આંખે જોઈ શકતા ક્રિકેટરો એક મેચ રમે તો તેને 3 લાખ, ન જોઈ શકતા ક્રિકેટરો રમે તો માત્ર 3 હજાર! એકને ગોળ અને બીજાને ખોળ કેમ?
કોલંબોમાં જ્યારે ભારતીય મહિલા બ્લાઈન્ડ ક્રિકેટ ટીમે પહેલીવાર ટી-20 વર્લ્ડકપ જીતીને ટ્રોફી ઉઠાવી ત્યારે આખો દેશ ગૌરવ સાથે ઝૂમી ઉઠ્યો હતો પરંતુ ઘણા ઓછા લોકોને ખબર નહીંહોય કે આ ઐતિહાસિક જીત અપાવનારા બ્લાઈન્ડ ક્રિકેટરોને કેટલી ફી મળે છે. ચોંકાવનારી વાત એ છે કે ભારતીય બ્લાઈન્ડ ક્રિકેટ ટીમને અત્યાર સુધી ભારતીય ક્રિકેટ કંટ્રોલ બોર્ડ (BCCI)ની માન્યતા મળી નથી મતલબ કે ખેલાડીઓને મેચ ફી બીસીસીઆઈ તરફથી નહીં પરંતુ એક ખાનગી ટ્રસ્ટ અને અમુક સ્પોન્સર્સની મહેરબાનીથી મળે છે.
જે દેશમાં ક્રિકેટ અને ક્રિકેટરોની પૂજા થાય છે એ દેશમાં બ્લાઈન્ડ ક્રિકેટ અને બ્લાઈન્ડ ક્રિકેટરો અંધકારમય જીવનમાં ગરકાવ છે. ભારતીય ક્રિકેટ કંટ્રોલ બોર્ડ દુનિયાનું સૌથી અમીર બોર્ડ છે જે પોતાના ખેલાડીઓને એક ટેસ્ટ મેચ માટે 15 લાખ, વન-ડે માટે છ લાખ અને ટી-20 માટે ત્રણ લાખ રૂપિયા મેચ ફી આપે છે પરંતુ એ જ દેશની બ્લાઈન્ડ ક્રિકેટ ટીમની મેચ ફી માત્ર ત્રણ હજાર રૂપિયા જ છે. આ હાલત માત્ર મહિલા બ્લાઈન્ડ ક્રિકેટ ટીમની નહીં પરંતુ પુરુષ ટીમની પણ છે.
ખેલાડીઓનો તમામ ખર્ચ ક્રિકેટ એસોસિએશન ફોર ધ બ્લાઈન્ડ ઈન ઈન્ડિયા (સીએબીઆઈ) અને અમુક દયાળું સ્પોન્સર્સ ઉઠાવે છે. વિદેશી ટૂર્નામેન્ટ, કિટ, ટ્રેનિંગ કેમ્પ સહિતનું બધું દાન અને મદદ ઉપર નિર્ભર છે. બીજી બાજુ પાકિસ્તાન ક્રિકેટ બોર્ડ પોતાના બ્લાઈન્ડ ક્રિકેટરોને સેન્ટ્રલ કોન્ટ્રાક્ટ આપે છે. ઑસ્ટ્રેલિયા, ઈંગ્લેન્ડ, શ્રીલંકા, બાંગ્લાદેશ, ન્યુઝીલેન્ડ અને ઝીમ્બાબ્વે જેવા દેશોએ પણ બ્લાઈન્ડ ક્રિકેટને માન્યતા આપી છે.
સવાલ માત્ર પૈસાનો નથી પરંતુ સન્માન અને સમાનતાનો છે. જ્યારે દેશની એક ટીમ ચેમ્પિયન બને છે તો તેની જીતને માત્ર તાળીઓ પૂરતી મર્યાદિત રાખવી વ્યાજબી છે ? વર્લ્ડકપ જીતનારા દરેક ખેલાડીનું સ્વપ્ન માત્ર ટ્રોફી નહીં પરંતુ શ્રેષ્ઠ જિંદગી અને સમાજમાં સન્માન મળે તેવું પણ હોય છે. વર્લ્ડકપ જીતનારી ભારતીય ટીમને માત્ર એક લાખ રૂપિયાનું ઈનામ મળ્યું છે અને તે પણ એક ગ્રુપ તરફથી !
