રાજકોટ : મારવાડી કોલેજની વિદ્યાર્થિનીની સ્નાન કરતી તસવીરો લઈ બ્લેકમેઇલિંગ કરતી મહિલાની ધરપકડ
રાજકોટમાં અત્યારે સોશિયલ મીડિયા પ્લેટફોર્મ મારફતે છેતરપિંડી-બ્લેકમેઈલિંગ સહિતના કિસ્સાઓમાં ચિંતાજનક ઉછાળો નોંધાયો છે ત્યારે શહેરની અત્યંત પ્રતિષ્ઠિત ગણાતી મારવાડી કોલેજની વિદ્યાર્થિની બાથરૂમમાં સ્નાન કરી રહી હોય તેવી તસવીરો ખેંચી વાયરલ કરવાના નામે બ્લેક મેઈલિંગ કરાયાની ફરિયાદ સાયબર ક્રાઈમ પોલીસ મથકમાં નોંધાતાં પોલીસે આરોપીની ધરપકડ કરી હતી. જો કે આ બનાવ જાહેર ન થાય તે માટે ‘ઉચ્ચ સ્તરે’થી દબાણ આવ્યાની વાતે પણ જોર પકડયું હતું.
આ અંગે જાણવા મળેલી વિગતો પ્રમાણે મોરબી રોડ ઉપર આવેલી મારવાડી કોલેજમાં એન્જિનીયરીંગનો અભ્યાસ કરતી અને તેની જ હોસ્ટેલમાં રહેતી એક વિદ્યાર્થિની બાથરૂમમાં સ્નાન કરી રહી હતી ત્યારે તેની જાણ બહાર આરોપીએ એક મહિલાએ તેની તસવીરો ખેંચી લીધી હતી. આ પછી અંગત પળોની તસવીરો વિદ્યાર્થિનીના સોશિયલ મીડિયા એકાઉન્ટ ઉપર મોકલીને તેનું બ્લેકમેઈલિંગ કરવાનું શરૂ કરતાં શરૂઆતમાં તો વિદ્યાર્થિનીએ આ વાતને અવગણી હતી પરંતુ બાદમાં બ્લેકમેઈલિંગ વધી જતાં આખરે પોલીસ ફરિયાદ નોંધાવી હતી.
પોલીસ ફરિયાદ નોંધાતાંની સાથે જ સાયબર ક્રાઈમ પોલીસ મથકે આરોપી મહિલાની ધરપકડ કરી લીધી હતી. તપાસમાં એવો પણ ખુલાસો થયો છે કે આરોપીની ઉંમર 25 થી 27 વર્ષની છે ત્યારે તેના દ્વારા આ પ્રકારની હિન હરકત શા માટે કરવામાં આવી હશે ? વિદ્યાર્થિની પાસે કોઈ પ્રકારે નાણાંની માંગ કરવામાં આવી હશે કે પછી બીજું કોઈ કારણ હશે તે અંગે પોલીસ દ્વારા કોઈ જ વિગત આપવાનું ટાળવામાં આવ્યું હતું .
