‘અનુપમા’ના સેટ પર લાગી ભીષણ આગ : આ પહેલા પણ ફિલ્મો-ટીવી શોના સેટ પર થયા છે અકસ્માત, દુર્ઘટનામાં અનેક લોકોએ જીવ ગુમાવ્યા

ટીવીની લોકપ્રિય સીરિયલ ‘અનુપમા’એ દર્શકોના દિલ જીતવામાં કોઈ કસર છોડી નથી. પરંતુ તાજેતરમાં ‘અનુપમા’ વિશે ચોંકાવનારા સમાચાર સામે આવી રહ્યા છે. કહેવામાં આવી રહ્યું છે કે શોના સેટ પર ભીષણ આગ લાગી છે, જેમાં આખો સેટ બળીને ખાખ થઈ ગયો છે. સેટ પર સવારે 5:00 વાગ્યે આગ લાગી હતી, જ્યારે બે કલાક પછી એટલે કે સવારે 7:00 વાગ્યે શોનું શૂટિંગ શરૂ થવાનું હતું જેના માટે કલાકારો અને ક્રૂએ પણ સંપૂર્ણ તૈયારીઓ કરી લીધી હતી.

AICWAએ આ આગની તપાસની માંગ કરી છે. અહેવાલો અનુસાર, આગમાં આખો સેટ બળી ગયો હતો. ઘટના સમયે ઘણા કર્મચારીઓ અને ક્રૂ મેમ્બર્સ ફ્લોર પર હાજર હતા, જોકે અત્યાર સુધી કોઈ જાનહાનિના સમાચાર નથી. મીડિયા અહેવાલ અનુસાર જો ‘અનુપમા’ના સેટ પર શૂટિંગ સમયપત્રક મુજબ શરૂ થયું હોત તો મોટી દુર્ઘટના થઈ શકી હોત. રાજન શાહીના શોનો સેટ નાશ પામ્યો છે, જ્યારે અન્ય શોના સેટ આગમાંથી માંડ માંડ બચી ગયા છે. આ પહેલા પણ ટીવી સિરિયલો અને ફિલ્મોના સેટ પર અકસ્માતો બન્યા છે, જેમાં ઘણી વખત લોકોએ જીવ ગુમાવ્યા છે. ચાલો જાણીએ આવી કેટલીક ઘટનાઓ વિશે.

‘ઈન્ડિયન 2’ ના સેટ પર અકસ્માત

કમલ હાસનની ફિલ્મ ‘ઈન્ડિયન 2’ ના શૂટિંગ દરમિયાન સેટ પર પણ એક મોટી દુર્ઘટના બની હતી. ચેન્નાઈના EVP સ્ટુડિયોમાં ક્રેન તૂટી પડવાથી આ અકસ્માતમાં ત્રણ લોકોએ જીવ ગુમાવ્યા હતા. જ્યારે 15 લોકો ઘાયલ થયા હતા. આ અકસ્માતમાં અભિનેત્રી કાજલ અગ્રવાલ માંડ માંડ બચી ગઈ હતી.

રામ ચરણની ‘ધ ઈન્ડિયા હાઉસ’ ના સેટ પર અકસ્માત

તાજેતરમાં, દક્ષિણ સ્ટાર રામ ચરણની ફિલ્મ ‘ધ ઈન્ડિયા હાઉસ’ ના સેટ પર એક અકસ્માત થયો હતો, જેમાં કેટલાક ક્રૂ સભ્યો ઘાયલ થયા હતા. હૈદરાબાદના શમશાબાદ વિસ્તારમાં શૂટિંગ દરમિયાન, પાણીની ટાંકી ફાટી ગઈ હતી, જેના કારણે સેટ પર ભારે પૂર જેવી સ્થિતિ સર્જાઈ હતી, જેના કારણે સેટ પર હાજર ક્રૂ સભ્યો અને સહાયક કેમેરામેન ઘાયલ થયા હતા.

‘કેસરી’ ના સેટ પર અક્ષય થયો હતો ઘાયલ

2019 માં રિલીઝ થયેલી અક્ષય કુમારની ફિલ્મ ‘કેસરી’ ના શૂટિંગ દરમિયાન, એક એક્શન સીનનું શૂટિંગ કરતી વખતે એક અકસ્માત થયો હતો, જેમાં અક્ષય ઘાયલ થયો હતો. તેને આરામ કરવાની સલાહ આપવામાં આવી હતી, પરંતુ તેણે કામ ચાલુ રાખ્યું.

