આખા ગુજરાતમાં રાજકોટના રસ્તા સૌથી વધુ જોખમી : અકસ્માતનો મૃત્યુદર દિલ્હી-હૈદરાબાદ કરતા પણ વધુ

ભારતમાં માર્ગ સલામતિ અંગેનો સ્ટેટ્સ રીપોર્ટ રાજકોટ માટે શરમજનક

અકસ્માતનો મૃત્યુદર દિલ્હી, કોલકાતા અને હૈદરાબાદ કરતા પણ વધુ છે

અત્યારે વરસાદ પછી આખા ગુજરાતમાં રસ્તાની હાલત ભંગાર થઇ ગઈ છે અને લોકો ત્રાહિમામ પોકારી ઉઠયા છે. વાહનચાલકોની કેડ ભાંગી રહી છે પરંતુ તંત્ર સબ સલામતનાં દાવા કરે છે ત્યારે ભારતમાં માર્ગ સલામતિ અંગેનો તાજેતરમાં જાહેર થયેલો એક સ્ટેટ્સ રીપોર્ટ રાજકોટ માટે શરમજનક સાબિત થઇ રહ્યો છે. આ રીપોર્ટ અનુસાર રાજકોટના રસ્તા ગુજરાતમાં સૌથી વધુ જોખમી છે અને પ્રાણઘાતક છે. એટલુ જ નહી રાજકોટમાં સૌથી વધુ માર્ગ અકસ્માત મૃત્યુ દર છે, જે દિલ્હી, હૈદરાબાદ અને મુંબઈ કરતા પણ વધારે છે.

એક અહેવાલ અનુસાર, રાજકોટ, જે ફરજિયાત હેલ્મેટના નિયમનો વિરોધ કરવામાં મોખરે હતું, તે ગુજરાતનું સૌથી વધુ માર્ગ અકસ્માત મૃત્યુ દર ધરાવતું શહેર છે.

ટ્રાન્સપોર્ટેશન રિસર્ચ એન્ડ ઈન્જરી પ્રિવેન્શન સેન્ટર, ઈન્ડિયન ઈન્સ્ટિટ્યૂટ ઑફ ટેક્નોલોજી, દિલ્હી દ્વારા ‘રોડ સેફ્ટી ઈન ઈન્ડિયા સ્ટેટસ રિપોર્ટ 2023’ અનુસાર, રાજકોટ શહેરમાં દિલ્હી, અમદાવાદ, હૈદરાબાદ, બૃહદ મુંબઈ અને કોલકાતા જેવા ઘણા મોટા શહેરોની સરખામણીમાં લાખની વસ્તી દીઠ માર્ગ અકસ્માતમાં મૃત્યુ દર વધુ છે.

રાજકોટની વસતિ દિલ્હી અને અમદાવાદ કરતા ઘણી ઓછી છે આમ છતાં તેનો મૃત્યુદર પ્રતિ લાખ 9.7 છે, જે વડોદરા (7.4), અમદાવાદ (5.5) અને સુરત (5.5) જેવા ગુજરાતના અન્ય શહેરોને પણ પાછળ છોડી દે છે. દિલ્હીમાં એક લાખ વસ્તી દીઠ 6.9, હૈદરાબાદ 3.4, ગ્રેટર મુંબઈ 2.4 અને કોલકાતામાં 1.6નો માર્ગ અકસ્માત મૃત્યુ દર છે.

અહેવાલ મુજબ, દેશમાં સૌથી વધુ મૃત્યુદર ધરાવતા પાંચ શહેરોમાં આસનસોલ (22.9), લુધિયાણા (21.4), વિજયવાડા (20.7), અલ્હાબાદ (19.8) અને જયપુર (19.1)નો સમાવેશ થાય છે, જેમાં પ્રતિ લાખ વસ્તી દીઠ સરેરાશ 21 મૃત્યુ દર છે. .

અહેવાલમાં જણાવવામાં આવ્યું છે કે “મોટા શહેરોમાં ઓછા મૃત્યુ દરનું એક સંભવિત કારણ ટ્રાફિક ભીડને કારણે વાહનોની ઓછી ઝડપ હોઈ શકે છે. રાહદારીઓના મૃત્યુની સંભાવના 30 કિમી પ્રતિ કલાકની ઝડપે 10% થી ઓછી અને 50 કિમી પ્રતિ કલાકની ઝડપે 80% થી વધુ હોવાનો અંદાજ છે.

રાજકોટમાં વધુ મૃત્યુદરનું કારણ ભૌગોલિક પરિસ્થિતિ

ટ્રાફિક વ્યવસ્થાના એક નિષ્ણાતે જણાવ્યું હતું કે, “રાજકોટની ભૌગોલિક સ્થિતિને કારણે વધુ મૃત્યુ થાય છે. તે સૂક્ષ્મ, નાના અને મધ્યમ કક્ષાના સાહસો માટેનું ઔદ્યોગિક હબ પણ છે. આથી, ફોર વ્હીલર કરતાં દ્વિચક્રી વાહનો રસ્તા પર વધુ છે. શહેરમાં ગોંડલ, જામનગર, મોરબી, કચ્છ અને અમદાવાદ જેવા શહેરોને જોડતા અનેક ધોરીમાર્ગો પસાર થાય છે. મોટા ભાગના અકસ્માતોમાં રાહદારીઓ અને ટુ-વ્હીલરનો સમાવેશ થાય છે,”

ગુજરાતમાં મૃત્યુઆંક કેટલો

શહેર – મૃત્યુ ( પ્રતિ લાખ)
રાજકોટ – ૯.૭
વડોદરા -૭.૪
અમદાવાદ-૫.૬
સુરત -૫.૫