હત્યાના એક આરોપીના ફોનમાંથી બાબા સિદ્દીકીના પુત્ર ઝીશાનની તસવીર મળી : ચકચારી હત્યા કેસમાં કુલ નવની ધરપકડ
એનસીપીના નેતા અને મહારાષ્ટ્રના પૂર્વ મંત્રી બાબા સીદીકીની હત્યાના આરોપસર ઝડપાયેલા બે શૂટરો પૈકીના એક આરોપીના મોબાઈલ ફોનમાંથી બાબા સાદીકીના પુત્ર ઝીશાનની પણ તસવીર મળી આવતા પોલીસ ચોકી ઉઠી છે. પ્રાપ્ત વિગત મુજબ
મુખ્ય આરોપી શુભમ લોંકરે સ્નેપ ચેટ દ્વારા આ તસવીર મોકલી હતી. એ જ પ્લેટફોર્મ દ્વારા મોકલવામાં આવેલા અન્ય સંદેશાઓ જોકે ડીલીટ કરી નાખવામાં આવ્યા હતા.
બીજી તરફ આ ભારે ચકચારી હત્યા કેસમાં પોલીસે નિતીન ગૌતમ સપ્રે, શોભાન કિશન, પ્રદીપ થોબરે, ચેતનદિલીપ પારધી અને રામ ફુલચંદ કનોજીયા નામના વધુ પાંચ શખ્સોની ધરપકડ કરી હતી.તે પૈકીના પનવેલ ખાતે રહેતા કનોજીયાએ અનેક ચોંકાવનારી વિગતોની કબુલાત આપી હતી. તેના જણાવ્યા અનુસાર બાબા સીદીકીની હત્યા માટે સૌપ્રથમ તેને અને સપ્રે ને કોન્ટ્રાક્ટ આપવામાં આવ્યો હતો. તે બંનેએ માટે એક કરોડ રૂપિયાની માગણી કરી હતી. કનોજીયા પોતે બાબા સિદ્દીકીની હત્યા ન કરવા માંગતો હોવાનું જણાવ્યું હતું. તેના કહેવા મુજબ શુટરો કશ્યપ અને ગૌતમને શુભમ લોંકર ઓળખતો હતો. એ બંને બાબા સિદ્દીકીના રાજકીય અને સામાજિક કદને જાણતા ન હોવાથી ઓછી રકમમાં કોન્ટ્રાક્ટ મેળવવા તૈયાર થઈ જશે તેવી ગણતરી સાથે શુભમ
લોંકરે ધર્મરાજ કશ્યપ, ગુરનેલ સિંઘ અને શિવકુમાર ગૌતમને સોપારી આપી હતી.
સીદીકીનો બોડીગાર્ડ સસ્પેન્ડ
બાબા સિદીકીની હત્યા થઈ ત્યારે તેની સાથે એક જ પોલીસ કોન્સ્ટેબલ હતો. સીદીકી ઉપર છ રાઉન્ડ ફાયરિંગ થયું છતાં તે કોન્સ્ટેબલે વળતો ગોળીબાર નહોતો કર્યો. તેણે પોતાની આંખમાં મરચાનો પાવડર ઘૂસી ગયો હોવાને કારણે પ્રતિકાર ન કરી શક્યો હોવાનો બચાવ કર્યો હતો પણ તેને સસ્પેન્ડ કરી દેવાયો છે. પોલીસના જણાવ્યા મુજબ બાબા સિદ્દીકી તેમની ગાડીનો દરવાજો ખોલી બેસવા જઈ રહ્યા હતા ત્યારે જ હત્યારાઓએ ફાયરિંગ કર્યું હતું. ગોળીબાર કરતા પહેલા આરોપીઓએ ધુમાડો થાય તેવી કોઈ વસ્તુ ફેકી હતી. લોકો તેને ફટાકડા નો ધુમાડો સમજી બેઠા હતા.સાથે જ એ વખતે આતશબાજી ચાલુ હોવાથી ગોળીબારનો અવાજ દબાઈ ગયો હતો.
મથુરામાં હત્યાના આરોપીએ પોલીસ મથકમાં પત્રકારોને સંબોધી હત્યાને યોગ્ય ગણાવી
મથુરામાં પોલીસ મથકમાં પોલીસની હાજરીમાં જ પત્રકારોને સંબોધન કરતા હત્યાના એક આરોપીનો વિડીયો વાયરલ થયા બાદ ત્રણ પોલીસને સસ્પેન્ડ કરી દેવામાં આવ્યા હતા. બનાવની વિગત એવી છે કે દિલ્હીમાં બિશ્નોઇ ગેંગ દ્વારા એક જીમ માલિકની કરાયેલી હત્યાના કેસમાં દિલ્હી પોલીસના સ્પેશિયલ સેલ અને મથુરા પોલીસે યોગેશ પાંડે નામના શુટરની ધરપકડ કરી હતી. ધરપકડ પહેલા યોગેશ એકાઉન્ટરમાં ઘાયલ થયો હોવાનું પોલીસે જાહેર કર્યું હતું. જો કે શુક્રવારે યોગેશ પાંડેએ મથુરાના રિફાઇનરી પોલીસ સ્ટેશનમાં પત્રકારોને સંબોધ્યા હતા. તેણે પોતાનું એકાઉન્ટર ફેક અને ઉપજાવી કાઢેલું હોવાનું જણાવ્યું હતું. તેણે બાબા સિદ્દીકીની હત્યાને ઉચિત ગણાવતા જણાવ્યું કે સિદ્દીકી સામે પણ મકોકા હેઠળ કેસ થયા હતા. બાબા સિદ્દીકીને દાઉદ ગેંગ સાથે સંબંધ હોવાનું જણાવી તેણે કહ્યું હતું કે કોઈ માણસ આવા ધંધા કરતી હોય તો તેનો આવો જ અંજામ આવે. આ વિડીયો વાયરલ થતાં ભારે ચકચાર જાગી હતી. એક તો તેણે પોલીસની એન્કાઉન્ટરની થિયરીને ખોટી ગણાવી હતી અને ઉપરાંત પોલીસ મથકમાંથી જ તેને પત્રકારો સાથે વાત કરવાની મંજૂરી કઈ રીતે મળી તેવા સવાલો ઉઠ્યા હતા. બાદમાં મથુરાના એસએસપીએ એ પોલીસ મથકના એક પીએસઆઇ, હેડ કોન્સ્ટેબલ અને કોન્સ્ટેબલને સસ્પેન્ડ કરી દીધા હતા