PM મોદીએ Sunita Williamsને ભારત આવવાનું આમંત્રણ આપ્યું : પત્ર લખીને કહ્યુ, ભારતની દીકરીની રાહ જોશું
ભારતીય મૂળના અમેરિકન અવકાશયાત્રી સુનિતા વિલિયમ્સની સ્વદેશ પરત યાત્રા શરૂ થઈ ગઈ છે. તેમણે આજે સવારે 10.30 વાગ્યે આંતરરાષ્ટ્રીય અવકાશ મથકથી પૃથ્વી માટે ઉડાન ભરી. તેમનું અવકાશયાન સ્પેસએક્સ ડ્રેગન બુધવારે સવારે 3.27 વાગ્યે ઉતરાણ કરશે. આખી દુનિયા સુનિતા વિલિયમ્સના સુરક્ષિત વાપસીની રાહ જોઈ રહી છે. દરમિયાન, તેમના પાછા ફરતા પહેલા, વડા પ્રધાન નરેન્દ્ર મોદી દ્વારા સુનિતા વિલિયમ્સને લખાયેલો એક પત્ર સામે આવ્યો છે.
પીએમ મોદીએ આ પત્ર 1 માર્ચે સુનિતા વિલિયમ્સને લખ્યો હતો. આ પત્રમાં તેમણે સુનિતાના સુરક્ષિત વાપસીની કામના કરી છે અને તેમને ભારતની પુત્રી ગણાવી છે. પ્રધાનમંત્રીએ આ પત્ર પ્રખ્યાત અવકાશયાત્રી માઈક માસિમિનો દ્વારા સુનિતા વિલિયમ્સને મોકલ્યો હતો. આ પત્ર કેન્દ્રીય મંત્રી જીતેન્દ્ર સિંહે શેર કર્યો છે.
સુનિતા વિલિયમ્સને સંબોધિત આ પત્રમાં પીએમ મોદીએ લખ્યું છે કે હું ભારતના લોકો વતી તમને મારી શુભકામનાઓ પાઠવું છું. આજે હું એક કાર્યક્રમમાં પ્રખ્યાત અવકાશયાત્રી માઇક માસિમિનોને મળ્યો. તેમની સાથેની વાતચીત દરમિયાન, તમારો ઉલ્લેખ કરવામાં આવ્યો અને અમે ચર્ચા કરી કે અમને તમારા અને તમારા કાર્ય પર ગર્વ છે. આ વાતચીત પછી હું તમને આ પત્ર લખતા મારી જાતને રોકી શક્યો નહીં. મારી અમેરિકાની મુલાકાત દરમિયાન જ્યારે હું રાષ્ટ્રપતિ ટ્રમ્પ અને પૂર્વ રાષ્ટ્રપતિ બિડેનને મળ્યો, ત્યારે મેં તમારા ખબરઅંતર પૂછ્યા હતા.
પીએમ મોદીએ પત્રમાં લખ્યું છે કે ભારતના 1.4 અબજ લોકો હંમેશા તમારી સિદ્ધિઓ પર ગર્વ અનુભવે છે. તાજેતરના વિકાસમાં તમે ફરી એકવાર તમારી ક્ષમતાઓ દર્શાવી છે. અલબત્ત, તમે અમારાથી હજારો માઇલ દૂર છો પણ તમે અમારા હૃદયની નજીક છો. ભારતના લોકો તમારા સારા સ્વાસ્થ્ય અને તમારા મિશનની સફળતા માટે પ્રાર્થના કરે છે. બોની પંડ્યા તમારી આતુરતાથી રાહ જોતા હશે અને મને ખાતરી છે કે દિપકભાઈની પ્રાર્થનાઓ તમારી સાથે રહેશે. મને યાદ છે કે 2016 માં તમારા યુએસ પ્રવાસ દરમિયાન તમને અને બોનીને મળ્યા હતા. તમારા પાછા ફર્યા પછી અમે તમારા ભારત આવવાની રાહ જોઈશું. અમારી દીકરીને ભારતમાં આવકારવાનો અમને આનંદ થશે. હું માઈકલ વિલિયમ્સને પણ મારી શુભેચ્છાઓ પાઠવું છું.
તમને અને બેરી વિલ્મરને સુરક્ષિત પાછા ફરવા માટે શુભકામનાઓ
આ પત્ર શેર કરતી વખતે, કેન્દ્રીય મંત્રી ડૉ. જીતેન્દ્રએ કહ્યું કે એવા સમયે જ્યારે આખું વિશ્વ સુનિતા વિલિયમ્સના સુરક્ષિત વાપસીની રાહ જોઈ રહ્યું છે. પ્રધાનમંત્રી નરેન્દ્ર મોદી ભારતની દીકરીના સુરક્ષિત વાપસીની આશા રાખે છે. પીએમ મોદીનો અવકાશયાત્રી માઇક માસ્સિનો દ્વારા સુનિતા વિલિયમ્સને મોકલવામાં આવેલ આ પત્ર 1.4 અબજ ભારતીયોના ગૌરવને પ્રતિબિંબિત કરે છે. થોડા દિવસો પહેલા, પીએમ મોદી એક કાર્યક્રમમાં માસિમોનોને મળ્યા હતા અને તેમને વિનંતી કરી હતી કે તેમનો અને ભારતીયોનો આ પત્ર સુનિતા વિલિયમ્સ સુધી પહોંચે. આ પત્રમાં પીએમ મોદીએ સુનિતાના સુરક્ષિત વાપસીની શુભેચ્છા પાઠવી હતી અને તેમને ભારતની પુત્રી ગણાવી હતી, જ્યારે સુનિતાએ આ માટે પીએમ મોદી અને ભારતનો આભાર માન્યો હતો.
