કેલિફોર્નિયામાં કુદરતનો કહેર: કેસલ પીક પર હિમસ્ખલન થતા 8 સ્કીઅર્સના મોત, એક વ્યક્તિ ગુમ, પ્રવાસીઓ માટે ચેતવણી જાહેર
અમેરિકાના કેલિફોર્નિયામાં બરફીલા તોફાન અને હિમપ્રપાતે ભારે તબાહી મચાવી છે. પોલીસ દ્વારા આપવામાં આવેલી સત્તાવાર માહિતી અનુસાર, તાહો વિસ્તારના કેસલ પીક પર આવેલા ભીષણ હિમપ્રપાત બાદ લાપતા થયેલા નવ સ્કીઅર્સમાંથી આઠના મોત થયા હતા. બચાવ ટુકડીઓને તેમના મૃતદેહ મળી આવ્યા હતા. જ્યારે એક વ્યક્તિ હજુ પણ ગુમ છે.ઘટનાની જાણ થતા જ બચાવ કામગીરી હાથ ધરવામાં આવી હતી, પરંતુ બરફના તોતિંગ પડ નીચે દબાઈ જવાને કારણે કોઈને જીવતા બચાવી શકાયા નહોતા. આ ઘટનાને પગલે સમગ્ર વિસ્તારમાં શોકનું મોજું ફરી વળ્યું છે અને સ્થાનિક પ્રશાસન દ્વારા પ્રવાસીઓ માટે સાવચેતીની ચેતવણી જાહેર કરવામાં આવી છે.
નેવાડા કાઉન્ટીના શેરિફ શાનન મૂને આ દુર્ઘટનાની પુષ્ટિ કરતા જણાવ્યું હતું કે, “બચાવ ટીમો પૂરી મહેનતથી કામ કરી રહી હતી પરંતુ આઠ સભ્યોને ગુમાવવા એ એક મોટી કરૂણાંતિકા છે. અમે હજુ પણ એક લાપતા સભ્યની શોધ કરી રહ્યા છીએ અને તેને શોધવા માટેના તમામ પ્રયાસો ચાલુ છે.”
કેસલ પીક, કેલિફોર્નિયા ખાતે આ અકસ્માત બુધવારે વહેલી સવારે થયો હતો. સ્કીઅર્સનો એક સમૂહ જ્યારે પહાડ પર હતો, ત્યારે અચાનક હિમપ્રપાત થતા આખો સમૂહ તેની ઝપટેમાં ચડી ગયો હતો. શરૂઆતમાં છ સ્કીઅર્સને સુરક્ષિત બહાર કાઢવામાં આવ્યા હતા. જેમાંથી બેની હાલત ગંભીર હોવાથી તેમને હોસ્પિટલમાં દાખલ કરવામાં આવ્યા હતા. જોકે, અન્ય નવ લાપતા લોકોમાંથી આઠના જીવ બચાવી શકાયા નથી.
