અમૂલને દુનિયાની સૌથી મોટી ડેરી બનાવવાની મોદીની ગેરંટી

અમદાવાદના નરેન્દ્ર મોદી સ્ટેડીયમમાં અમૂલનાં ૧૨૦૦ કરોડના પ્રોજેક્ટનું ઉદઘાટન
વડાપ્રધાને ગુજરાતના પશુપાલકોને આપી ગેરંટી

50 વર્ષ પહેલા ગુજરાતના ગામડાઓએ ભેગા મળીને જે રોપા વાવ્યા હતા તે આજે એક વિશાળ વટવૃક્ષ બની ગયું છે

વડાપ્રધાન નરેન્દ્ર મોદી આજે એક દિવસના ગુજરાતના પ્રવાસે હતા અને તેમણે વિવિધ કાર્યક્રમોમાં હાજરી આપી હતી. અમદાવાદમાં નરેન્દ્ર મોદી સ્ટેડિયમ ખાતે ગુજરાત કોઓપરેટિવ મિલ્ક માર્કેટિંગ ફેડરેશન( GCMMF)ની સુવર્ણ જયંતી ઉજવણી પ્રસંગે વડાપ્રધાને અમૂલને દુનિયાની સૌથી મોટી ડેરી બનાવવાની ગેરેંટી આપી હતી. આ કાર્યક્રમમાં તેમણે અમૂલ ડેરીના 1200 કરોડના પ્રોજેક્ટનું ઉદ્ધાટન કર્યું હતું.

વડાપ્રધાન મોદીએ કહ્યું કે આઝાદી બાદ અમૂલ શ્રેષ્ઠ બ્રાન્ડ બની છે. અમૂલ એટલે વિશ્વાસ, અમૂલ એટલે વિકાસ, અમૂલ એટલે ખેડૂતોનું સશક્તિકરણ, અમૂલ એટલે આત્મનિર્ભર ભારતની પ્રેરણા, અમૂલ મોટા સંકલ્પનું ઉદાહરણ છે.

વડાપ્રધાને ગેરંટી આપતા કહ્યું હતું કે અમૂલ આજે દુનિયાની આઠમી સૌથી મોટી ડેરી છે. પરંતુ અમે અમૂલને વિશ્વની સૌથી મોટી ડેરી બનાવીશું, આ મોદીની ગેરન્ટી છે.

વડા પ્રધાને જણાવ્યું કે દુનિયાના 50થી વધુ દેશોમાં અમૂલના ઉત્પાદનોની નિકાસ થાય છે. અમૂલ સહકાર અને સંગઠનની શક્તિનું પ્રતિક છે. અમૂલનો પાયો સરદાર સાહેબના માર્ગદર્શનમાં નખાયો હતો. અમૂલ એટલે સરકાર અને સહકારનો તાલમેલ છે.

વડાપ્રધાને કહ્યું હતું કે ભારત દુનિયાનો સૌથી મોટો દૂધ ઉત્પાદક દેશ બન્યો છે. ડેરી સેક્ટરમાં 8 કરોડ લોકો સીધી રીતે જોડાયેલા છે. છેલ્લા 10 વર્ષમાં પ્રતિ વ્યક્તિ દૂધની ઉપલબ્ધતા 40 ટકા વધી છે. તેમણે કહ્યું કે ડેરી સેક્ટરની કર્તાધર્તા આપણી માતા, બહેનો, દીકરીઓ છે. દેશની મહિલા શક્તિ ડેરી સેક્ટરની કરોડરજ્જુ છે. મહિલા શક્તિના નેતૃત્વમાં દેશ આગળ વધી રહ્યો છે. અમૂલ મહિલા શક્તિના નેતૃત્વની પ્રેરણા છે.

આ પ્રસંગે મુખ્ય પ્રધાન ભૂપેન્દ્ર પટેલે ખેડૂતોને સંબોધતા કહ્યું કે સહકારથી સમૃદ્ધિ થકી રામરાજ્યના પ્રણેતા વડાપ્રધાન મોદી છે. સહકાર ક્ષેત્રની સમાજ પર પ્રભાવશાળી અસર રહી છે. મોદી-શાહની જોડીએ સહકારથી સમૃદ્ધિનું સૂત્ર આપ્યુ છે. અમૂલ વિશ્વનું સૌથી મોટો સહકારી પરિવાર બન્યો છે.