આઈ. બન્યા જેમાં રાજકોટના ઘણા એ.એસ.આઈ. પણ ફોજદાર થયા હાલ આ બધા પ્રમોટેડ પી.એસ.આઈ. ટ્રેનીંગમાં છે. તે જગ્યાઓ ખાલી છે. સાથે હવે ભરતીમાં જે
ડાયરેક્ટ પી.એસ.આઈ. બનેલા અને સિટીમાં પોસ્ટીંગમાં હતા તેઓ પણ કમાન્ડો ટ્રેનીંગમાં ગયા છે. જેને લઇને શહેરના પોલીસ મથકોમાં પી.એસ.આઈ.ની ખેંચ પડી છે. કોઈ પોલીસમથક તો એવા છે કે ત્યાં એક જ પી.એસ.આઇ. બચ્યા છે. બાકી ટ્રેનીંગમાં છે. આમ શહેરમાં થોડો વખત માટે જાણે ફોજદારોની ખેંચ ઉભી થઇ છે.
