IND vs NZ ટેસ્ટ સીરીઝ: ન્યુઝીલેન્ડ સામે ભારતના ધુરંધરો ધ્વસ્ત, 12 વર્ષ પછી ઘરઆંગણે પહેલી શ્રેણી હારી

ભારતીય ટીમને ન્યુઝીલેન્ડ સામે પુણે ટેસ્ટ મેચમાં હારનો સામનો કરવો પડ્યો છે. આ મેચમાં ભારતીય ટીમને જીતવા માટે 359 રનનો મુશ્કેલ ટાર્ગેટ હતો, જેનો તે સફળતાપૂર્વક પીછો કરી શકી નહોતી. ભારતીય ટીમ બીજા દાવમાં માત્ર 245 રન જ બનાવી શકી હતી. આ મેચ ત્રીજા દિવસે (26 ઓક્ટોબર) સમાપ્ત થઈ. પુણે ટેસ્ટ મેચમાં હાર સાથે ભારતીય ટીમે ટેસ્ટ શ્રેણી પણ ગુમાવી દીધી છે. ન્યુઝીલેન્ડની ટીમ પ્રથમ વખત ભારતીય ધરતી પર ટેસ્ટ શ્રેણી જીતવામાં સફળ રહી હતી. આ પહેલા ભારતને બેંગલુરુ ટેસ્ટ મેચમાં પણ ન્યુઝીલેન્ડ સામે 8 વિકેટે હારનો સામનો કરવો પડ્યો હતો.

ભારતે 12 વર્ષ પછી ઘરઆંગણે પહેલી શ્રેણી હારી

ભારતીય ટીમ 12 વર્ષ બાદ ઘરઆંગણે ટેસ્ટ શ્રેણી હારી છે. આ સાથે જ ભારતની ધરતી પર સતત 17 ટેસ્ટ શ્રેણી જીત્યા બાદ જીતનો સિલસિલો તૂટી ગયો હતો. છેલ્લી વખત ટીમ ઈન્ડિયાને 2012-13માં ચાર મેચની ટેસ્ટ શ્રેણીમાં ઈંગ્લેન્ડે 2-1થી હરાવ્યું હતું. જે બાદ ભારતે સતત 18 શ્રેણી જીતી હતી. જોકે, હવે ન્યૂઝીલેન્ડે ટીમ ઈન્ડિયાને હરાવીને આ ક્રમ તોડી નાખ્યો છે. ભારતની ધરતી પર કિવી ટીમ આટલું પ્રભાવશાળી પ્રદર્શન કરશે એવું કોઈએ વિચાર્યું ન હતું. પ્રથમ ટેસ્ટ જીતીને ન્યુઝીલેન્ડે 36 વર્ષ બાદ ભારતમાં ટેસ્ટ મેચ જીતી હતી. હવે તેણે પ્રથમ વખત ભારતમાં ટેસ્ટ શ્રેણી જીતી છે. ભારત અને ન્યુઝીલેન્ડ વચ્ચે પ્રથમ ટેસ્ટ 1955માં રમાઈ હતી અને બંને દેશોના 69 વર્ષ જૂના ટેસ્ટ ક્રિકેટ ઈતિહાસમાં પ્રથમ વખત ન્યુઝીલેન્ડની ટીમે ભારતની ધરતી પર ટેસ્ટ શ્રેણી જીતી છે.

New Zealand stir up the race to the #WTC25 Final with a historic win over India in Pune ???? #INDvNZ | Read on ????https://t.co/0QYbooJJlB

— ICC (@ICC) October 26, 2024

ભારતીય ટીમ સતત બે ટેસ્ટમાં હારી છે

ભારત ઘરઆંગણે સતત બે ટેસ્ટ હાર્યું છે. 2012 પછી આ પ્રથમ વખત છે જ્યારે ટીમ ઈન્ડિયા ઘરની ધરતી પર સતત બે ટેસ્ટ હારી છે. 2012માં, ઈંગ્લેન્ડે વાનખેડે ખાતે રમાયેલી બીજી ટેસ્ટ અને ઈડન ગાર્ડન્સ ખાતે રમાયેલી ત્રીજી ટેસ્ટમાં ચાર મેચની શ્રેણીમાં ભારતને હરાવ્યું હતું. 2000 પછી 25 વર્ષમાં આ ત્રીજી વખત છે જ્યારે ટીમ ઈન્ડિયા ઘરઆંગણે સતત બે ટેસ્ટ હારી છે. ન્યુઝીલેન્ડ અને ઈંગ્લેન્ડ પહેલા દક્ષિણ આફ્રિકાએ આવું કર્યું હતું. તેણે 2000માં બે મેચની ટેસ્ટ શ્રેણીમાં ભારતને 2-0થી હરાવ્યું હતું. ત્યારબાદ આફ્રિકાની ટીમે વાનખેડે અને ચિન્નાસ્વામી સ્ટેડિયમમાં ટીમ ઈન્ડિયાને હરાવ્યું હતું.

મેચમાં શું થયું ?

મેચની વાત કરીએ તો ન્યૂઝીલેન્ડે ટોસ જીતીને પ્રથમ બેટિંગ કરીને પ્રથમ દાવમાં 259 રન બનાવ્યા હતા. જવાબમાં ભારતનો પ્રથમ દાવ 156 રન પર સમાપ્ત થયો હતો. ન્યુઝીલેન્ડે બીજા દાવમાં 255 રન બનાવ્યા હતા અને તેની પાસે 358 રનની ઓવરઓલ લીડ હતી. 359 રનના ટાર્ગેટનો પીછો કરતા ટીમ ઈન્ડિયા તરફથી યશસ્વી જયસ્વાલે સૌથી વધુ 77 રન બનાવ્યા અને રવિન્દ્ર જાડેજાએ 42 રનની ઈનિંગ રમી. આ બે સિવાય કોઈ બેટ્સમેન 25+ના આંકડાને સ્પર્શી શક્યો નથી. રોહિત શર્મા આઠ રન બનાવીને આઉટ થયો હતો, શુભમન ગિલ 23 રન બનાવીને, વિરાટ કોહલી 17 રન બનાવીને આઉટ થયો હતો, રિષભ પંત ખાતું ખોલ્યા વિના આઉટ થયો હતો, વોશિંગ્ટન સુંદર 21 રન બનાવીને અને સરફરાઝ ખાન નવ રન બનાવીને આઉટ થયો હતો. ન્યુઝીલેન્ડ માટે મિશેલ સેન્ટનરે પ્રથમ દાવમાં સાત અને બીજી ઈનિંગમાં છ વિકેટ ઝડપી હતી.