રાજકોટ ગ્રામ્યમાં ડાઘીયા કરડવાના બનાવો વધ્યા! ધોરાજી-ઉપલેટામાં બનાવ ઘટ્યા,ગોંડલ-કોટડામાં શ્વાનનો આતંક વધ્યો
સુપ્રીમ કોર્ટે શાળા, કોલેજ, હોસ્પિટલ અને જાહેર માર્ગો પર લોકોને બટકા ભરી લેતા શ્વાનનો આતંક નિવારવા તેમજ અત્યાર સુધીમાં કરવામાં આવેલ કામગીરીનો હિસાબ માંગ્યો છે ત્યારે રાજકોટ શહેરની જેમ જ જિલ્લાના ગ્રામ્ય વિસ્તારમાં પણ ડાઘીયાઓએ આતંક મચાવી ચાલુ વર્ષના 10 મહિનામાં 8242 લોકોને બચકા ભરી લીધા હોવાના સત્તાવાર આંકડા સામે આવ્યા છે. જિલ્લા પંચાયત રાજકોટના આંકડા મુજબ ગત વર્ષે જિલ્લાના 11 તાલુકામાં 9476 લોકોને શ્વાને બટકા ભર્યા હતા. ચાલુ વર્ષમાં જેતપુર અને ઉપલેટા તાલુકામાં શ્વાન કરડવાના બનાવમાં ઘટાડો નોંધાયો છે. જેની સામે કોટડા સાંગાણી તાલુકામાં પ્રમાણ વધ્યું છે.
રાજકોટ જિલ્લા પંચાયતના સત્તાવાર આંકડા મુજબ રાજકોટ જિલ્લાના 11 તાલુકાઓમાં ચાલુ વર્ષે જાન્યુઆરીથી ઓક્ટોબર માસ દરમિયાન કુતરા કરડવાના કુલ 8242 બનાવો નોંધાયા છે. ગત વર્ષ દરમિયાન આ આંકડો 9476 હતો. મહત્વનું છે કે, શહેરી વિસ્તારમાં નગરપાલિકા અને મહાનગર પાલિકા દ્વારા રસ્તે રખડતા શ્વાનને પકડવાની તેમજ ખસીકરણની કામગીરી કરવામાં આવે છે છતાં પણ રાજકોટ શહેરમાં ચાલુ વર્ષમાં 14,106 બનાવ સરકારી ચોપડે નોંધાયા છે. બીજી તરફ ગ્રામીણ વિસ્તારમાં આવી જોઈ કામગીરી થતી ન હોવા ઉપરાંત શ્વાનની સંખ્યા વધુ હોવા છતાં પણ શ્વાન કરડવાના બનાવોનું પ્રમાણ નીચું છે. જો કે, અનેક બનાવ સરકારી ચોપડે નોંધાતા ન હોવાથી સાચા આંકડા સામે આવતા નથી.
ધોરાજી-ઉપલેટામાં બનાવ ઘટ્યા, ગોંડલ- કોટડામાં વધ્યા
રાજકોટ જિલ્લાના ગ્રામ્ય વિસ્તારમાં ખાસ કરીને ધોરાજી અને ઉપલેટા તાલુકામાં શ્વાન કરડવાના બનાવોમાં નોંધપાત્ર ઘટાડો આવ્યો છે. ગત વર્ષની તુલાનેએ જોવામાં આવે તો ધોરાજીમાં ગત વર્ષના 1590 બનાવ સામે ચાલુ વર્ષના દસ માસમાં 1258 બનાવ બન્યા છે. જયારે ઉપલેટામાં ગત વર્ષે 1566 બનાવ શ્વાન કરડવાના બન્યા હતા જેની સામે આ વર્ષમાં માત્ર 412 બનાવ જ બનાવ બન્યા છે. સાથે જ જેતપુરમાં પણ બનાવ ઘટ્યા છે. બીજી તરફ ગોંડલ, જામકંડોરણા, લોધીકા, વિછિયા અને પડધરી તાલુકામાં ગત વર્ષની તુલનાએ ડાઘીયા બચકા ભરી જવાની ઘટના વધી છે જેમાં સૌથી વધુ બનાવ કોટડા સાંગાણી તાલુકામાં બનાવો વધ્યા હોવાનું આંકડા પરથી ફલિત થઇ રહ્યું છે.
