સેમસંગના ફોન પર પણ 25 ટકા ટેરિફ લાગશે! APPLE બાદ ટ્રમ્પે સાઉથ કોરિયન કંપનીને આપી ધમકી
ભારતમાં ઉત્પાદિત થતા એપલના આઇફોન પર ટેરિફ લગાવવાની ધમકી આપ્યા બાદ અમેરિકાના પ્રમુખ ડોનાલ્ડ ટ્રમ્પે હવે તોપનું નાળચું સેમસંગ તરફ ફેરવ્યું છે.ટ્રમ્પે ચેતવણી આપી છે કે દક્ષિણ કોરિયન કંપની પણજો તેના ફોનનું ઉત્પાદન અમેરિકામા નહીં કરે તો 25% આયાત કરનો સામનો કરવો પડશે .
વ્હાઇટ હાઉસમાં પત્રકારો સાથે વાત કરતાં ટ્રમ્પે જણાવ્યું હતું કે આ ટેરિફ યુએસમાં ફોન વેચતી કોઈપણ ફોન ઉત્પાદક કંપનીને લાગુ પડશે.તેમણે કહ્યું કે આ ટેરિફ સેમસંગ ઉપરાંત આ પ્રોડક્ટ બનાવતી કોઈપણ કંપનીને પણ લાગુ પડશે. જ્યારે તેઓ અહીં તેમનો પ્લાન્ટ બનાવે, ત્યારે કોઈ ટેરિફ નહીં હોય.
ઉલ્લેખનીય છે કે અગાઉ ટ્રમ્પે એપલના સીઈઓ ટીમ કુકને ભારતમાં એપલના ફોન ન બનાવવા સૂચન કર્યું હતું.જો કે કોઈ પ્રતિસાદ ન મળતાં ટ્રમ્પે ભારતથી આવનારા એપલના આઈફોન પર 25 ટકા ટેરિફ લાદવાની જાહેરાત કરી હતી.તેમના આ નિર્ણયને કારણે એપલના શેર 2.6% ઘટ્યા હતા અને તેનું બજાર મૂલ્ય લગભગ 70 અબજ ડોલરનું ઘટી ગયું હતું.
હવે ટ્રમ્પે મિત્ર રાષ્ટ્ર સાઉથ કોરિયાની કંપનીને પણ ટેરિફ જાળમાં આવરી લેવાની ઘોષણા કરી છે.અત્રે એ નોંધવું રસપ્રદ બની રહેશે કે એપલના લગભગ 90% સ્માર્ટફોન ચીનમાં એસેમ્બલ થાય છે. બીજી તરફ સેમસંગ સ્માર્ટફોન ઉત્પાદન માટે ચીન પર નિર્ભર નથી અને તેની મોટાભાગની કામગીરી ભારત, દક્ષિણ કોરિયા, વિયેતનામ અને બ્રાઝિલમાં થાય છે. દક્ષિણ કોરિયન ટેક જાયન્ટે 2019માં ચીનમાં તેની છેલ્લી ફોન ઉત્પાદન ફેક્ટરી બંધ કરી હતી.