અનુષ્કાની ફિલ્મના સેટ પર મૃત્યુ

અનુષ્કા શર્માની હોરર ફિલ્મ ‘પરી’ ના સેટ પર ઇલેક્ટ્રિક શોકથી એક લાઇટમેનનું મૃત્યુ થયું. આ અકસ્માત પશ્ચિમ બંગાળના દક્ષિણ 24 પરગણા જિલ્લામાં આઉટડોર શૂટિંગ દરમિયાન થયો હતો.

‘પદ્માવત’ ના સેટ પર અકસ્માત

સંજય લીલા ભણસાલીની સુપરહિટ ફિલ્મ ‘પદ્માવત’ ના સેટ પર અકસ્માતમાં એક કામદારનું મૃત્યુ થયું. જોકે, આ પછી દિગ્દર્શક પણ કામદારના પરિવારને મદદ કરવા આગળ આવ્યા.

‘ભૂમિ’ ના સેટ પર અદિતિ અકસ્માતમાં બચી ગઈ

સંજય દત્ત અને અદિતિ રાવ હૈદરીની ફિલ્મ ‘ભૂમિ’ ના સેટ પર શૂટિંગ દરમિયાન આગ લાગી હતી. આ અકસ્માતમાં અદિતિ રાવ હૈદરીનો માંડ માંડ બચાવ થયો. જ્યારે આગ લાગી ત્યારે અદિતિ લગ્નના ગીતનું શૂટિંગ કરી રહી હતી. આ ઘટના મુંબઈના આરકે સ્ટુડિયોમાં બની હતી.

આ પણ વાંચો : ભીલવાસનું કતલખાનું રાજકોટ શહેરથી દૂર લઈ જવા તૈયારી : ગેરકાયદે ધમધમતાં કતલખાના ઉપર આરોગ્ય-સોલિડ વેસ્ટ મેનેજમેન્ટ શાખા તૂટી પડશે

ટીવી સિરિયલ ‘ઇમલી’ના સેટ પર કરંટ લાગવાથી એકનું મોત

વર્ષ 2023માં ટીવી શો ‘ઇમલી’ના શૂટિંગ દરમિયાન એક અકસ્માત થયો હતો, જેમાં એક કામદારનું વીજળીના કરંટથી મૃત્યુ થયું હતું. આ અકસ્માત ગોરેગાંવ ફિલ્મ સિટીના શૂટિંગ દરમિયાન થયો હતો.

ગુમ હૈ કિસી કે પ્યાર મેં’ના સેટ પર આગ લાગી હતી

વર્ષ 2023માં ટીવી સિરિયલ ગુમ હૈ કિસી કે પ્યાર મેં’ના સેટ પર આગ લાગવાની ઘટના સામે આવી હતી. જોકે, આ અકસ્માતમાં કોઈ જાનહાનિના સમાચાર નહોતા. પરંતુ આ આગને ઓલવવા માટે 12 ફાયર એન્જિન ઘટનાસ્થળે પહોંચ્યા હતા.

‘અનુપમા’ના સેટ પર વીજળીના કરંટથી મૃત્યુ

આ પહેલા ‘અનુપમા’ના સેટ પર પણ અકસ્માત થયો હતો. વર્ષ 2024 માં, એક ટીવી શોના સેટ પર એક કેમેરા એટેન્ડન્ટનું ઇલેક્ટ્રિક શોકથી મૃત્યુ થયું હતું.

‘તેનાલી રામા’ ના સેટ પર આગ લાગી હતી

આ વર્ષે માર્ચ મહિનામાં ટીવી શો ‘તેનાલી રામા’ ના સેટ પર આગ લાગી હતી. જેના કારણે શૂટિંગ લગભગ 2 કલાક માટે બંધ કરવું પડ્યું હતું. જોકે, આ અકસ્માતમાં કોઈને ઈજા થઈ હોવાના કોઈ સમાચાર નથી.

‘અનુપમા’ શો TRPમાં  નંબર 1

‘અનુપમા’ ટીવી પરનો સૌથી લોકપ્રિય શો છે. આ શોમાં રૂપાલી ગાંગુલી લીડ એક્ટ્રેસ તરીકે જોવા મળે છે. આ શોએ તેમના કરિયરને નવી ઉડાન આપી છે. આ શો લાંબા સમયથી ટીઆરપી યાદીમાં રાજ કરી રહ્યો છે. આ જ કારણ છે કે શોના સેટ પર આગ લાગવાથી ચાહકોને પણ મોટો આંચકો લાગ્યો છે.