લંડનની કોલેજમાં મમતા બેનર્જીના કાર્યક્રમમાં ધમાલ: ‘ગો બેક’ના નારા

પશ્ચિમ બંગાળમાં વિદેશી રોકાણને આકર્ષવાના હેતુથી વિદેશ પ્રવાસે ગયેલા પશ્ચિમ બંગાળના મુખ્યમંત્રી મમતા બેનર્જીના ઓક્સફોર્ડ યુનિવર્સિટીની કેલોગ કોલેજમાં યોજાયેલા કાર્યક્રમમાં ભારે ધાંધલ ધમાલ થઈ હતી. સીપીઆઈએમની વિદ્યાર્થી પાંખ સ્ટુડન્ટ ફેડરેશન ઓફ ઇન્ડિયાના યુકે સ્થિત સંગઠનના સભ્યોએ મમતા બેનર્જીને પ્લે કાર્ડ દેખાડી મમતા ગો બેક ના નારા લગાવ્યા હતા. મમતા બેનરજી એ પણ જોકે ” અસલ બંગાળી વાઘણ ” સ્ટાઇલથી આ દેખાવો નો સામનો કર્યો હતો.

મમતા બેનર્જીએ ભારતની આર્થિક સ્થિતિ અંગે ચર્ચા કરી તે પછી ધમાલ શરૂ થઈ હતી. સામ્યવાદી વિદ્યાર્થીઓએ મમતા બેનરજીને તીખા સવાલો કરતાં પૂછ્યું હતું કે પશ્ચિમ બંગાળમાં છેલ્લા બે વર્ષમાં કેટલા હિન્દુઓ મર્યા? શું તમે માનવ અંગોનું વેચાણ કરો છો?
વિદ્યાર્થીઓએ પશ્ચિમ બંગાળમાંથી ટાટાનો નેનો પ્લાન્ટ ગુજરાત કેમ ચાલ્યો ગયો તે ઉપરાંત આરજી કર હોસ્પિટલ કાંડ અંગે મમતાને ઘેર્યા હતા. દેખાવકારોએ તેમને 2023 ની પંચાયત ચૂંટણીની હિંસા તથા બળાત્કારોની ઘટનાઓ અંગે પણ સવાલો કર્યા હતા.

મમતાએ જો કે વિચલિત થયા વગર તેમનું ભાષણ ચાલુ રાખ્યું હતું. તેમણે દેખાવકારોને કહ્યું કે તમે વિરોધ કરો છો તેની સામે મારો કોઈ વાંધો નથી. તમે અવાજ ઉઠાવો. આ લોકશાહી છે. હું તમને ધ્યાનથી સાંભળીશ.

બાદમાં મમતા એ કહ્યું કે અહીં રાજકારણ ન કરો ભાઈઓ. આ કોઈ રાજકીય કાર્યક્રમ નથી. તમે મારા રાજ્યમાં મારી વિરુદ્ધ રાજકારણ કરી શકો છો. એ પછી તેમણે કહ્યું કે હું હિન્દુ, મુસ્લિમ, શીખ, ઇસાઈ બધાની છું. ખુરશી ઉપર બેસીને હું સમાજનું વિભાજન ન કરી શકું. હું મરી જાઉં તે પહેલા એકતા જોવા માગું છું. એકતા આપણી તાકાત છે. વિભાજન પતન તરફ દોરી જાય છે. સ્વામી વિવેકાનંદે આ કહ્યું હતું.

મમતાએ નાટ્યાત્મક રીતે એક જૂની તસવીર દેખાડી

વિદ્યાર્થીઓ ધમાલ કરતા હતા ત્યારે મમતા બેનરજીએ 1990 માં તેમની ઉપર સીપીઆઇ એમ નાકાર્યકરે કરેલા હુમલા સમયે થયેલી ઇજાઓ દર્શાવતી તસ્વીર રજૂ કરી હતી. તેમણે વિદ્યાર્થીઓને સંબોધીને કહ્યું કે આ તમારો આતંક છે.હું મરતા મરતા બચી હતી. હું એકતાની હિમાયતી છું, તમે નહી.તમે બંગાળ જાઓ અને કોમવાદી તત્વો સામે લડવા માટે તમારી પાર્ટીને મજબૂત બનાવો. મારી સામે લડો માં. તેમણે કહ્યું કે આ રીતે કાર્યક્રમમાં અંધાધુંધી સર્જવાની સીપીઆઇએમની જૂની આદત છે. તેમણે ચેતવણી આપતા કહ્યું,” યાદ રાખો, તમારા નેતાઓના કાર્યક્રમમાં પણ આવું બની શકે છે.”