દહેજ માટે પત્નીને જીવતી સળગાવી દેનાર પતિનું હાફ એનકાઉન્ટર : ભાગવાની કોશિશ કરતા પોલીસે પગમાં મારી ગોળી
ગ્રેટર નોઈડામાં પોતાની પત્ની નિક્કીને દહેજ માટે જીવતી બાળી નાખનારા આરોપી વિપિન ભાટીનું પોલીસે એન્કાઉન્ટર કર્યું છે. પોલીસે પગમાં ગોળી મારી ઈજાગ્રસ્ત કરી દીધો હતો. આ ઘટના સિરસા ચાર રસ્તા નજીક બની હતી, જ્યાં આરોપીએ પોલીસના હાથમાંથી બંદૂક લઈને ભાગવાનો પ્રયાસ કર્યો હતો.
પોલીસે ઘટનાનો વીડિયો સામે આવ્યા બાદ પકડી પાડ્યો હતો. પોલીસના જણાવ્યાનુસાર આરોપીને કોર્ટમાં હાજર કરવા માટે લઈ જવામાં આવતો હતો. આ સિવાય તેણે પોલીસ અધિકારીની પિસ્તોલ ઝૂંટવીને ભાગવાનો પ્રયાસ કર્યો હતો. આ દરમિયાન એન્કાઉન્ટરની સ્થિતિ સર્જાતા પોલીસે તેને પગમાં ગોળી મારી દીધી હતી.
નિક્કીને જીવતી સળગાવી દેવાની ઘટના ગુરુવારે ગ્રેટર નોઈડામાં બની હતી. એવો આરોપ છે કે નિક્કીને તેના સાસરિયાઓએ કથિત રીતે માર માર્યો હતો. આરોપીઓએ વાળ પકડીને માર માર્યો અને તેની બહેનને પુત્રની સામે આગ લગાવી દીધી હતી. પીડિતાના છ વર્ષના દીકરાએ કહ્યું હતું કે, ‘મારા પિતાએ મમ્મી પર કંઈક રેડ્યું, પછી તેને થપ્પડ મારી અને લાઇટરથી આગ લગાવી દીધી.’
ગ્રેટર નોઈડાના એડીસીપી સુધીર કુમારે જણાવ્યું હતું કે 21 ઓગસ્ટના રોજ ફોર્ટિસ હોસ્પિટલ તરફથી માહિતી મળી હતી કે એક મહિલા ગંભીર રીતે દાઝી ગયેલી હાલતમાં દાખલ છે, જેને સફદરજંગ હોસ્પિટલમાં રિફર કરવામાં આવી છે. પોલીસ તાત્કાલિક હોસ્પિટલ પહોંચી હતી, પરંતુ મહિલાનું ઈજાઓને કારણે મૃત્યુ થયું હતું. પોલીસે આ કેસમાં વિપિન ભાટીની ધરપકડ કરી હતી.
