NEET SCAM : માર્કસ વધારવાની લાલચ આપતી ટોળકીએ 30 વિદ્યાર્થીને બનાવ્યા ‘શિકાર’, 3 આરોપીની શોધખોળ
રાજકોટના કાલાવડ રોડ પર આવેલી રોયલ એકેડેમીમાં અભ્યાસ કરતાં જેતપુરના વિદ્યાર્થીના પિતા પાસેથી નીટની પરીક્ષામાં 650થી વધુ માર્કસ અપાવી દેવાની લાલચ આપી પાંચ લોકોની ટોળકી દ્વારા 30 લાખ રૂપિયા પડાવી લેવામાં આવ્યા હોવાનો ગુનો ક્રાઈમ બ્રાન્ચમાં નોંધાયા બાદ બે શખ્સોની ધરપકડ કરી તેમને પાંચ દિવસના રિમાન્ડ પર લેવામાં આવ્યા છે. રિમાન્ડ દરમિયાન થયેલા ખુલાસા પ્રમાણે આ ટોળકીએ એક જ પ્રકારની મોડસ ઓપરેન્ડીથી 30 વિદ્યાર્થીને શિકાર બનાવ્યા હોવાનું સામે આવ્યું છે. આ લોકોએ જેવો વ્યક્તિ એવો ભાવ મતલબ કે અલગ-અલગ વિદ્યાર્થીના વાલીઓ પાસેથી અલગ-અલગ રકમ પડાવી હોવાનું ખુલ્યું છે.
ડીસીપી ક્રાઈમ ડૉ.પાર્થરાજસિંહ ગોહિલે જણાવ્યું કે આ ટોળકીએ રાજકોટના ત્રણ વિદ્યાર્થી ઉપરાંત મહારાષ્ટ્ર, દિલ્હી, બિહાર સહિતના રાજ્યોના 27 વિદ્યાર્થીઓને છેતર્યા છે. ક્રાઈમ બ્રાન્ચે અત્યાર સુધીમાં વિપુલ તેરૈયા અને રોયલ એકેડેમીના ચેરમેન રાજેશ પેથાણીને પકડી પાડ્યા છે જ્યારે બેંગ્લુરુનો મનજીત જૈન ઉપરાંત ઉદેપુરનો ધવલ સંઘવી અને પકડાયેલા વિપુલ તેરૈયાનો ભાઈ પ્રકાશ તેરૈયા ફરાર હોય તેને પકડવા માટે અમદાવાદ, બેંગ્લુરુ સહિતના શહેરોમાં દરોડા પાડ્યા છે. એકંદરે આ ટોળકીનો ભોગ બનેલા વિદ્યાર્થીઓની સંખ્યામાં વધારો થઈ રહ્યો હોય તમામના નિવેદન લઈને તેમને સાહેદ બનાવવામાં આવી રહ્યાનું ડીસીપીએ જણાવ્યું હતું.
