પોપકોર્ન ખિલાને યે હે આઈ…હવે કુણાલ કામરાએ નાણામંત્રી નિર્મલા સીતારમણ પર બનાવ્યો વીડિયો, ટેક્સ બાબતે કર્યો કટાક્ષ
મહારાષ્ટ્રના નાયબ મુખ્યમંત્રી એકનાથ શિંદે પર કટાક્ષભર્યો વીડિયો બનાવનાર સ્ટેન્ડઅપ કોમેડિયમ કુણાલ કામરા વિવાદમાં સપડાયા છે. ત્યારે હવે સ્ટેન્ડ અપ કોમેડિયન કુણાલ કામરાએ હવે કેન્દ્રીય નાણામંત્રી નિર્મલા સીતારમણ પર કટાક્ષ કર્યો છે. તેમણે બુધવારે એક વીડિયો શેર કર્યો, જેમાં તેઓ એક ગીત દ્વારા નાણામંત્રીને ‘નિર્મલા તાઈ’ કહી રહ્યા છે અને નીતિઓ પર પ્રશ્નો ઉઠાવી રહ્યા છે. ખાસ વાત એ છે કે મહારાષ્ટ્રના નાયબ મુખ્યમંત્રી એકનાથ શિંદે પરની ટિપ્પણીને લઈને વિવાદ વધુ ઘેરો બન્યો.
કુણાલ કામરાએ નાણામંત્રી પર કટાક્ષ કર્યો
લગભગ દોઢ મિનિટના આ વીડિયોમાં, કામરાએ મજાકમાં કહ્યું, ‘આપકા ટેક્સ કા પૈસા હો રહા હે હવા હવાઈ, ઈન સડકો કી બરબાદી કરને સરકાર હે આઈ. મેટ્રો હે ઈનકે મન મેં ખોદ કર કર લે અંગડાઈ, ટ્રાફિક બઢાને યે આઈ, બિઝનેસ ગિરાને યે આઈ, કહેતે હે ઈસકો તાનાશાહી. દેશ મેં ઈતની મહંગાઈ સરકાર કે સાથ હે આઈ, લોગો કી લૂટને કમાઈ સાડી વાલી દીદી આઈ, સેલરી ચૂરાને યે હે આઈ. મીડલ ક્લાસ દબાને યે હે આઈ, પોપકોર્ન ખિલાને યે હે આઈ, કહેતે હે ઈસકો નિર્મલા તાઈ.’
પોલીસે કામરાને ફરીથી સમન્સ પાઠવ્યું
મુંબઈમાં ડેપ્યુટી સીએમ શિંદે પર કરેલી ટિપ્પણીના સંદર્ભમાં પોલીસે કામરાને ફરીથી સમન્સ પાઠવ્યું છે. આ પહેલા પણ મંગળવારે તેમને નોટિસ ફટકારવામાં આવી હતી. રવિવારે આયોજિત એક કાર્યક્રમમાં તેમણે લોકોના નામ લીધા વિના ‘દેશદ્રોહી’, ‘ઠાણે કા રિક્ષા’ જેવી ટિપ્પણીઓ કરી હતી. શિવસેના દ્વારા પણ તેમને ધમકીઓ આપવામાં આવી રહી છે.
આ કાર્યક્રમ પછી શિવસેનાના કાર્યકરોએ હેબિટેટ સ્ટુડિયોમાં તોડફોડ કરી હતી. ડેપ્યુટી સીએમ શિંદેએ કહ્યું હતું કે, ‘અભિવ્યક્તિની સ્વતંત્રતા છે, પણ તેની પણ એક મર્યાદા હોવી જોઈએ.’
