સ્માર્ટ મીટરની સાથે સાથે જૂના મીટર પણ લગાવાશે

વીજકંપનીઓના વડાઓ સાથેની બેઠકમાં લેવાયો નિર્ણય : જે ગ્રાહક ડીમાન્ડ કરશે તેને જુનું મીટર પણ અપાશે

રાજ્યમાં ઘરેલું વીજ ગ્રાહકોને સ્માર્ટ મીટર અનુકુળ નથી આવ્યા અને રાજ્યભરમાં જોરદાર વિરોધ થયો છે ત્યારે રાજ્ય સરકારે મહત્વનો નિર્ણય લઈને સ્માર્ટ મીટર ઉપરાંત જુના મીટર પણ લગાવવાનો નિર્ણય લીધો છે. જે ગ્રાહક જુના મીટરની ડીમાંડ કરશે તેને આપવામાં આવશે.

સરકારી સુત્રોના જણાવ્યા અનુસાર, ગ્રાહકોમાં ગેરસમજ દૂર કરવા સ્માર્ટ મીટર સાથે વધુ એક મીટર લગાવવામાં આવશે. જૂના વીજમીટરની માગ કરનાર ગ્રાહકો માટે નિર્ણય લેવામાં આવ્યો છે. સ્માર્ટ વીજમીટર સામે લોકોના સતત વિરોધને લઈને કાર્યવાહી કરવામાં આવી છે.

રાજ્ય સરકારે ચારેય વીજ કંપનીનાં એમડી સાથે બેઠક કરી હતી. અને આ બેઠકની ફલશ્રુતિ રૂપે સ્માર્ટ વીજમીટર સંદર્ભે આ નિર્ણય લીધો હતો.

ઉલ્લેખનીય છે કે, છેલ્લા કેટલાક દિવસથી ઠેર-ઠેર સ્માર્ટ પ્રિપેડ મીટરને લઇ વિરોધ જોવા મળી રહ્યો છે. એક મહિનાનું લાઈટ બિલ માત્ર બે દિવસની અંદર જ આવતા હોવાના આક્ષેપ સાથે મધ્યમવર્ગીય લોકોમાં ભારે રોષ ભભૂક્યો છે.

સ્માર્ટ મીટરનો મુદો હાઈકોર્ટમાં પહોંચ્યો

સ્માર્ટ મીટરના મુદ્દા હાઈકોર્ટમાં પણ પડકારવામાં આવ્યો છે. વડોદરાના બાજવાના એક નાગરિક વાસુદેવભાઈ ઠક્કરે MGVCLના ડાયરેક્ટર અને ઉર્જા વિભાગના સચિવ સામે હાઈકોર્ટમાં અરજી દાખલ કરી છે. તેમણે રજૂઆત કરી છે કે સ્માર્ટ મીટર ફરજિયાતપણે ઈન્સ્ટોલ કરવાનું કાયદામાં દર્શાવ્યું નથી. સ્માર્ટ મીટર લગાડવા પાછળ લાખો ગ્રાહકોનું હિત જોવામાં આવ્યું નથી. સ્માર્ટ મીટરના મેઈલ જણાવ્યા મુજબ સેન્ટ્રલ ઈલેક્ટ્રીસિટી ઓથોરીટીના ઈન્સ્ટોલેશન એન્ડ ઓપરેશન ઓફ મીટર રેગ્યુલેશનના એમેન્ડમેન્ટના જાહેરનામાનો સંદર્ભ આપી સ્માર્ટ મીટર ઈન્સ્ટોલ કરાશે તેમ જણાવ્યું હતું. વધુમાં અરજીકર્તાએ જણાવ્યું કે, દેશની પાર્લામેન્ટમાં ફેબ્રુઆરી 2019થી ફેબ્રુઆરી 2024 સુધીમાં સેન્ટ્રલ ઈલેક્ટ્રીસિટી ઓથોરીટીના 2006ના ઈન્સ્ટોલેશન એન્ડ ઓપરેશન ઓફ મીટર રેગ્યુલેશનના સુધારા બિલને મંજુરી મળી નથી.