No Handshake Controversy: ICCએ મેચ રેફરીને હટાવવાની PCBની માંગ ફગાવી, શું પાકિસ્તાન થશે એશિયા કપમાંથી બહાર?
એશિયા કપ અને ભારત પાકિસ્તાનની મેચ હાલ ચર્ચામાં છે. મેચમાં જીત બાદ પાકિસ્તાનના ખેલાડીઓ સાથે શેક હેન્ડ ન કરતાં ટીમને માઠું લાગ્યું છે. એક તરફ ભારતની ટીમે હાથ ન મિલાવ્યો ટો બીજી તરફ પાકિસ્તાનના રાષ્ટ્રગીતની જગ્યાએ જલેબી બેબીનું ગીત વાગતા પણ ફજેતી થઈ હતી ત્યારે નો શેક હેન્ડ વિવાદને લઈને જ પાકિસ્તાનની ફજેતી થઈ છે. પાક. ની ટીમ દ્વારા મેચ રેફરીને હટાવવાની માંગ કરવામાં આવી હતી જે ICC દ્વારા ફગાવી દેવામાં આવી છે.
પાકિસ્તાનનો આગામી મુકાબલો આવતીકાલે UAE સામે
ઇન્ટરનેશનલ ક્રિકેટ કાઉન્સિલ (ICC) એ પાકિસ્તાન ક્રિકેટ બોર્ડ (PCB) ની મેચ રેફરી એન્ડી પાયક્રોફ્ટને એશિયા કપમાંથી દૂર કરવાની માંગણીને ફગાવી દીધી છે. ICC એ આ મામલાની તપાસ કર્યા પછી PCB ને તેના નિર્ણયની જાણ કરી છે. PCB એ ICC ને લખેલા પત્રમાં સ્પષ્ટપણે કહ્યું હતું કે જો એન્ડી પાયક્રોફ્ટને દૂર કરવામાં નહીં આવે, તો તેઓ તેમની ટીમને ટુર્નામેન્ટમાંથી પાછી ખેંચી લેશે. પાકિસ્તાનનો આગામી મુકાબલો આવતીકાલે UAE સામે છે.
ફરિયાદમાં PCB એ કયો મુદ્દો ઉઠાવ્યો?
PCB એ ICC ને ફરિયાદ નોંધાવી હતી કે પાયક્રોફ્ટે રવિવારે (14 સપ્ટેમ્બર, 2025) ટોસ દરમિયાન પાકિસ્તાની કેપ્ટન સલમાન અલી આગાને ભારતીય કેપ્ટન સૂર્યકુમાર યાદવ સાથે હાથ ન મિલાવવા કહ્યું હતું. ICCના એક સૂત્રએ જણાવ્યું હતું કે, ‘મોડી રાત્રે, ICC એ PCB ને જવાબ મોકલ્યો હતો કે પાયક્રોફ્ટને દૂર કરવામાં આવશે નહીં અને તેમની માંગણી નકારી કાઢવામાં આવી હતી.’
પાકિસ્તાન ટીમના મેનેજર નાવેદ ચીમાએ પણ એશિયન ક્રિકેટ કાઉન્સિલ (ACC) ને ફરિયાદ નોંધાવી હતી કે પાયક્રોફ્ટની ભલામણને કારણે, બંને કેપ્ટનો વચ્ચે ટીમ શીટ્સ બદલવામાં આવી નથી, જેમ કે સામાન્ય રીતે કરવામાં આવે છે.
રવિવારે 7 વિકેટની જીત બાદ ભારતીય કેપ્ટન સૂર્યકુમાર યાદવે નિર્ણયનો બચાવ કરતા કહ્યું હતું કે પહેલગામ આતંકવાદી હુમલામાં માર્યા ગયેલા 26 પ્રવાસીઓના પરિવારો સાથે એકતા દર્શાવવા માટે આ પગલું લેવામાં આવ્યું હતું.
પાકિસ્તાને ટુર્નામેન્ટમાંથી ખસી જવાની ધમકી આપી
PCB એ આ સમગ્ર ઘટના અંગે એશિયન ક્રિકેટ કાઉન્સિલ (ACC) ને ફરિયાદ કરી હતી અને ICC ના હસ્તક્ષેપની પણ માંગ કરી હતી. પાકિસ્તાની મીડિયા અહેવાલો અનુસાર, જો પાયક્રોફ્ટને દૂર કરવામાં નહીં આવે તો પાકિસ્તાને ટુર્નામેન્ટમાંથી ખસી જવાની ધમકી આપી છે. નકવીએ સોશિયલ મીડિયા પ્લેટફોર્મ ‘X’ પર લખ્યું હતું કે PCB એ ક્રિકેટની ભાવના અને ICC આચારસંહિતાનું ઉલ્લંઘન કરવા બદલ ફરિયાદ નોંધાવી છે અને મેચ રેફરીને તાત્કાલિક દૂર કરવાની માંગ કરી છે.
