યુદ્ધનો અંત બાબતે ટ્રમ્પના નિવેદન બાદ ઈરાનનો સણસણતો જવાબ: યુદ્ધ ક્યારે બંધ કરવું એ ટ્રમ્પ નહીં,અમે નક્કી કરીશું

અમેરિકા અને ઇઝરાયેલ સાથે ચાલી રહેલા તણાવ વચ્ચે અમેરિકાના પૂર્વ રાષ્ટ્રપતિ ડોનાલ્ડ ટ્રમ્પના નિવેદન પર ઈરાને કડક પ્રતિભાવ આપ્યો છે. ઈરાનની ઇસ્લામિક રેવોલ્યુશનરી ગાર્ડ કોર્પ્સ (IRGC) એ સ્પષ્ટ શબ્દોમાં જણાવ્યું કે યુદ્ધ ક્યારે અને કેવી રીતે બંધ કરવું તે અમેરિકો નહીં, પરંતુ ઈરાન નક્કી કરશે.

IRGC દ્વારા જાહેર કરાયેલા નિવેદનમાં જણાવાયું કે “યુદ્ધનો અંત ક્યારે આવશે તે નક્કી કરવાની શક્તિ અમારા હાથમાં છે. આ પ્રદેશનું ભવિષ્ય અને સમીકરણો હવે ઈરાનના સશસ્ત્ર દળોના નિયંત્રણમાં છે. અમેરિકન દળો યુદ્ધનો અંત લાવી શકશે નહીં.”

ઈરાનનો આ પ્રતિસાદ ત્યારે આવ્યો જ્યારે ડોનાલ્ડ ટ્રમ્પે જણાવ્યું હતું કે ઈરાન સામેનું યુદ્ધ કદાચ લાંબું નહીં ચાલે અને તે ટૂંક સમયમાં સમાપ્ત થઈ શકે છે. જોકે, ટ્રમ્પે સાથે જ કડક ચેતવણી આપતાં કહ્યું હતું કે જો ઈરાન હોર્મુઝ જળમાર્ગમાં તેલ પુરવઠાને અવરોધવાનો પ્રયાસ કરશે તો અમેરિકા 20 ગણો વધુ ભયંકર હુમલો કરશે.

આ પણ વાંચો :કચ્છના નેશનલ હાઈવેને 650 કરોડના ખર્ચે ચકાચક કરાશે: પ્રવાસીઓ માટે ‘લાઈફલાઈન’ સમાન સાબિત થશે, સરહદી વિસ્તારમાં કનેક્ટિવિટી વધશે

સોશિયલ મીડિયા પર ટ્રમ્પે લખ્યું હતું કે જો વૈશ્વિક તેલ પુરવઠો અટકાવવાનો પ્રયાસ થશે તો અમેરિકા એવા લક્ષ્યોને નિશાન બનાવશે જેને નષ્ટ કરવું સરળ છે અને જેના કારણે ઈરાન માટે ફરી ઊભું થવું લગભગ અશક્ય બની જશે.

પુતિન–ટ્રમ્પ વચ્ચે ફોન પર ચર્ચા

યુદ્ધની પરિસ્થિતિ વચ્ચે ટ્રમ્પે રશિયાના રાષ્ટ્રપતિ વ્લાદિમિર પુતિન સાથે ફોન પર ચર્ચા કરી હતી. રશિયાના વિદેશ નીતિ સલાહકાર યૂરી ઉશાકોવે જણાવ્યું કે પુતિને ગલ્ફ દેશોના નેતાઓ અને ઈરાનના રાષ્ટ્રપતિ મસૂદ પેઝેશ્કિયાન સાથે થયેલી ચર્ચાઓના આધારે સંઘર્ષનો ઝડપી રાજકીય અને રાજદ્વારી ઉકેલ લાવવા માટે કેટલાક સૂચનો રજૂ કર્યા હતા.