હવે નેપાળે એવરેસ્ટ અને MDH મસાલા પર પ્રતિબંધ મુક્યો
કેન્સર પેદા કરતા જંતુનાશક ઇથિલિન ઓક્સાઇડ માટે મસાલાનું પરીક્ષણ શરૂ કર્યું : બ્રિટનમાં પણ તપાસ
સિંગાપોર અને હોંગકોંગને પગલે નેપાળે એવરેસ્ટ અને MDH દ્વારા ઉત્પાદિત મસાલાના વપરાશ અને વેચાણ પર પ્રતિબંધ મૂક્યો છે, જેમાં ઉત્પાદનોમાં હાનિકારક રસાયણોના નિશાનની ચિંતા છે. નેપાળના ખાદ્ય પ્રૌદ્યોગિકી અને ગુણવત્તા નિયંત્રણ વિભાગે કેન્સર પેદા કરતા જંતુનાશક ઇથિલિન ઓક્સાઇડ માટે બે ભારતીય બ્રાન્ડના મસાલાનું પરીક્ષણ શરૂ કર્યું છે..
મીડિયા રિપોર્ટ્સ અનુસાર, નેપાળના ફૂડ એન્ડ ક્વોલિટી કંટ્રોલ ડિપાર્ટમેન્ટે ભારતીય બ્રાન્ડના મસાલામાં કેન્સર પેદા કરતા જંતુનાશક ઇથિલિન ઓક્સાઈડની હાજરી પારખવા પરીક્ષણ શરૂ કર્યું છે.
નેપાળના ફૂડ ટેક્નોલોજીના પ્રવક્તાએ જણાવ્યું હતું કે એવરેસ્ટ અને MDH બ્રાન્ડના મસાલાની આયાત પર પ્રતિબંધ મૂકવામાં આવ્યો છે. અમે બજારમાં તેમના વેચાણ પર પણ પ્રતિબંધ મૂક્યો છે. મસાલામાં હાનિકારક કેમિકલના સેમ્પલ અંગેના અહેવાલો બાદ આ નિર્ણય લેવામાં આવ્યો છે.
દરમિયાન બ્રિટનની ફૂડ સેફ્ટી એજન્સી (FSA) એ કહ્યું કે તે ભારતમાંથી આવતા તમામ મસાલાઓ પર ઝેરી જંતુનાશકોના પરીક્ષણને વધુ કડક બનાવી રહી છે. તેમાં ઇથિલિન ઓક્સાઇડનો પણ સમાવેશ થાય છે. એટલું જ નહીં, બંને ભારતીય મસાલાનું ન્યુઝીલેન્ડમાં પરીક્ષણ કરવામાં આવી રહ્યું છે. ઇથિલિન ઓક્સાઇડ મનુષ્યમાં કેન્સરનું કારણ બની શકે છે.
મીડિયા અહેવાલો મુજબ બંને કંપનીઓ વિદેશમાં જ નહીં ભારતમાં પણ તપાસનો સામનો કરી રહી છે. ભારતના ખાદ્ય સુરક્ષા નિયમનકાર FSSAI એ વિવિધ મસાલાઓનું નિરીક્ષણ સઘન બનાવ્યું છે. ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયાએ સમગ્ર દેશમાં મસાલાના 1,500 થી વધુ નમૂનાઓ એકત્રિત કર્યા છે અને તેની તપાસ કરી રહી છે. સરકારનું કહેવું છે કે જો આ બધા સેમ્પલ ટેસ્ટમાં પાસ નહીં થાય તો કંપનીઓના ઉત્પાદનોના લાઇસન્સ રદ થઈ શકે છે.
