ગર્લ્સ હોસ્ટેલના વોશરૂમમાંથી મળ્યો સીક્રેટ કેમેરો, ઘણા ફૂટેજ લીક… વિદ્યાર્થિનીએ કર્યો વિરોધ

કોલકત્તા રેપ કેસ બાદ મહિલાઓ સાથે દુર્વ્યવહાર થવાની અનેક ઘટના સામે આવી છે ત્યારે વધુ એક સમાચાર આંધ્રપ્રદેશમાં સામે આવ્યા છે જેમાં આંધ્રપ્રદેશની એક એન્જિનિયરિંગ કોલેજની ગર્લ્સ હોસ્ટેલમાં છુપો કેમેરા મળી આવતાં ખળભળાટ મચી ગયો હતો. જ્યારે એક વિદ્યાર્થિનીએ તેની નોંધ લીધી તો તેણે તરત જ હોસ્ટેલ મેનેજમેન્ટને જાણ કરી. કેમેરામાંથી રેકોર્ડ કરાયેલા કેટલાક ફૂટેજ બોયઝ હોસ્ટેલમાં પણ શેર કરવામાં આવ્યા છે. આ ઘટનાથી ગુસ્સે ભરાયેલી વિદ્યાર્થિનીઓ દ્વારા વિરોધ કરવામાં આવી રહ્યો છે.

મળતી માહિતી મુજબ આ મામલો આંધ્રપ્રદેશના કૃષ્ણા જિલ્લાનો છે. વિદ્યાર્થિનીઓનો આરોપ છે કે અહીંની ગુડલાવલેરુ કોલેજ ઓફ એન્જિનિયરિંગની ગર્લ્સ હોસ્ટેલમાં છુપાયેલ કેમેરા લગાવવામાં આવ્યો હતો. આ માહિતી સામે આવતાં જ અહી હલચલ મચી ગઈ હતી. આ ઘટનાથી વિદ્યાર્થિનીઓમાં રોષ ફેલાયો હતો અને તેઓ કોલેજ કેમ્પસમાં એકઠા થઈ ગયા હતા અને વિરોધ કરવા લાગ્યા હતા.

એન્જિનિયરિંગ કોલેજમાં વિરોધ કરી રહેલી વિદ્યાર્થિનીઓએ ‘વી વોન્ટ જસ્ટિસ’ના નારા લગાવવાનું શરૂ કરી દીધું હતું. તેમણે ગોપનીયતાનો ભંગ કરનારા અને વિડિયો ફૂટેજ શેર કરનારાઓ સામે કડક પગલાં લેવાની માંગ કરી હતી. વિરોધની માહિતી મળતાની સાથે જ સ્થાનિક પોલીસ ઘટનાસ્થળે પહોંચી ગઈ હતી અને તપાસ હાથ ધરી હતી. પોલીસે આ મામલાની તપાસ કરી, ત્યારબાદ એન્જિનિયરિંગના અંતિમ વર્ષના વિદ્યાર્થીને કસ્ટડીમાં લેવામાં આવ્યો. જોકે, વિદ્યાર્થીની ઓળખ જાહેર કરવામાં આવી નથી. પોલીસ આ સમગ્ર મામલે પૂછપરછ અને તપાસમાં વ્યસ્ત છે.

કોલેજ પ્રશાસને વિદ્યાર્થીઓ અને વાલીઓને આશ્વાસન આપ્યું છે કે તેઓ આ સમગ્ર મામલાની તપાસ માટે અધિકારીઓને સહકાર આપી રહ્યા છે. ભવિષ્યમાં આવી ઘટનાઓ ન બને તે માટે વધારાની સુરક્ષા વ્યવસ્થા કરવામાં આવશે તેવું કહેવામાં આવ્યું છે.

પોલીસે કેસ નોંધીને આ મામલે તપાસ હાથ ધરી

ગુડલાવલેરુ કોલેજ ઑફ એન્જિનિયરિંગમાં ગઈ કાલે બનેલી આ ઘટના બાદ પોલીસે કેસ નોંધ્યો હતો. અધિકારીઓએ જણાવ્યું કે જ્યારે ગર્લ્સ હોસ્ટેલની શોધખોળ કરવામાં આવી ત્યારે કોઈ છુપાયેલ કેમેરા મળ્યો ન હતો. પોલીસે વિદ્યાર્થીઓ અને કોલેજ સ્ટાફની હાજરીમાં આરોપીના લેપટોપ, મોબાઈલ અને અન્ય ઈલેક્ટ્રોનિક ગેજેટ્સની તપાસ કરી હતી. આ સમયગાળા દરમિયાન કોઈ ગુનાહિત પુરાવા મળ્યા નથી.

અધિકારીઓએ વિદ્યાર્થીનીઓને આશ્વાસન આપ્યું છે કે આ બાબતે ચિંતા કરવાની જરૂર નથી. તપાસ ચાલુ છે. પોલીસ અધિક્ષકે કહ્યું કે કોઈપણ ખોટા કામ કરનારની ઓળખ કરવામાં આવશે અને તેની સામે કડક કાર્યવાહી કરવામાં આવશે.